何西阿書 7

7 ¹每當我想醫治以色列嘅時候, 以法蓮嘅罪 就顯露出嚟,撒瑪利亞嘅惡行都露晒; 因為佢哋行詭詐——賊人入嚟偷嘢,強盜喺出面搶掠。 ²但係佢哋心裏面唔會諗到, 我記得佢哋一切嘅惡。 而家佢哋所做嘅圍住佢哋,喺我面前顯露出嚟。

³佢哋用惡行 使個王歡喜,用謊言使啲首領快樂。 ⁴佢哋全部都係姦淫嘅人, 好似焗爐俾整餅嘅師傅燒到咁熱, 由搓好個麵團起, 直到麵團發起嚟,佢都唔使再撥火。 ⁵喺我哋個王設宴嘅日子,啲首領飲酒飲到發熱生病; 個王竟然同啲褻慢嘅 人拍埋一齊。 ⁶佢哋埋伏等候嘅時候, 個心好似焗爐咁燒住; 成晚佢哋嘅怒氣暗暗焗住, 到咗朝早就好似烈火咁燒起嚟。 ⁷佢哋全部都好似焗爐咁熱, 吞滅佢哋嘅官長。 佢哋所有嘅王都仆倒晒;冇一個求告我。

⁸以法蓮同啲外族人混雜埋一齊;以法蓮好似一塊冇反過面嘅薄餅。 ⁹外邦人吞食佢嘅力量, 佢自己都唔知道;白髮 已經散布喺佢頭上,佢自己都唔知道。 ¹⁰以色列嘅驕傲當面指證佢; 雖然係咁,佢哋都唔肯返去歸向佢哋嘅父,亦都唔尋求佢。

¹¹以法蓮好似一隻鴿子, 愚蠢又冇見識,佢向埃及呼求,又走去亞述。 ¹²佢哋一去,我就會將我嘅網撒喺 佢哋身上;我要好似打天上嘅飛鳥咁,將佢哋打落嚟。我要按住向佢哋會眾所發嘅警告懲治佢哋。

¹³佢哋有禍喇,因為佢哋離開咗 我!佢哋要滅亡喇,因為佢哋背叛咗 我!我本來想救贖 佢哋,但係佢哋反而講謊言攻擊我。 ¹⁴佢哋唔係從心裏面向我呼求,只係喺自己張床上面哀號; 佢哋為咗五穀同新酒割傷自己, 佢哋離棄我。 ^a a v14 割傷身體係迦南異教求豐收儀式嘅一部分,佢哋咁做係為咗向啲風暴之神乞求五穀同美酒——同從心裏面向天父呼求啱啱相反。 ¹⁵雖然我訓練過又堅固過佢哋嘅膀臂, 佢哋反而圖謀惡事攻擊我。 ¹⁶佢哋轉返嚟,但唔係轉向至高者;佢哋好似一張鬆咗弦嘅弓。 佢哋嘅首領必因為佢哋舌 頭嘅狂傲而倒喺刀下; 呢件事會令佢哋喺埃及地成為人哋嘅笑柄。