Kimvwama kya Tata kikuma kya Efwayimi
Mikinda mya Efwayimi misi diatwa tuka ku Yediko, mu malondi, tii ku yanga dya mbuta, yi mavula mana básya mu kingenga mukati dya kimvwama kya Manase. Zeki disi manisa yi mazu ma kudikwikila: bisi Kanana ba ku Ngezele bakukwaswaku ata lumosi, kaka bábetwa mu kisalu kya kingolu-ngolu.
16 1Zeki dya bana ba Yozefu dyátuka ku Yolutani bela-bela yi Yediko, ku Kola kwa mamba mandi, amana dyákota mu nganga, dyátombuka tuka ku Yediko, mu malondi, yi kuna Betele. 2Dyáhita tuka ku Betele yi kuna Luzi, amana dyáhita ku kufula kya bisi Aleki ku Atalota. 3Dyákulumuka ku ndamba yi kuna kufula kya bisi Yafeleti, yi kuna kufula kya Beti-Holoni dya ha tsi, yi kuna Ngezele, amana dyámanisa ku yanga dya mbuta.
4Buna bana ba Yozefu, disongidila Manase yi Efwayimi, bátambula kimvwama kya bawu. 5Bana ba Efwayimi, mu makanda ma bawu, báyukila kinzunga kyaki: kufula kya bawu kya Kola dyátuka ku Atalota-Adali yi kuna Beti-Holoni dya ku zilu. 6Kufula dyáhita ku yanga dya mbuta, amana Mikimetati wenina ku londi; dyábaluka ku Kola yi kuna Tanati-Silo, dyáhita ku Kola kwandi yi kuna Yanowa. 7Amana dyákulumuka tuka ku Yanowa yi kuna Atalota yi Naala, dyátula ku Yediko, amana dyámanisa ku Yolutani. 8Tuka ku Tapuwa kufula dyáhita ku ndamba yi kuna nzadi ya Kana, amana dyámanisa ku yanga dya mbuta. Kyaki kyenina kimvwama kya kanda dya bana ba Efwayimi, mu makanda ma bawu. 9Bana ba Efwayimi phi báyukila mavula mana básya mu kingenga mukati dya kimvwama kya bana ba Manase, mavula moosu yi mahata ma mawu. 10Kaasi bana ba Efwayimi bákulaku bisi Kanana bana bazínga mu Ngezele; bisi Kanana bazínga kedi hana kati dya bana ba Efwayimi yi kuna lelu dyadi, bawu básya mu bisalu bya kingolu-ngolu.
