ዘፀኣት 26 FHB Father's Heart Bible™

26 ¹“ነቲ ድንኳን ካብ ዓሰርተ መጋረጃታት ግበሮ፦ ብዝተፍሓሰ ሃርን ብሰማያዊ፥ ሓምራዊ፥ ውፁእ ቀይሕ ፈትልን፥ ብጥበበኛ ሰራሕተኛ ዝተጠልፉ ኪሩቤል ዝተሰርሐ ይኹን። ²ነፍሲ ወከፍ መጋረጃ ንውሓቱ ዕስራን ሾመንተን እመት፥ ወርዱ ኸዓ ኣርባዕተ እመት ይኹን፤ ኵሉ እቲ መጋረጃታት ሓደ ዓይነት ስፍሪ ይሃልዎ። ³ሓሙሽተ መጋረጃታት ንስንሳቱ ይጋጠም፤ እቲ ዝተረፈ ሓሙሽተ ድማ ንሕድሕዱ ይጋጠም። ⁴ኣብቲ ቐዳማይ ዝተጋጠመ ኣብ ጠርዚ እቲ ወሰናይ መጋረጃ፥ ብሰማያዊ ፈትሊ ቐለበታት ግበር፤ ኣብቲ ኻልኣይ ዝተጋጠመውን ከምኡ ግበር። ⁵ኣብቲ ቐዳማይ መጋረጃ ሓምሳ ቐለበታት ግበር፤ ኣብ ጠርዚ እቲ ኻልኣይ ዝተጋጠመ መጋረጃ ድማ ሓምሳ ቐለበታት ግበር፤ እቲ ቐለበታት ንሕድሕዱ ይራኸብ። ⁶ሓምሳ ቝልፊ ወርቂ ድማ ግበር፤ ነቲ መጋረጃታት በቲ ቝልፍታት ንስንሳቱ ኣጋጥሞ፤ እቲ ድንኳን ከዓ ሓደ ይኹን።

⁷“ኣብ ልዕሊ እቲ ድንኳን ዝኸውን መደረብታ፥ ካብ ፀጕሪ ጤል መጋረጃታት ግበር፤ ዓሰርተ ሓደ መጋረጃታት ይኹን። ⁸ኵሉ እቲ ዓሰርተ ሓደ መጋረጃታት ንውሓቱ ሰላሳ እመት፥ ወርዱ ኣርባዕተ እመት፥ ሓደ ዓይነት ስፍሪ ይኹን። ⁹ነቲ ሓሙሽተ መጋረጃታት ንበይኑ፥ ነቲ ሽዱሽተ ድማ ንበይኑ ኣጋጥሞ፤ ነታ ሻድሸይቲ መጋረጃ ኸዓ ኣብ ቅድሚ እቲ ድንኳን ድርብ ገይርካ ዕፀፋ። ¹⁰ኣብ ጠርዚ እቲ ቐዳማይ ዝተጋጠመ ወሰናይ መጋረጃ ሓምሳ ቐለበታት ግበር፤ ኣብ ጠርዚ እቲ ኻልኣይ ዝተጋጠመ መጋረጃ ድማ ሓምሳ ቐለበታት ግበር። ¹¹ሓምሳ ቝልፊ ነሃስ ግበር፤ ኣብቲ ቐለበታት ኣእትዮም ድማ ነቲ ድንኳን ኣጋጥሞ እሞ ሓደ ይኹን። ¹²እቲ ዝተረፈ ፈረቓ መጋረጃ እቲ ድንኳን፥ ኣብ ድሕሪት እቲ ድንኳን ተንጠልጢሉ ይተኣጎር። ¹³እቲ ዝተረፈ እመትን ፈረቓን መጋረጃ ድማ፥ ነቲ ድንኳን ብኽልቲኡ ወገኑ ምእንቲ ኽኸድኖ፥ ብሓደ ሸነኽን ብኻልኣይ ሸነኽን ተንጠልጢሉ ይተኣጎር። ¹⁴ነቲ ድንኳን ዝኸውን መኽደን ድማ ካብ ዝተቐረፀ ቘራብቲ ማጓሉ ግበረሉ፤ ኣብ ልዕሊኡ ኸዓ ካብ ልስሉስ ቈራብቲ መኽደን ግበረሉ።

¹⁵“ነቲ ድንኳን ካብ ዕንፀይቲ ሰራው ደው ዝብል ሉሕ ግበረሉ። ¹⁶ነፍሲ ወከፍ ሉሕ ንውሓቱ ዓሰርተ እመት፥ ስፍሓቱ ኸዓ እመትን ፈረቓን ይኹን። ¹⁷ነንሕድሕድ ሉሕ መጣምቲ ዝኾኑ ኸክልተ መተሓሓዚ ግበረሉ፤ ንዅሉ እቲ ሉሓት ድንኳን ከዓ ኸምኡ ግበሮ። ¹⁸ብወገን ደቡብ እቲ ድንኳን ዕስራ ሉሕ ግበር። ¹⁹ኣብ ትሕቲ እቲ ዕስራ ሉሕ ኣርብዓ እግሪ ብሩር ግበር፤ ኣብ ትሕቲ ሓደ ሉሕ ክልተ እግሪ፥ ንሓደ ጉጭ ሓደ እግሪ ይኹን። ²⁰ብኻልኣይ ወገን እቲ ድንኳን፥ ብወገን ሰሜን ድማ ዕስራ ሉሕ ግበር፤ ²¹ኣብ ትሕቲ ሓደ ሉሕ ከክልተ እግሪ ድማ፥ ኣርብዓ እግሪ ብሩር ግበር። ²²ብድሕሪ እቲ ድንኳን ብወገን ምዕራብ ድማ ሽዱሽተ ሉሕ ግበር፤ ²³ኣብቲ ድሕሪት ንዅርናዓቱ ኸዓ ክልተ ሉሕ ግበር። ²⁴ካብ ታሕቲ ጀሚሮም ድርብ ይኹኑ፤ ክሳዕ ላዕሊ ድማ ኣብ ሓደ ቀለበት ተጋጢሞም ይኹኑ፤ ንኽልቲኡ ኣብቲ ኽልተ ዅርናዕ ከምኡ ይኹን። ²⁵ስለዙይ ሸሞንተ ሉሕን እግሮም ብሩርን ይኹን፤ ዓሰርተ ሽዱሽተ እግሪ፥ ኣብ ትሕቲ ሓደ ሉሕ ክልተ እግሪ ይኹን።

²⁶“ብዕንፀይቲ ሰራው ጋድማት ግበር፤ ብሓደ ወገን እቲ ድንኳን ንዘሎ ሉሓት ሓሙሽተ፥ ²⁷ብኻልኣይ ወገኑ ንዘሎ ሉሓት ሓሙሽተ፥ ብድሕሪ እቲ ድንኳን ብወገን ምዕራብ ንዘሎ ሉሓት ድማ ሓሙሽተ ጋድም ግበር። ²⁸ነቲ ማእኸላይ ጋድም ድማ ብማእኸል እቲ ሉሓት ገይርካ፥ ካብቲ ሓደ ወሰን ናብቲ ሓደ ወሰን ከም ዝሓልፍ ግበሮ። ²⁹ነቲ ሉሓት ብወርቂ ለብጦ፤ ነቲ ጋድማት ዝኣትዎ ቐለበታት ድማ ብወርቂ ግበር፤ ነቲ ጋድማትውን ብወርቂ ለብጦ። ³⁰ነቲ ድንኳን ከምቲ ኣብቲ እምባ ዝተርኣየካ ምስሊ ገይርካ ኣቕሞ።

³¹“መጋረጃ ድማ ግበር፤ ብሰማያዊ፥ ሓምራዊ፥ ውፁእ ቀይሕ ፈትልን፥ ብዝተፍሓሰ ሃርን ይኹን፤ ብብልሓት ዝተጠልፉ ኪሩቤል ይገበሮ። ³²ኣብ ኣርባዕተ ብወርቂ ዝተለበጠ ኣዕምዲ ዕንፀይቲ ሰራው ሰቕሎ፤ መሰቓቐሊኡ ወርቂ ይኹን፤ ኣብ ኣርባዕተ እግሪ ብሩር ድማ ይተኸል። ³³ነቲ መጋረጃ ኣብ ትሕቲ እቲ ቝልፍታት ሰቕሎ፤ ነቲ ታቦት ኪዳን ድማ ናብ ድሕሪኡ ኣእትዎ፤ እቲ መጋረጃ ነቲ ቅዱስ ካብቲ ቅድስተ ቅዱሳን ይፈልዮ። ^a a v33 እዝ መጋረጃ እዙይ ነቲ ህዝቢ ካብቲ መንፈስ ኣቦና ዝዓረፈሉ ቅድስተ ቅዱሳን ይፈልዮ ነበረ፤ ድሕሪኡ ምቕዳዱ ኸዓ ናብ ህላውነቱ ናይ ምምላስ መንገዲ ከፈተ። ³⁴ነቲ መኽደን መስተስረዪ ድማ ኣብቲ ቅድስተ ቅዱሳን ኣብ ልዕሊ ታቦት ኪዳን ኣንብሮ። ³⁵ነቲ ጠረጴዛ ብወፃኢ እቲ መጋረጃ ግበሮ፤ ነቲ ቐዋሚ ቐንዲል ድማ ኣብ መንፅሩ ብወገን ደቡብ እቲ ድንኳን፥ ነቲ ጠረጴዛ ኸዓ ብወገን ሰሜን ግበሮ።

³⁶“ንኣፍ ደገ እቲ ድንኳን ድማ መጋረጃ ግበር፤ ብሰማያዊ፥ ሓምራዊ፥ ውፁእ ቀይሕ ፈትልን፥ ብዝተፍሓሰ ሃርን ዝተጠልፈ ይኹን። ³⁷ነቲ መጋረጃ ድማ ሓሙሽተ ኣዕምዲ ዕንፀይቲ ሰራው ግበረሉ፤ ብወርቂ ለብጦም፥ መሰቓቐሊኦም ከዓ ወርቂ ይኹን፤ ሓሙሽተ እግሪ ነሃስ ድማ ብፍሲ ግበረሎም።”