Igai rĩa Ithe witũ kũrĩ Efiraimu
Mũhaka wa Efiraimu ũkĩgererwo kuuma Jeriko, ũgĩtuĩkanĩria bũrũri wa irĩma, nginya iria, na matũũra mangĩ makĩheanwo thĩinĩ wa igai rĩa Manase. Ũhoro ũkĩrĩkĩrĩria na kwĩyumbũra: Akanaani a Gezeri matiigana kũingatwo, no maahatĩrĩirio wĩra wa ũkombo.
16 1Igai rĩrĩa rĩacuukĩirwo njiaro cia Jusufu rĩambĩrĩirie Rũũĩ rwa Jorodani hakuhĩ na Jeriko, mwena wa irathĩro wa maaĩ makuo, rĩgĩthiĩ werũinĩ ũrĩa wambataga kuuma Jeriko ũgatuĩkanĩria bũrũri wa irĩma nginya Betheli. 2Naaguo ũgĩthiĩ kuuma Betheli nginya Luzu, ũgĩthiĩ mbere nginya mũhaka wa Aarigi kũu Atarothu. 3Ũgĩcooka ũgĩikũrũka na mwena wa ithũĩro nginya mũhaka wa Ajafuleti, ũgĩkinya mũhaka wa Bethi-horoni ũrĩa wa mũhuro, ũgĩthiĩ nginya Gezeri, naguo ũgĩthirĩra iriainĩ.
4Nĩ ũndũ ũcio njiaro cia Jusufu, nĩo Manase na Efiraimu, ikĩamũkĩra igai rĩacio. 5Naacio njiaro cia Efiraimu ciarĩ na bũrũri ũyũ kũringana na mbarĩ ciacio: mũhaka wacio wa mwena wa irathĩro wambĩrĩirie Atarothu-adari nginya Bethi-horoni ũrĩa wa igũrũ. 6Naaguo mũhaka ũgĩthiĩ nginya iria, naguo Mikimethathu warĩ mwena wa gathigathini; ũgĩcooka ũkĩĩhũgũra na mwena wa irathĩro ũgĩthiĩ Taanath-shilo, ũkĩhĩtũkĩra mwena wa irathĩro waguo ũgĩkinya Janoa. 7Ũgĩcooka ũgĩikũrũka kuuma Janoa nginya Atarothu na Naara, ũgĩkinya Jeriko, naguo ũgĩthirĩra Rũũĩinĩ rwa Jorodani. 8Kuuma Tapua mũhaka ũgĩthiĩ na mwena wa ithũĩro nginya Karũũĩ ka Kana, ũgĩthirĩra iriainĩ. Rĩĩrĩ nĩrĩo igai rĩa mũhĩrĩga wa njiaro cia Efiraimu, kũringana na mbarĩ ciacio. 9Ningĩ njiaro cia Efiraimu ciarĩ na matũũra manene marĩa maamũrĩtwo thĩinĩ wa igai rĩa njiaro cia Manase, namo nĩ matũũra mothe hamwe na tũtũũra twamo. 10No matiaingatire Akanaani arĩa maatũũraga Gezeri; nĩ ũndũ ũcio Akanaani matũũraga gatagatĩ ka Efiraimu nginya ũmũthĩ, no nĩmahatĩrĩirio marutage wĩra wa ũkombo.