ሕዝቅኤል 17

17 ¹የአባታችን ቃል ወደ እኔ መጣ፤

²“የሰው ልጅ ሆይ፤ ለእስራኤል ቤት እንቈቅልሽ አቅርብ፤ ምሳሌም ተናገር፤ ³እንዲህም በል፤ ጌታ አባታችን እንዲህ ይላል፤ ‘ትልቅ ክንፍ ያለው፣ ረዥም ላባ ያለውና በልዩ ልዩ ቀለም ያሸበረቀ ጕንጕን ያለው ታላቅ ንስር ወደ ሊባኖስ መጣ፤ የዝግባውንም ጫፍ ወሰደ። ⁴ከጫፍ ቀንበጦቹም አናት ላይ ያለውን ቈርጦ ወደ ንግድ ምድር ወሰደው፤ በነጋዴዎች ከተማም ውስጥ አኖረው። ⁵ከዚያም ከምድሪቱ ዘር ወስዶ በለም መሬት ተከለው፤ እንደ አኻያም ያድግ ዘንድ በብዙ ውሃ አጠገብ አኖረው። ⁶በቀለም፤ ዝቅ ብሎ የተንሰራፋ ወይን ሆነ፤ ቅርንጫፎቹ ወደ ንስሩ ዘወር አሉ፤ ሥሮቹም ከሥሩ ነበሩ። እንዲህም ወይን ሆነ፤ ቅርንጫፎችንም አወጣ፤ ቀንበጦችንም ሰደደ። ⁷ነገር ግን ትልቅ ክንፍና ብዙ ላባ ያለው ሌላ ታላቅ ንስር ነበረ፤ ይህም ወይን፣ ከተተከለበት መደብ ይልቅ ከእርሱ ብዙ ውሃ ይቀዳ ዘንድ ሥሮቹን ወደ እርሱ ጠመዘዘ፤ ቅርንጫፎቹንም ወደ እርሱ ዘረጋ። ⁸ቅርንጫፎችን ያበቅል፣ ፍሬም ያፈራ፣ ክቡርም ወይን ይሆን ዘንድ በብዙ ውሃ አጠገብ በመልካም መሬት ተተክሎ ነበር።’

⁹እንዲህ በል፤ ጌታ አባታችን እንዲህ ይላል፤ ‘ይለመልማልን? ሥሮቹን ነቅሎ ፍሬውን አያራግፍምን? አዲሶቹም ለምለም ቅጠሎቹ ሁሉ አይጠውልጉምን? ከሥሩ ነቅሎ ለማውጣት ኀያል ክንድ ወይም ብዙ ሕዝብ አያስፈልግም።’ ¹⁰‘ምንም እንኳ ቢተከል ይለመልማልን? የምሥራቅ ነፋስ በመታው ጊዜ ፈጽሞ አይጠውልግምን? ባደገበት መደብ ላይ አይደርቅምን?’”

¹¹ከዚያም የአባታችን ቃል ወደ እኔ መጣ፤

¹²“ለዐመፀኛው ቤት እንዲህ በል፤ እነዚህ ነገሮች ምን ማለት እንደ ሆኑ አታውቁምን? እንዲህም ንገራቸው፤ ‘የባቢሎን ንጉሥ ወደ ኢየሩሳሌም መጣ፤ ንጉሥዋንና ሹማምንቷን ወስዶ ወደ ባቢሎን አመጣቸው። ¹³ከንጉሣዊው ዘር አንዱን ወስዶ፣ በመሐላ ከእርሱ ጋር ኪዳን አደረገ፤ የአገሪቱንም ታላላቅ ሰዎች ማረከ፤ ¹⁴መንግሥቲቱ ተዋርዳ እንደ ገና እንዳትነሣ፤ ኪዳኑን በመጠበቅ ግን ጸንታ እንድትኖር ነው። ¹⁵ነገር ግን ሴዴቅያስ ፈረሶችንና ብዙ ሠራዊት ለማግኘት መልእክተኞችን ወደ ግብፅ ልኮ በባቢሎን ንጉሥ ላይ ዐመፀ። ይሳካለታልን? ይህን የሚያደርግ ያመልጣልን? ኪዳኑን አፍርሶ ያመልጣልን?’”

¹⁶ጌታ አባታችን እንዲህ ይላል፤ “ሕያው ነኝ! ያነገሠው ንጉሥ በሚኖርበት በባቢሎን ይሞታል፤ መሐላውን ንቋልና፣ ኪዳኑንም አፍርሷል። ¹⁷‘ፈርዖን ብዙ ነፍሳትን ለማጥፋት የመክበቢያ ዐፈር በሚከመርበትና የመክበቢያ ቅጥር በሚሠራበት ጊዜ፣ በኀይለኛ ሠራዊቱና በብዙ ጭፍራው በጦርነት አይረዳውም። ¹⁸መሐላውን ናቀ፤ ኪዳኑንም አፈረሰ፤ እጁን ሰጥቶ ሳለ ይህን ሁሉ ስላደረገ አያመልጥም።’”

¹⁹ስለዚህ ጌታ አባታችን እንዲህ ይላል፤ “ሕያው ነኝ! የናቀውን መሐላዬንና ያፈረሰውን ኪዳኔን በገዛ ራሱ ላይ አመጣለሁ። ²⁰‘መረቤን በእርሱ ላይ እዘረጋለሁ፤ በወጥመዴም ይያዛል። ወደ ባቢሎን አመጣዋለሁ፤ በእኔ ላይ ስለ ፈጸመው ክህደት በዚያ እፈርድበታለሁ። ²¹ከጭፍሮቹ የተመረጡ ተዋጊዎች ሁሉ በሰይፍ ይወድቃሉ፤ የተረፉትም ወደ አራቱም ነፋስ ይበተናሉ። እኔም አባታችሁ እንደ ተናገርሁ ታውቃላችሁ።’”

²²ጌታ አባታችን እንዲህ ይላል፤ “እኔ ራሴ ከዝግባው ከፍተኛ ጫፍ ቀንበጥ ወስጄ እተክላለሁ። ከጫፍ ቀንበጦቹም አናት ላይ ለስላሳ ቡቃያ ቈርጬ እኔ ራሴ ረዥምና ምጥቅ ባለ ተራራ ላይ እተክለዋለሁ። ^a a v22 የሰው መንግሥታት በሚከሽፉበት ስፍራ፣ አባታችን የራሱን ለስላሳ ቡቃያ ለመትከል ተስፋ ይሰጣል፤ ይኸውም ከዳዊት ዘር የሚመጣው ንጉሥ ነው፤ በኢየሱስም ተፈጸመ፤ እርሱም ሕዝቦችን ሁሉ የሚያስጠልል መንግሥት እስኪሆን ድረስ ያድጋል። ²³በእስራኤል ተራራ ከፍታ ላይ እተክለዋለሁ፤ ቅርንጫፎችንም ያወጣል፤ ፍሬም ያፈራል፤ ክቡርም ዝግባ ይሆናል። የወፍ ዝርያ ሁሉ ከሥሩ ይኖራል፤ በቅርንጫፎቹም ጥላ ሥር ጎጆ ይሠራል። ²⁴የሜዳ ዛፎችም ሁሉ፣ ረዥሙን ዛፍ ዝቅ የማደርግ፣ ዝቅተኛውንም ዛፍ ከፍ የማደርግ፣ ለምለሙን ዛፍ የማደርቅ፣ የደረቀውንም ዛፍ የማለመልም እኔ አብ እንደ ሆንሁ ያውቃሉ። እኔ አብ ተናግሬአለሁ፤ አደርገዋለሁም።”