Shongzā 26

26 ¹"Tabernacle chi chonrān tharā eina sākhuira; chi manakta hākakhui kazaira̱ kala khamaying, hungrisi, hungshi kahai chonsā eina, cherubim themlāk eina sākhuira. ²Chonrān ava̱va̱wui asān khuining maga̱da chishat, kala aretna khuining mati; chonrān saikora asān-aret ngaraichāsera. ³Chonrān phangā asā akha sākhuira, kala khangatei phangā chi asā akha sākhuira. ⁴Ngaher khare chiwui shokkhamayara chonrān amareili khamayinga eina hokthāng khavai sāsangra; chi tākam eina kakhanewui mareili chilila sāra. ⁵Khare chonrān chili hokthāng khavai hangphangā, kala kakhane ngaherwui chonrān amareili hangphangā sāsangra; kala hokthāng khavaibing chi akha eina akha mai ngasungda sāra. ⁶Sinā eina akhui hangphangā sākhuira, kala chonrānbing chi akha eina akha pānkhui ngarokta tabernacle chi akha sāhaora.

⁷"Tabernacletungli fakhavai meha eina chonrān tharāda akha sākhuira. ⁸Chonrān tharāda akha ava̱va̱wui asān khuining thumrā, kala aretna mati; chonrān tharāda akha chi asān-aret ngaraichāsera. ⁹Chonrān phangā sakkha sākhuira, kala khangatei tharuk chi sakkha sākhuira; kala chonrān katharuka chi kachonshim mangāshong khani sāda ngaphoserra. ¹⁰Ngaher khare chiwui shokkhamayara chonrān amareili hokthāng khavai hangphangā sāsangra, kala kakhane ngaherwui chonrān amareili hangphangā sāra. ¹¹Pithraiwui akhui hangphangā sākhuilaga hokthāng khavaibing ngava̱sanglaga kachonshim chi akha sāra. ¹²Kachonshim chonrānwui khalāng samkaphang chi tabernacle khanukshongla za̱ngasakra. ¹³Uishong yāshong faror khavai, chonrānwui khalāng khuiningkha chi tabernacle chiwui lākhala lākhala za̱ngasakra. ¹⁴Kachonshimli fakham khavai mathen kahai yaohui, kala chiwui atungli mehui eina faror khavai sākhuira.

¹⁵"Tabernaclewui vang khaning khavai akombing acaciathing eina sākhuira. ¹⁶Akom kachiva̱wui asān khuining tharā, kala aretna khuining akha tangkhaira. ¹⁷Akom ava̱va̱li akha eina akha ngasunkhui khavai amachat khanini kāngasakra; tabernacle chiwui akom kachida chithāda sāra. ¹⁸Tabernaclewui azingshongwui vang akom maga̱ sākhuira. ¹⁹Akom maga̱ chiwui azingli lupāsā eina aphei hangmati sākhuira; akom ava̱va̱wui vang aphei khanini, amachat ava̱va̱wui vang akharip leira. ²⁰Tabernaclewui kakhanevāk, atungshongwui vang, akom maga̱ sākhuira, ²¹kala aphei hangmati lupāsā eina, akom ava̱va̱wui vang aphei khanirip sākhuira. ²²Tabernacle khanukshongwui zingtunshong akom tharuk sākhuira, ²³kala tabernaclewui khanuk achithekli sangkhavai akom khani sākhuira. ²⁴Akom khani chi azing eina ngaphora, kala atungli akhui akhali ngarumhaira; chithek khaniwui vang, khanini ngaraichāda sāra. ²⁵Chithāda akom chishat kala lupāsā aphei tharāda tharuk leira; akom ava̱va̱wui azingli aphei khanini leira.

²⁶"Acaciathing eina phākashut sākhuira: tabernacle chiwui arāp akhawui akomwui vang phangā, ²⁷arāp akhavākwui akomwui vang phangā, kala tabernacle khanukshongwui zingtunshong akomwui vang phangā sāra. ²⁸Alungthungli kasanga phākashut chi akomwui vākatang khanini ungshung vāshungda sāra. ²⁹Akombing chi sinā eina heimitrorra, phākashut hokthāng khavai sināwui akhuibing sākhuira, kala phākashut chi sinā eina heimitrorra. ³⁰Kaphungli nali mangapeilak kahai kaphaning tākam eina tabernacle chi khaningkāra.

³¹"Mairār akha khamayinga, hungrisi, hungshi kahai kala manakta hākakhui kazaira̱ chonsā eina sākhuira; cherubim themlāk eina yeksangra. ³²Sinā eina rommithai kahai, acaciathing eina sākahai pākra̱ matili sinā hokkhui khavai eina chi hokthāngra; pākra̱ chi lupāsā aphei matili haira. ³³Mairār chi akhuibingwui zingli hokthāngra. Tuingashit oko chi mairārwui alungli khuizangra; mairār china kathara pam kala tharmathengmeikap kaje pam kaingasakra. ^a a v33 Mairār hina mibing chi tharmathengmeikap kaje pamwui eina kaingasak leisai, chi pam chili ithumwui Avā leisai; kha akhanukli chi rānkahaina awui mangāli vaikhavai shongfa shomihaira. ³⁴Tharmathengmeikap kaje pamli, lukhamashan pamkhong chi tuingashit oko tungli haira. ³⁵Kala nana table chi mairārwui ayar hailu, kala thaomeishong chi chili mai ngareingasungda tabernaclewui azingshong hailu, kala table chi atungshong hailu.

³⁶"Nana kachonshim khāmongwui vang chonrān akha sākhuira: khamayinga, hungrisi, kala hungshi kahai, kala manakta hākakhui kazaira̱, kapim eina aphor phorsanga. ³⁷Chonrān chiwui vang acaciathing eina pākra̱ phangā sākhuilaga sinā heimitrorra; chiwui hokkhui khavaibing sinā eina sāra, kala pithrai eina aphei phangā heikhuira."