Mûsa û Rihspî Diaxivin
Ji Çemê Şerîayê derbas bibe, kevirên mezin bi kilsê sipî bike, û vê Şerîetê bi zelalî li ser wan binivîse; gorîgeha Bavê xwe ji kevirên netaşî ava bike û li wir qurbanên aştiyê bixwe. Paşê şeş eşîr li ser Gerîzîmê û şeş li ser Eybalê, gava ku Lêwî diwanzdeh nifiran didin dengkirin û hemû gel bersiv didin Amîn.
27 1Mûsa û rihspiyên Îsraêl li gel emir kir: “Hemû emrên ku ez îro didim we bînin cih. 2Gava hûn ji Çemê Şerîayê derbasî welatê ku Bavê we dide we bibin, kevirên mezin rakin û wan bi kilsê sipî bikin. 3Gava hûn derbas bibin, hemû gotinên vê Şerîetê li ser wan binivîsin, da ku hûn bikevin welatê ku Bavê we dide we. Ew welatekî ye ku şîr û hingiv jê diherike, wek ku Bavê me soz daye we. 4Gava hûn ji Çemê Şerîayê derbas bibin, wek ku ez îro li we emir dikim, van keviran li ser Çiyayê Eybalê rakin û wan bi kilsê sipî bikin. a a v4 Çiyayê Eybalê û Çiyayê Gerîzîmê du çiyayên cêwî ne, ku li herdu aliyên bajarê Şekemê, li navenda Kenanê ne. Di merasîma peymanê de bereket li ser yekî û lanet li ser yê din hat danîn. 5Li wir ji Bavê we re gorîgehekê ava bikin, gorîgeheke ji keviran; bila tu amûreke hesinî li wan nekeve. 6Gorîgeha Bavê we bi kevirên netaşî ava bikin û li ser wê ji Bavê we re qurbanên şewitandinê pêşkêş bikin. 7Divê hûn li wir qurbanên aştiyê serjê bikin û wan bixwin û li ber Bavê we şa bibin. 8Û divê hûn hemû gotinên vê Şerîetê pir bi zelalî li ser keviran binivîsin.”
Hûn Gelê Wî ne
9Mûsa û kahînên Lêwî ji hemû Îsraêl re got: “Ey Îsraêl, bêdeng bin û guhdarî bikin. Îro hûn bûn gelê Bavê we. 10Guhdariya Bavê we bikin û emr û qaydeyên wî yên ku ez îro li we emir dikim bînin cih.”
11Mûsa di heman rojê de li gel emir kir: 12“Piştî ku hûn ji Çemê Şerîayê derbas bibin, ev wê li ser Çiyayê Gerîzîmê bisekinin, da ku gel pîroz bikin: Şimûn, Lêwî, Cihûda, Îsaxar, Ûsiv û Binyamîn. 13Û ev wê ji bo lanetê li ser Çiyayê Eybalê bisekinin: Rûben, Gad, Aşer, Zebûlûn, Dan û Naftalî. 14Û Lêwî wê bi dengekî bilind gazî hemû gelê Îsraêl bikin: 15‘Lanet li wî kesî be yê ku pûtekî dikole an dirijîne, tiştekî ku Bavê me jê nefret dike û karê destên hosteyekî ye, û bi dizî datîne.’ Divê hemû gel bersiv bide: ‘Amîn.’”
16‘Lanet li wî kesî be yê ku bavê xwe an diya xwe sivik dike.’ Hemû gel dibêje: ‘Amîn.’
17‘Lanet li wî kesî be yê ku kevirê sînorê cîranê xwe diguhêze.’ Û divê hemû gel bibêje: ‘Amîn.’
18‘Lanet li wî kesî be yê ku li ser rê kesekî kor şaş dike.’ Divê hemû gel bibêje: ‘Amîn.’
19‘Lanet li wî kesî be yê ku dadê li xerîb, sêwî an jinebiyê xwar dike.’ Hemû gel wê bibêje: ‘Amîn.’
20Lanet li wî kesî be yê ku bi jina bavê xwe re radizê, çimkî wî heqê zewaca bavê xwe şikand. Divê hemû gel bibêje: ‘Amîn.’
21‘Lanet li wî kesî be yê ku bi heywanekî re radizê.’ Û divê hemû gel bibêje: ‘Amîn.’
22‘Lanet li wî kesî be yê ku bi xwişka xwe re, bi qîza bavê xwe an bi qîza diya xwe re radizê.’ Divê hemû gel bibêje: ‘Amîn.’
23‘Lanet li wî kesî be yê ku bi xesûya xwe re radizê.’ Û divê hemû gel bibêje: ‘Amîn.’
24‘Lanet li wî kesî be yê ku cîranê xwe bi dizî dikuje.’ Û divê hemû gel bibêje: ‘Amîn.’
25‘Lanet li wî kesî be yê ku bertîlê distîne, da ku mirovekî bêsûc bikuje.’ Hemû gel dibêje: ‘Amîn.’
26‘Lanet li wî kesî be yê ku gotinên vê Şerîetê nagire û bi cih nayne.’ Divê hemû gel bibêje: ‘Amîn.’ b b v26 Pawlos vê ayetê di Galatî 3:10 de bi kar tîne, da ku nîşan bide ku her kesê ku xwe dispêre girtina Şerîetê dikeve bin lanetê. Îsa ev lanet rakir, gava ku li ser xaçê ji bo me bû lanet (Galatî 3:13).
