ኤርምያስ 29

29 ¹ነቢዩ ኤርምያስ በሕይወት ለቀሩት ለምርኮኞች ሽማግሌዎች፣ ለካህናቱ፣ ለነቢያቱና ናቡከደነፆር ከኢየሩሳሌም ወደ ባቢሎን ለማረከው ሕዝብ ሁሉ ከኢየሩሳሌም የላከው የመልእክቱ ቃላት እነዚህ ናቸው። ²ይህም የሆነው ንጉሡ ኢኮንያ፣ እቴጌይቱ፣ የቤተ መንግሥቱ ሹማምት፣ የይሁዳና የኢየሩሳሌም መኳንንት፣ የእጅ ባለ ሙያተኞችና አንጥረኞች ከኢየሩሳሌም ከወጡ በኋላ ነበር። ³መልእክቱን የላከው የይሁዳ ንጉሥ ሴዴቅያስ ወደ ባቢሎን ወደ ንጉሡ ናቡከደነፆር በላካቸው በሳፋን ልጅ በኤልዓሳና በኬልቅያስ ልጅ በጎማሪያ እጅ ነበር። መልእክቱም እንዲህ ይላል፤

⁴የሰማይ ሠራዊት አባት፣ የእስራኤል አባታችን ከኢየሩሳሌም ወደ ባቢሎን ላፈለስኋቸው ምርኮኞች ሁሉ እንዲህ ይላል፤ ⁵“ቤቶችን ሥሩ፤ በውስጣቸውም ኑሩ፤ አትክልቶችን ትከሉ፤ ፍሬያቸውንም ብሉ። ⁶ሚስቶችን አግቡ፤ ወንዶችና ሴቶች ልጆችን ውለዱ። ለወንዶች ልጆቻችሁ ሚስቶችን አጋቡ፤ ሴቶች ልጆቻችሁንም ዳሩ፤ እነርሱም ወንዶችና ሴቶች ልጆችን ይውለዱ። በዚያ ተባዙ እንጂ አትመናመኑ። ⁷ባፈለስኋችሁባት ከተማ ሰላም ፈልጉ፤ ስለ እርስዋም ወደ እኔ ጸልዩ፤ የእናንተ ሰላም በእርስዋ ሰላም ውስጥ ይገኛልና።” ⁸የሰማይ ሠራዊት አባት፣ የእስራኤል አባታችን እንዲህ ይላል፤ በመካከላችሁ ያሉት ነቢያትና ሟርተኞች አያታልሏችሁ፤ የሚያልሟቸውንም ሕልሞች አትስሙ። ⁹በስሜ ውሸትን ይተነብዩላችኋልና፤ እኔ አልላክኋቸውም፤ ይላል አባታችሁ። ¹⁰አባታችሁ እንዲህ ይላልና፤ የባቢሎን ሰባ ዓመት ሲፈጸም፣ ወደ እናንተ እመጣለሁ፤ ወደዚህም ስፍራ ለመመለስ የገባሁላችሁን መልካም ተስፋዬን እፈጽምላችኋለሁ። ¹¹ለእናንተ ያሰብኩትን ዐሳብ እኔ ዐውቃለሁና፤ ይላል አባታችሁ፤ መጪውን ዘመንና ተስፋ እሰጣችሁ ዘንድ፣ የሰላም ዐሳብ እንጂ የጥፋት አይደለም። ¹²“በዚያን ጊዜ ትጠሩኛላችሁ፤ መጥታችሁም ወደ እኔ ትጸልያላችሁ፤ እኔም እሰማችኋለሁ። ¹³በፍጹም ልባችሁ በምትሹኝ ጊዜ ትፈልጉኛላችሁ፤ ታገኙኛላችሁም። ¹⁴ታገኙኛላችሁ፤ ይላል አባታችሁ። ምርኮአችሁንም እመልሳለሁ፤ ከበተንኋችሁባቸው አሕዛብ ሁሉና ስፍራዎች ሁሉ እሰበስባችኋለሁ፤ ይላል አባታችሁ፤ ካፈለስኋችሁበትም ስፍራ መልሼ አመጣችኋለሁ።”

¹⁵“አባታችን በባቢሎን ነቢያትን አስነሥቶልናል” ስላላችሁ፣

¹⁶በዳዊት ዙፋን ስለሚቀመጠው ንጉሥ፣ በዚህችም ከተማ ስለሚኖረው ሕዝብ ሁሉ፣ ከእናንተ ጋራ ወደ ምርኮ ስላልሄዱት ወንድሞቻችሁ አባታችሁ እንዲህ ይላል፤

¹⁷የሰማይ ሠራዊት አባት እንዲህ ይላል፤ ሰይፍን፣ ራብንና ቸነፈርን እሰድድባቸዋለሁ፤ ከመበስበሳቸው የተነሣ ሊበሉ እንደማይቻሉ በለሶች አደርጋቸዋለሁ። ¹⁸በሰይፍ፣ በራብና በቸነፈር አሳድዳቸዋለሁ፤ ለምድር መንግሥታት ሁሉ አስፈሪ አደርጋቸዋለሁ፤ በበተንኋቸውም አሕዛብ ሁሉ መካከል እርግማን፣ ጥፋት፣ መሣለቂያና ነውር አደርጋቸዋለሁ፤ ¹⁹ባሪያዎቼን ነቢያትን ደጋግሜ ልኬ የተናገርሁትን ቃሌን ስላልሰሙ ነው፤ ይላል አባታችሁ፤ እናንተ ግን አልሰማችሁም፤ ይላል አባታችሁ።

²⁰እንግዲህ እናንተ ምርኮኞች፣ ከኢየሩሳሌም ወደ ባቢሎን የላክኋችሁ ሁሉ፣ የአባታችሁን ቃል ስሙ። ²¹በስሜ ውሸትን ስለሚተነብዩላችሁ ስለ ቆላያ ልጅ ስለ አክዓብና ስለ መዓሤያ ልጅ ስለ ሴዴቅያስ የሰማይ ሠራዊት አባት፣ የእስራኤል አባታችን እንዲህ ይላል፤ ለባቢሎን ንጉሥ ለናቡከደነፆር አሳልፌ እሰጣቸዋለሁ፤ እርሱም በዓይናችሁ ፊት ይገድላቸዋል። ²²በባቢሎንም ያሉት የይሁዳ ምርኮኞች ሁሉ ከእነርሱ የተነሣ፣ “አባታችን የባቢሎን ንጉሥ በእሳት እንደ ጠበሳቸው እንደ ሴዴቅያስና እንደ አክዓብ ያድርግህ” የሚል እርግማን ይወስዳሉ፤ ²³በእስራኤል ውስጥ የነውር ሥራ ሠርተዋልና፤ ከባልንጀሮቻቸው ሚስቶች ጋራ አመንዝረዋል፤ ያላዘዝኋቸውንም ውሸት በስሜ ተናግረዋል። እኔም ዐውቃለሁ፤ ምስክርም ነኝ፤ ይላል አባታችሁ።

አባታችን ሰማያስን ይገሥጻል

²⁴ነሄለማዊውን ሰማያስንም እንዲህ በለው፤

²⁵የሰማይ ሠራዊት አባት፣ የእስራኤል አባታችን እንዲህ ይላል፤ በራስህ ስም በኢየሩሳሌም ላሉት ሕዝብ ሁሉ፣ ለካህኑ ለመዓሤያ ልጅ ለሶፎንያስና ለካህናቱ ሁሉ መልእክቶችን ልከሃል፤ እንዲህም ብለሃል፤

²⁶“ራሱን ነቢይ አድርጎ በሚያብድ ሰው ሁሉ ላይ በግንድና በአንገት ብረት እንድትጥለው፣ እግዚአብሔር በካህኑ በዮዳሄ ፈንታ ካህን፣ በእግዚአብሔር ቤት ውስጥም ኀላፊ አድርጎ ሾሞሃል።” ²⁷ታዲያ ለእናንተ ራሱን ነቢይ አድርጎ የሚያቀርበውን የዓናቶትን ኤርምያስን ስለ ምን አልገሠጽኸውም? ²⁸ወደ ባቢሎን ወደ እኛ፣ “ረጅም ጊዜ ይሆናል፤ ቤቶችን ሥሩ፤ በውስጣቸውም ኑሩ፤ አትክልቶችን ትከሉ፤ ፍሬያቸውንም ብሉ” ብሎ ልኮብናልና።

²⁹ካህኑ ሶፎንያስም ይህን መልእክት ለነቢዩ ኤርምያስ ጮኾ አነበበለት። ³⁰ከዚያም የአባታችን ቃል ወደ ኤርምያስ እንዲህ ሲል መጣ፤

³¹ለምርኮኞች ሁሉ እንዲህ ብለህ ላክ፤ ስለ ነሄለማዊው ሰማያስ አባታችሁ እንዲህ ይላል፤ እኔ ሳልልከው ሰማያስ ስለ ተነበየላችሁ፣ በውሸትም ላይ እንድትታመኑ ስላደረገ፣ ³²አባታችሁ እንዲህ ይላል፤ ነሄለማዊውን ሰማያስንና ዘሩን እቀጣለሁ። ከእርሱ ወገን በዚህ ሕዝብ መካከል የሚኖር አንድ ስንኳ አይኖርም፤ ለሕዝቤም የማደርገውን መልካም ነገር አያይም፤ ይላል አባታችሁ፤ በእኔ ላይ ዐመፅን ሰብኳልና።