Ephraimwui vang Avāwui shimlui
Ephraimwui ramkhong Jericho eina kaphung ram kathāda ngāphon sālak kathāhai, kala Manassehwui ngāsāngli khunga kahāngmayar pihai. Kaji ngāchāt eina kachāthai: Gezerli leikhalei Canaanmayar makakhayā maphāshok, kathāk sāmāk ngāsāhai tangkha.
16 1Josephwui naomayarabing vang ka̱lā yanglaga, thari chi Jericho ngalemli khalei Jordan, chiwui tara̱wui zingshoshong eina haophoklaga, kala Jerichowui eina shoklaga kaphungram pharonda Bethel vāshungda lamhāngshong tai. 2Chieina Bethelwui eina Luzshong tālaga, Ataroth khalei Archibingwui tharishong vai. 3Chiwui thili zingtunvāk vashumlaga Japhletbingwui thari, kala Khamaze Beth-horonwui thari, Gezer tāshungda vai, kala shamadru eina tanga.
4Chithāda Josephwui naomayarabing, Manasseh eina Ephraimna athumwui shimlui samphanga. 5Ephraim shangwui shimkhurwui athishurda leiret hina: athumwui zingshoshongwui thari Ataroth-addar eina thuilaga Ato Beth-horon vāshunga; 6Thari chi shamadru eina tanga, atungshong Mich-methath lei; kala thari chi zingshovāk kuivāda Taanath-shiloh vai, chiwui zingshoshong makānlaga Jan-oahli vāshunga; 7Chieina Jan-oahwui eina Ataroth kala Naarahshong vashumlaga, Jericholi tāza̱ra, Jordan eina tanga. 8Tappuahwui eina thari chi zingtunvāk Kanah kongshong vālaga, shamadru eina tanga. Hi Ephraim shangli athumwui shimkhurwui athishurda mikahai shimluina. 9Kala Manasseh naomayarabingwui shimlui alungli Ephraim naomayarabing vangla phaishok kahai keinung saikora, athumwui kha̱bing ngasoda leiya. 10Kha Gezerli khalei Canaannaobingli athumna makashamana; chithāda Canaannaobingna aja eina tangda Ephraimwui lungli pānruma, kala thoukai kaphunga sāngasaka.
