ኢያሱ 16 FHB Father's Heart Bible™

16 ¹እቲ ዕፃ ደቂ ዮሴፍ ካብ ፈለግ ዮርዳኖስ ኣብ ኢያሪኮ፥ ብምብራቕ ማያት ኢያሪኮ፥ ናብ ምድረ በዳ፥ ካብ ኢያሪኮ በቲ ደጕዓ ደዪቡ ናብ ቤቴል ኣቢሉ ኸደ። ²ካብ ቤቴል ድማ ናብ ሎዛ ወፂኡ፥ ናብ ወሰን ኣርካዊ ኣብ ዓጣሮት ይሓልፍ። ³ንምዕራብ ኣቢሉ ናብ ወሰን ያፍሌጣውያን፥ ናብ ወሰን ታሕተዋይ ቤትሖሮን፥ ናብ ጌዘር ይወርድ፤ መውፅኢኡ ኸዓ ኣብ ባሕሪ ኮነ።

⁴ስለዙይ ደቂ ዮሴፍ፥ ማለት ምናሴን ኤፍሬምን፥ ርስቶም ወረሱ። ⁵ወሰን ደቂ ኤፍሬም ከከም ዓሌቶም እዙይ ነበረ፦ ናይ ምብራቕ ወሰኖም ካብ ዓጣሮትኣዳር ክሳዕ ላዕለዋይ ቤትሖሮን ኮነ። ⁶እቲ ወሰን ናብ ባሕሪ ይወፅእ፤ ሚክመታት ድማ ብሰሜን ኮነት። እቲ ወሰን ከዓ ንምብራቕ ናብ ታዓናትሴሎ ይዘውር፤ ብምብራቓ ሓሊፉ ናብ ያኖሓ ይሓልፍ። ⁷ካብ ያኖሓ ድማ ናብ ዓጣሮትን ናዓራን ይወርድ፤ ናብ ኢያሪኮ በፂሑ ኸዓ ናብ ዮርዳኖስ ይውፅእ። ⁸ካብ ታጱዋ እቲ ወሰን ንምዕራብ ናብ ሩባ ቓና ይሓልፍ፤ መውፅኢኡ ኸዓ ኣብ ባሕሪ ኮነ። እዙይ ርስቲ ነገድ ደቂ ኤፍሬም ከከም ዓሌቶም እዩ። ⁹ደቂ ኤፍሬም ድማ ኣብ ማእኸል ርስቲ ደቂ ምናሴ ዝተፈለያ ኸተማታት ነበራኦም፤ ኵለን እተን ከተማታት ምስ ቍሸታተን። ¹⁰ነቶም ኣብ ጌዘር ዝነብሩ ከነዓናውያን ግና ኣየውፅእዎምን፤ እቶም ከነዓናውያን ክሳዕ ሎሚ ኣብ ማእኸል ኤፍሬም ይነብሩ ኣለዉ፤ ተገዲዶም ድማ ይሰርሑ ኣለዉ።