Hannatu Ta Yi Murna a cikin Ubanmu

Hannatu ta rera cewa Ubanmu yakan wofinta masu ƙoshi ya kuma ƙosar da masu yunwa, yakan kashe ya kuma rayar. A halin yanzu 'ya'yan Eli suna satar nama daga hadayu suna kuma kwana da matan da suke a bakin alfarwa, Eli kuwa tsawatarwa kawai yake yi. Wani annabi ya sanar da ƙarshen gidansa.

Babi na 2.

Hannatu ta yi addu'a ta ce, “Zuciyata tana farin ciki a cikin Ubana; ƙahona ya ɗaukaka a cikin Ubana. Bakina yana magana gabagadi a kan maƙiyana, gama ina murna da cetonka.

“Babu mai tsarki kamar Ubanmu; babu wani sai kai; babu dutse kamar Ubanmu.

“Kada ku ƙara yin magana da girman kai sosai; kada girman kai ya fito daga bakinku, gama Ubanmu shi ne Ubanmu na sani, kuma da shi ake auna ayyuka.

An karya bakkunan jarumawa, amma an ƙarfafa waɗanda suka yi tuntuɓe da ƙarfi.

Waɗanda suke ƙoshi a dā sun zama masu aikin ijara domin abinci, amma waɗanda suke jin yunwa ba sa ƙara jin yunwa. Bakararriya ta haifi bakwai, amma wadda take da 'ya'ya masu yawa ta kaɗaita.

Ubanmu yana kashewa, yana kuma rayarwa; yana saukarwa zuwa kabari, yana kuma tayarwa.

Ubanmu yana talautarwa, yana kuma wadatarwa; yana ƙasƙantarwa, yana kuma ɗaukakawa.

Yana tā da matalauci daga ƙura, yana kuma ɗaga mabukaci daga juji, domin yă zaunar da su tare da sarakuna yă kuma ba su kursiyin daraja. Gama ginshiƙan duniya na Ubanmu ne, a kansu kuma ya kafa duniya.

“Yana kiyaye ƙafafun amintattunsa, amma miyagu za su yi shiru cikin duhu; gama ba da ƙarfi ba ne kowa yake yin nasara.

Za a ragargaza waɗanda suke gāba da Ubanmu; zai yi tsawa a kansu daga Sama. Ubanmu zai hukunta iyakokin duniya; zai ba sarkinsa ƙarfi zai kuma ɗaga ƙahon shafaffensa sama.”

Sai Elkana ya tafi gidansa a Rama, amma yaron yana yi wa Ubanmu hidima a gaban Eli firist.

'Ya'yan Eli Marasa Amfani

'Ya'yan Eli kuwa mutane banza ne; ba su san Ubanmu ba. ^a Ga al'adar firistoci da mutane: duk sa'ad da wani ya yi hadaya, bawan firist yakan zo lokacin da ake tafasa nama, riƙe da cokali mai yatsu uku a hannu. Yakan soka shi cikin tukunya, ko kasko, ko tukunyar tagulla, ko kwano; duk abin da cokalin ya fito da shi, firist yakan karɓe shi wa kansa. Haka suka yi wa dukan Isra'ilawa da suke zuwa Shilo. Har ma kafin a ƙone kitsen, bawan firist yakan zo yă ce wa mai yin hadaya, “Ka ba da nama don a gasa wa firist—ba zai karɓi dafaffen nama ba, sai ɗanye.”

In mutumin ya ce, “A fara ƙone kitsen, sa'an nan ka ɗauki abin da kake so,” sai yă amsa, “A'a, ka ba da shi yanzu, in ba haka ba zan ƙwace shi.” Zunubin matasan nan ya yi girma ƙwarai a gaban Ubanmu, gama sun rena hadayar Ubanmu. Amma Sama'ila yana hidima a gaban Ubanmu, yaro saye da efod na lilin. ^b Kowace shekara mahaifiyarsa takan yi masa ƙaramar riga tă kuma kawo masa sa'ad da take hawa tare da mijinta domin hadaya ta shekara-shekara. Eli yakan sa wa Elkana da matarsa albarka yana cewa, “Bari Ubanmu yă ba ka zuriya ta wurin wannan mace a maimakon abin da ta roƙa gare shi tă kuma ba Ubanmu.” Sa'an nan su koma gida. Ubanmu ya kula da Hannatu; ta yi ciki ta haifi 'ya'ya maza uku da mata biyu. Yaron nan Sama'ila kuwa ya yi girma a gaban Ubanmu.

Eli ya tsufa ƙwarai. Yana ta jin duk abin da 'ya'yansa suke yi wa dukan Isra'ila, da kuma yadda suke kwana da matan da suke hidima a bakin ƙofar Tentin Sujada. Ya tambaye su, “Me ya sa kuke yin haka? Ina jin mugayen ayyukanku daga bakin dukan waɗannan mutane. A'a, 'ya'yana; rahoton da nake ji ba shi da kyau—yana yaɗuwa a cikin mutanen Ubanmu. In mutum ya yi wa wani zunubi, Ubanmu zai iya shiga tsakani dominsa. Amma in mutum ya yi wa Ubanmu zunubi, wa zai iya yin roƙo domin mai zunubi? Duk da haka ba su saurari muryar mahaifinsu ba, gama Ubanmu ya ƙudurta yă kashe su.”

Yaron nan Sama'ila kuwa yana ta girma, yana ƙara samun tagomashi a wurin Ubanmu da kuma a wurin mutane.

Ubanmu Ya Hukunta Gidan Eli

Wani mutumin Ubanmu ya zo wurin Eli ya ce, “Ga abin da Ubanmu ya ce, ‘Ashe, ban bayyana kaina a fili ga gidan mahaifinka ba sa'ad da suke a Masar, a ƙarƙashin gidan Fir'auna?

“Na zaɓe shi daga cikin dukan kabilan Isra'ila yă zama firist nawa—yă hau zuwa bagadina, yă ƙona turare, yă sa efod a gabana. Na kuma ba wa gidan mahaifinka dukan hadayun ƙonawa na Isra'ila. Don me kuke harbin hadayata da baikona da na umarta domin mazaunina, kuna kuma girmama 'ya'yanka fiye da ni, kuna ƙiba da mafi kyau na kowace hadaya ta mutanena Isra'ila?’

“Saboda haka Ubanmu na Isra'ila ya furta, ‘Na ce gidanka da gidan mahaifinka za su yi tafiya a gabana har abada.’ Amma yanzu Ubanmu ya furta, ‘Sam! Masu girmama ni zan girmama su; masu rena ni kuwa zan ƙasƙantar da su.’ Kwanaki suna zuwa sa'ad da zan datse ƙarfinka da ƙarfin gidan mahaifinka, har ba wani a gidanka da zai tsufa. Za ka ga wahala a mazaunina duk da dukan alherin da aka yi wa Isra'ila; ba za a ƙara samun tsoho a gidanka ba har abada. Duk da haka ba zan datse kowannenka daga bagadina ba; za a bar ɗaya domin yă sa idanunka su ƙarashe da hawaye yă kuma ɓata maka rai, amma dukan zuriyarka za su mutu tun suna matasa. Ga alamar da za ka gani: 'ya'yanka biyu, Hofni da Finehas, dukansu za su mutu a rana ɗaya. Zan tā da wa kaina amintaccen firist wanda zai yi abin da yake a zuciyata da raina. Zan gina masa gida madawwami; zai yi tafiya a gaban shafaffena har abada. ^c Duk wanda ya rage a gidanka zai zo yă rusuna masa domin azurfa da gurasa, yana cewa, ‘Ka sa ni cikin wani aikin firist, domin in sami yankin gurasa in ci.’”