Ezekiyel 18 FHB Father's Heart Bible™

18 ¹Maganar Ubanmu ta zo mini, ta ce,

²“Me ya sa kuke maimaita wannan karin magana a kan ƙasar Isra'ila, cewa, ‘Iyaye sun ci 'ya'yan inabi masu tsami, haƙoran 'ya'ya kuwa suka yi ƙaiƙayi’?

³“Muddin ina raye, in ji Ubanmu Mai Iko Duka, ba za ku ƙara yin amfani da wannan karin magana a cikin Isra'ila ba. ⁴‘Kowane rai nawa ne, na iyaye da na ɗa duka. Wanda ya yi zunubi, shi ne zai mutu. ⁵A ce akwai mutum mai adalci wanda yake yin abin da yake daidai da na gaskiya. ⁶Ba ya ci a wuraren tsafi na kan duwatsu, ba kuwa ya kalli gumakan gidan Isra'ila. Ba ya yin zina da matar maƙwabcinsa, ba kuwa ya kwana da mace a lokacin al'adarta. ⁷Ba ya cutar da kowa, sai dai yakan mayar da jingina da ya karɓa saboda bashi. Ba ya yin fashi, sai dai yakan ba wa mai yunwa abincinsa, yakan kuma rufe tsirara da tufafi. ⁸Ba ya ba da rance da ruwa, ba kuwa ya karɓi riba, sai dai yakan kame kansa daga aikata laifi, yakan kuma yi shari'a ta gaskiya tsakanin mutum da wani.’ ⁹Yana bin ƙa'idodina, yana kuma kiyaye dokokina da aminci. Mutumin nan mai adalci ne; lalle zai rayu, in ji Ubanmu Mai Iko Duka.

¹⁰“A ce yana da ɗa mai hargitsi wanda yake zub da jini, ko kuma yă yi wani abu daga cikin waɗannan abubuwa. ¹¹(ko da yake mahaifin bai yi ko ɗaya daga cikin waɗannan ba): yakan ci a wuraren tsafi na kan duwatsu, yana ƙazantar da matar maƙwabcinsa, ¹²yana cutar da matalauta da masu bukata, yana yin fashi, ba ya mayar da jingina da ya karɓa, yana kuma kallon gumaka, yana kuma aikata abubuwa masu banƙyama. ¹³Yana ba da rance da ruwa, yana kuma karɓar riba. Irin wannan mutum zai rayu? A'a, ba zai rayu ba! Domin ya aikata dukan waɗannan abubuwa masu banƙyama, lalle za a kashe shi, alhakin jininsa kuma zai komo kansa.

¹⁴“Amma a ce wannan ɗa ya haifi ɗa wanda ya ga dukan zunuban mahaifinsa, bayan ya gan su kuwa, bai aikata ko ɗaya daga cikinsu ba: ¹⁵Ba ya ci a wuraren tsafi na kan duwatsu, ba kuwa ya kalli gumakan gidan Isra'ila. Ba ya yin zina da matar maƙwabcinsa. ¹⁶Ba ya cutar da kowa, ba kuwa ya karɓi jingina saboda bashi. Ba ya yin fashi, sai dai yakan ba wa mai yunwa abincinsa, yakan kuma rufe tsirara da tufafi. ¹⁷Yakan kame kansa daga aikata laifi, ba ya karɓar ruwa ko riba. Yana kiyaye dokokina, yana kuma bin ƙa'idodina. Ba zai mutu saboda zunubin mahaifinsa ba; lalle zai rayu.

¹⁸“Amma mahaifinsa zai mutu saboda zunubinsa: ya yi matsin zalunci, ya yi wa ɗan'uwansa fashi, ya kuma aikata mugunta a cikin mutanensa.

¹⁹“Duk da haka kuna tambaya, ‘Me ya sa ɗa ba ya ɗaukar alhakin laifin mahaifinsa?’ Tun da ɗan ya aikata abin da yake daidai da na gaskiya, ya kuma kiyaye dukan ƙa'idodina da kyau, lalle zai rayu. ²⁰Wanda ya yi zunubi, shi ne zai mutu. Ɗa ba zai ɗauki alhakin laifin mahaifinsa ba, uba kuma ba zai ɗauki na ɗansa ba. Kyautatawar mai adalci za ta kasance a kansa; muguntar mugu kuma za ta kasance a kansa.

²¹“Amma in mugu ya juyo daga dukan zunubansa, ya kiyaye dukan ƙa'idodina, ya kuma aikata abin da yake daidai da na gaskiya, lalle zai rayu, ba zai mutu ba. ²²Ba za a ƙara tuna da ko ɗaya daga cikin laifofin da ya aikata ba; saboda nagartar da ya yi, zai rayu.’ ²³Ina jin daɗin mutuwar mugu ne, in ji Ubanmu Mai Iko Duka? Ba zan fi so yă juyo daga hanyoyinsa yă rayu ba? ^a a v23 Ubanmu ba ya jin daɗin hallakar kowa. Abin da yake marmari a zuci shi ne, wanda ya ɓace yă juyo yă komo gida zuwa ga rai.

²⁴“Amma in mai adalci ya juya daga adalcinsa, ya yi zunubi, ya kuma aikata irin abubuwa masu banƙyama da mugu yake yi, zai rayu? Ba za a tuna da ko ɗaya daga cikin ayyukan adalcinsa ba. Saboda rashin amincinsa da zunubansa, zai mutu.

²⁵“Duk da haka kuna cewa, ‘Hanyar Ubanmu ba ta da adalci.’ Ku saurara, ya gidan Isra'ila. Hanyata ce ba ta da adalci? Ashe, ba hanyoyinku ba ne marasa adalci? ²⁶In mai adalci ya juya daga adalcinsa, ya aikata mugunta, zai mutu saboda haka; saboda muguntar da ya aikata, zai mutu. ²⁷Amma in mugu ya juyo daga muguntar da ya aikata, ya kuma aikata abin da yake daidai da na gaskiya, zai ceci ransa. ²⁸Domin ya lura da dukan laifofinsa, ya kuma juyo daga gare su, lalle zai rayu, ba zai mutu ba. ²⁹Duk da haka gidan Isra'ila yana cewa, ‘Hanyar Ubanmu ba ta da adalci.’ Hanyoyina ne marasa adalci, ya gidan Isra'ila? Ashe, ba hanyoyinku ba ne marasa adalci?’

³⁰“Saboda haka zan yi muku shari'a, ya gidan Isra'ila, kowa bisa ga hanyoyinsa, in ji Ubanmu Mai Iko Duka. Ku tuba! Ku juyo daga dukan laifofinku, domin kada zunubi yă zama sanadin hallakarku. ³¹Ku yar da dukan zunuban da kuka aikata; ku yi wa kanku sabuwar zuciya da sabon ruhu. Me ya sa za ku mutu, ya gidan Isra'ila? ³²Gama ba na jin daɗin mutuwar kowa, in ji Ubanmu Mai Iko Duka. Saboda haka ku juyo, ku rayu!”