எசேக்கியேல் 18

18 ¹எங்கள் பிதாவின் வார்த்தை எனக்கு உண்டாயிற்று:

²“இஸ்ரவேல் தேசத்தைக்குறித்து, ‘பெற்றோர் புளிப்பான திராட்சப்பழங்களைத் தின்றார்கள், பிள்ளைகளின் பற்கள் கூசிப்போயின’ என்று நீங்கள் இந்தப் பழமொழியை ஏன் திரும்பத் திரும்பச் சொல்லுகிறீர்கள்?

³“நான் என் ஜீவனைக்கொண்டு சொல்லுகிறேன், நீங்கள் இனி இஸ்ரவேலில் இந்தப் பழமொழியைச் சொல்லமாட்டீர்கள் என்று ஆண்டவராகிய பிதா சொல்லுகிறார். ⁴‘எல்லா ஜீவன்களும் என்னுடையவைகள்; பெற்றோரின் ஜீவனும் பிள்ளையின் ஜீவனும் ஒருங்கே என்னுடையவைகள். பாவம் செய்கிற ஆத்துமாவே சாகும். ⁵நியாயமும் நீதியும் செய்கிற நீதிமான் ஒருவன் இருந்தால், ⁶அவன் மலைமேல் இருக்கிற மேடைகளில் புசிக்காமலும், இஸ்ரவேல் வம்சத்தாரின் விக்கிரகங்களை நோக்கிப் பாராமலும், அவன் தன் அயலானுடைய மனைவியோடே விபசாரம் செய்யாமலும், மாதவிடாய் காலத்திலிருக்கிற ஸ்திரீயைச் சேராமலும், ⁷அவன் ஒருவனையும் ஒடுக்காமல், கடனுக்காக வாங்கிய அடகைத் திரும்பக் கொடுத்து, கொள்ளையிடாமல், பசியாயிருக்கிறவனுக்குத் தன் அப்பத்தைக் கொடுத்து, நிர்வாணமாயிருக்கிறவனுக்கு வஸ்திரம் தரிப்பித்து, ⁸அவன் வட்டிக்குக் கொடாமலும், பொலிசை வாங்காமலும், அநியாயத்தைவிட்டுத் தன் கையை விலக்கி, மனிதனுக்கும் மனிதனுக்கும் நடுவே உண்மையாய் நியாயந்தீர்த்தும், ⁹என் கட்டளைகளில் நடந்து, என் நியாயங்களை உண்மையாய்க் கைக்கொள்ளுகிறவனாயும் இருந்தால், அவனே நீதிமான்; அவன் நிச்சயமாய்ப் பிழைப்பான் என்று ஆண்டவராகிய பிதா சொல்லுகிறார்.

¹⁰“இரத்தம் சிந்துகிறவனும், இவைகளில் ஒன்றைச் செய்கிறவனுமான கொடூரமான மகன் ஒருவன் அவனுக்கு இருந்தால்; ¹¹(தகப்பன் இவைகளில் ஒன்றையும் செய்யாதிருந்தும்) அவன் மலைமேடைகளில் புசித்து, தன் அயலானுடைய மனைவியைத் தீட்டுப்படுத்தி, ¹²சிறுமையும் எளிமையுமானவனை ஒடுக்கி, கொள்ளையிட்டு, அடகாக வாங்கினதைத் திரும்பக் கொடாமல், விக்கிரகங்களை நோக்கிப்பார்த்து, அருவருப்பானவைகளைச் செய்து, ¹³அவன் வட்டிக்குக் கொடுத்து, பொலிசை வாங்கினால், அவன் பிழைப்பானோ? பிழைக்கமாட்டான்! இந்த அருவருப்பானவைகளையெல்லாம் செய்தபடியால், அவன் நிச்சயமாய் மரணமடைவான்; அவனுடைய இரத்தப்பழி அவன் தலையின்மேல் இருக்கும்.

¹⁴“இதோ, இவன் ஒரு மகனைப் பெற்றால், அந்த மகன் தன் தகப்பன் செய்த எல்லாப் பாவங்களையும் கண்டு, அவைகளைக் கண்டும் அவைகளில் ஒன்றையும் செய்யாமல், ¹⁵அவன் மலைமேல் இருக்கிற மேடைகளில் புசியாமலும், இஸ்ரவேல் வம்சத்தாரின் விக்கிரகங்களை நோக்கிப் பாராமலும், தன் அயலானுடைய மனைவியோடே விபசாரம் செய்யாமலும், ¹⁶அவன் ஒருவனையும் ஒடுக்காமலும், அடகு வாங்காமலும், கொள்ளையிடாமலும், பசியாயிருக்கிறவனுக்குத் தன் அப்பத்தைக் கொடுத்து, நிர்வாணமாயிருக்கிறவனுக்கு வஸ்திரம் தரிப்பித்து, ¹⁷அவன் அநியாயத்தைவிட்டுத் தன் கையை விலக்கி, வட்டியையும் பொலிசையையும் வாங்காமல், என் நியாயங்களைச் செய்து, என் கட்டளைகளில் நடந்தால், அவன் தன் தகப்பனுடைய அக்கிரமத்தினிமித்தம் சாகாமல், நிச்சயமாய்ப் பிழைப்பான்.

¹⁸“அவனுடைய தகப்பனோ, கொடுமையாய் ஒடுக்கி, தன் சகோதரனைக் கொள்ளையிட்டு, தன் ஜனத்தின் நடுவே தகாததைச் செய்தபடியினால், தன் அக்கிரமத்திலே சாவான்.

¹⁹“ஆனாலும் நீங்கள்: ‘மகன் தகப்பனுடைய அக்கிரமத்தைச் சுமக்காதிருப்பானேன்?’ என்கிறீர்கள். மகன் நியாயமும் நீதியும் செய்து, என் கட்டளைகளையெல்லாம் கவனமாய்க் கைக்கொண்டானே; அவன் நிச்சயமாய்ப் பிழைப்பான். ²⁰பாவஞ்செய்கிற ஆத்துமாவே சாகும். மகன் தகப்பனுடைய அக்கிரமத்தைச் சுமப்பதுமில்லை, தகப்பன் மகனுடைய அக்கிரமத்தைச் சுமப்பதுமில்லை; நீதிமானுடைய நன்மை அவன்மேல் இருக்கும், துன்மார்க்கனுடைய தீமை அவன்மேல் இருக்கும்.

²¹“துன்மார்க்கனோ, தான் செய்த எல்லாப் பாவங்களையும் விட்டுத் திரும்பி, என் கட்டளைகளையெல்லாம் கைக்கொண்டு, நியாயமும் நீதியும் செய்வானாகில், அவன் சாகாமல் நிச்சயமாய்ப் பிழைப்பான். ²²அவன் செய்த எல்லா மீறுதல்களும் அவனுக்கு விரோதமாய் நினைக்கப்படுவதில்லை; அவன் செய்த நீதியினிமித்தம் பிழைப்பான். ²³துன்மார்க்கனுடைய மரணத்தில் எனக்கு விருப்பம் உண்டோ? அவன் தன் வழிகளைவிட்டுத் திரும்பிப் பிழைப்பதே அல்லவோ எனக்கு விருப்பம் என்று ஆண்டவராகிய பிதா சொல்லுகிறார். ^a a v23 எங்கள் பிதா ஒருவருடைய அழிவிலும் மகிழ்ச்சி கொள்ளுகிறதில்லை. வழிதவறிப் போனவன் திரும்பி, ஜீவனுக்கு வீடு திரும்பிவரவேண்டும் என்பதே அவருடைய ஆழமான விருப்பம்.

²⁴“ஆனால் நீதிமான் தன் நீதியைவிட்டுத் திரும்பி, அநியாயஞ்செய்து, துன்மார்க்கன் செய்கிற எல்லா அருவருப்புகளின்படியும் செய்வானாகில், அவன் பிழைப்பானோ? அவன் செய்த நீதிகளில் ஒன்றும் நினைக்கப்படுவதில்லை; அவன் செய்த துரோகத்தினிமித்தமும் அவன் செய்த பாவங்களினிமித்தமும் அவன் சாவான்.

²⁵“ஆனாலும் நீங்கள்: ‘எங்கள் பிதாவின் வழி செம்மையானதல்ல’ என்கிறீர்கள். இஸ்ரவேல் வம்சத்தாரே, கேளுங்கள்: என் வழி செம்மையற்றதோ? உங்கள் வழிகளல்லவோ செம்மையற்றவைகள்? ²⁶நீதிமான் தன் நீதியைவிட்டுத் திரும்பி, அநியாயஞ்செய்து, அதிலே செத்தால், அவன் செய்த தன் அநியாயத்தினிமித்தமே சாவான். ²⁷துன்மார்க்கன் தான் செய்த துன்மார்க்கத்தைவிட்டுத் திரும்பி, நியாயமும் நீதியும் செய்வானாகில், அவன் தன் ஆத்துமாவை உயிரோடே காப்பாற்றுவான். ²⁸அவன் அதைச் சிந்தித்து, தான் செய்த எல்லா மீறுதல்களையும் விட்டுத் திரும்புகிறபடியால், அவன் சாகாமல் நிச்சயமாய்ப் பிழைப்பான். ²⁹ஆனாலும் இஸ்ரவேல் வம்சத்தார்: ‘எங்கள் பிதாவின் வழி செம்மையானதல்ல’ என்கிறார்கள். இஸ்ரவேல் வம்சத்தாரே, என் வழிகள் செம்மையற்றவைகளோ? உங்கள் வழிகளல்லவோ செம்மையற்றவைகள்?

³⁰“ஆகையால் இஸ்ரவேல் வம்சத்தாரே, நான் உங்களில் அவனவனை அவனவன் வழிகளுக்குத்தக்கதாய் நியாயந்தீர்ப்பேன் என்று ஆண்டவராகிய பிதா சொல்லுகிறார். மனந்திரும்புங்கள்! பாவம் உங்களுக்கு அழிவுக்கு ஏதுவாகாதபடிக்கு, உங்கள் எல்லா மீறுதல்களையும் விட்டுத் திரும்புங்கள். ³¹நீங்கள் செய்த உங்கள் எல்லா மீறுதல்களையும் உங்களைவிட்டு எறிந்துவிட்டு, உங்களுக்குப் புது இருதயத்தையும் புது ஆவியையும் உண்டாக்கிக்கொள்ளுங்கள்; இஸ்ரவேல் வம்சத்தாரே, நீங்கள் ஏன் சாகவேண்டும்? ³²மரிக்கிறவனுடைய மரணத்தில் எனக்கு விருப்பமில்லை என்று ஆண்டவராகிய பிதா சொல்லுகிறார்; ஆகையால் திரும்புங்கள், பிழையுங்கள்!”