Mvwilu ya Tata samu na Efalayime
Ndilu ya Efalayime ba ke landa katuka na Yeliko, na kizunga ya myongo tii na mubu, ti bambanza ya nkaka yina ba pesaka na kati ya kikunku ya Manase. Kikuma ke sukila na kundima mosi: ba-Kaanani yina vwandaka na Ngezele, ba kulaka bawu ve ata fyoti, kaka ba tulaka bawu na kisalu ya kingolo-ngolo.
16 1Dzeke ya bana ya Yosefi katukaka na nzadi ya Yolodani na Yeliko, na esete ya maza ya yawu, na kukwenda na yinsi ya kuyuma yina ke tombokaka katuka na Yeliko, na kizunga ya myongo tii na Betele. 2Yawu katukaka na Betele tii na Luze, mpe kwendaka na ndilu ya ba-Aleke na Atalote. 3Yawu kulumukaka na lweka ya wesete tii na ndilu ya ba-Yafelete, mpe tii na ndilu ya Bete-Wolone ya banda, na nima na Ngezele, mpe yawu sukaka na mubu.
4Na yina, bana ya Yosefi, Manase mpe Efalayime, bakaka mvwilu ya bawu. 5Bana ya Efalayime bakaka ndilu yayi mutindu kele makanda ya bawu: ndilu ya bawu ya esete katukaka na Atalote-Adale tii na Bete-Wolone ya Zulu. 6Ndilu yango kwendaka na mubu, Mikemetate vwandaka na lweka ya node; yawu balukaka na esete tii na Taanate-Silo, mpe lutaka na esete ya yawu tii na Yanowa. 7Na manima, yawu kulumukaka katuka na Yanowa tii na Atalote mpe Naala, yawu kumaka na Yeliko, mpe sukaka na Yolodani. 8Katuka na Tapuwa, ndilu yango kwendaka na wesete tii na muzumba ya Kana, mpe sukaka na mubu. Mvwilu yina bana ya kifumba ya Efalayime bakaka ni yayi, mutindu kele makanda ya bawu. 9Bana ya Efalayime vwandaka mpe na bambanza yina ba tulaka na lweka na kati ya difwa ya bana ya Manase, bambanza nyonso na babwala ya yawu. 10Kasi bawu bingisaka ve ba-Kaanani yina vwandaka na Ngezele; ba-Kaanani ke zinga tii bubu yayi na kati-kati ya bantu ya Efalayime, kasi ba kotisaka bawu na kusala bisalu ya ngolo.