Jehoahaz pora Josiah laga jagah loise

Jaldi-jaldi char-jon raja, sob biya kaam kore, sob ke bondi kori kene loi jai — jitia tak amar Pitri laga doot khan ke hasi kora pora kunba upai nathake aru Jerusalem jolai jai. Mati tu sottor saal tar Bisram din khan mane, aru titia Tai Cyrus laga atma ke uthai diye, aru bondi khan ke upor jabole koi.

Adhyay 36.

Desh laga manuh khan pora Josiah laga putro Jehoahaz ke loi kene, tar pitri laga jagah te Jerusalem te tar ke raja bonaise. Jehoahaz raja hua homoi te tar teish saal umor thakise, aru tai Jerusalem te tin mohina raj korise. Egypt laga raja pora Jerusalem te tar ke raja laga pora hatai dise, aru desh uporte chandi 7,500 pound aru suna 75 pound laga jurimana lagaise. Egypt laga raja pora tar bhai Eliakim ke Judah aru Jerusalem uporte raja bonaise, aru tar nam Jehoiakim rakhise; aru Neco pora tar bhai Jehoahaz ke Egypt te loi jaise.

Jehoiakim pora Pitri laga age te biya kaam korise

Jehoiakim raja hua homoi te pochis saal umor thakise; tai Jerusalem te egaroh saal raj korise, aru amar Pitri laga suku te biya kaam korise. Babylon laga raja Nebuchadnezzar tar bhirodh te ahise, aru tar ke Babylon te loi jabole kansa laga sikli pora bandhi loise. Nebuchadnezzar pora amar Pitri laga ghor laga kisu saman bhi Babylon te loi jaise, aru eitu khan tar Babylon te thaka mondir te rakhise. Jehoiakim laga bakibo kaam khan, tar ghin lagi juwa kaam khan, aru tar bhirodh te thaka golti khan Israel aru Judah laga Raja khan laga Kitab te likha ase; aru tar putro Jehoiachin tar jagah te raj korise.

Jehoiachin laga chutu aru biya raj

Jehoiachin raja hua homoi te aath saal umor thakise; tai Jerusalem te tin mohina aru dos din raj korise, aru amar Pitri laga suku te biya kaam korise. Bosont homoi te, raja Nebuchadnezzar pora tar ke amar Pitri laga ghor pora daami saman khan logote Babylon te loi anise, aru Jehoiachin laga ghor manuh Zedekiah ke Judah aru Jerusalem uporte raja bonaise.

Zedekiah pora Pitri laga bhirodh te tar mon tan korise

Zedekiah raja hua homoi te ekuish saal umor thakise, aru tai Jerusalem te egaroh saal raj korise. Tai amar Pitri laga suku te biya kaam korise, aru amar Pitri laga mukh pora kotha kowa bhabobadi Jeremiah laga age te tai nijor ke niche nakorise. Tai raja Nebuchadnezzar laga bhirodh te bhi uthise, jun pora tar ke amar Pitri laga naam te kosom khilaise; aru tai tar gola tan korise aru tar mon tan korise, aru Israel laga Isor, amar Pitri usorte wapas jabole mana korise. Dangor purohit khan sob aru manuh khan arubi bisi bebiswas hoi jaise, aru sob desh khan laga ghin lagi juwa kaam khan nisina korise, aru amar Pitri pora Jerusalem te pobitro kora ghor ke letera kori dise.

Pitri laga bisar pora Jerusalem gir jaise

Amar Pitri, tarkhan laga baba khan laga Isor, pora Tar manuh khan aru Tar thaka jagah uporte morom kori kene, Tar khobor diya manuh khan dwara barbar kotha pathaise. Kintu tarkhan amar Pitri laga khobor diya manuh khan ke sorom dise, Tar kotha khan ke tuchha korise, Tar bhabobadi khan ke bodnam korise, jitia tak amar Pitri laga khong Tar manuh khan uporte eneka uthise, eku upai nathakise. ^a

Karone Tai Chaldea laga raja ke tarkhan laga bhirodh te anise, jun pora tarkhan laga pobitro jagah te talwar pora tarkhan laga jawan khan ke morai dise, aru kunba jawan chokra, kuwari chukri, bura manuh, nahole bisi bura manuh ke bhi chara nai. Amar Pitri pora tarkhan sob ke tar hath te di dise. Amar Pitri laga ghor laga sob saman khan, dangor aru chutu, amar Pitri laga ghor laga aru raja laga aru tar adhikari khan laga dhun sompoti—eitu sob tai Babylon te loi jaise. Tarkhan amar Pitri laga ghor ke jolai dise, Jerusalem laga deumali bhangai dise, eitu laga sob raj-ghor khan jolai dise, aru eitu bhitor te thaka sob daami jinis khan khotom kori dise. Talwar pora bachi juwa manuh khan ke tai Babylon te bondi kori kene loi jaise; aru Persia laga rajyo raj kora shuru nakora tak, tarkhan tai aru tar putro khan laga sewa korise, Jeremiah dwara amar Pitri laga kotha pura hobole: desh pora tar bisram din khan nilua tak, eitu khali pari thaka sob din te eitu aram korise, aru sottor saal pura korise. ^b

Pitri pora Cyrus laga mon jagai dise

Persia laga raja Cyrus laga prothom saal te, Jeremiah dwara amar Pitri laga kotha pura hobole, amar Pitri pora Persia laga raja Cyrus laga mon ke jagai dise, titia tai tar sob rajyo te prochar korise aru likha pora bhi rakhise: Persia laga raja Cyrus pora koi ase: “Sorgo laga Isor, Prabhu pora, prithibi laga sob rajyo moi ke dise, aru Judah desh laga Jerusalem te Tar nimite ekta ghor bona bole moi ke hukum dise. Tumikhan majot te Tar manuh khan kunba thakile—Prabhu tar laga Isor tar logote thaki bole dibi—aru tai uporte jabole dibi.”