Efraim Chem To Angailabü
Efraim kho phaia asepeibü wentek peklebü ki, Ijep hoba Assiria kanglanga pejapela paibü maangsangbü au che, wentek kaangbü phau tegü nangnak pendou wan jajalalabü. Choba shuong lulu phaia tuongda hoba aoeikei seneibü Bou to achalou. Haoei haoen damenlabü dogo laukei, lausikei haoen sepeian khantoje haoeneibü shen ka haapda.
7 1Ladang ngei Israel maitida, Efraim shabü longeida, hoba Samaria amaibü shuong; aishanga haoenei amlangbü kümda—kokbü khüto atda, hoba sangshibü shuong tangto makshaida. 2Lausikei haoenei haoeneibü maanga ngei haoeneibü amaibü pendou damenda dogo alauda. Tou haoeneibü kümsileiei haoen kaileplabü; haoen ngeibü thenyek thedanga kia.
3Haoeneibü amaibüei haoenei Choba maang haitida, hoba leiyeibü shuong haoeneibü amlangbüei maang haitida. 4Haoen pendou totnyinbü shuong ki, wentek ngoubou cheei kaangtibü wentek kaangbü phau tegü, aoei wan longbü thakda, wen nyatbü ka tokai jinshongko. 5Seneibü Choba chaloua leiyeibü shuong ih aubüei shattikei; haoei mü awealaubü shuong yoa ik shenkei. 6Aishanga haoeneibü maangpon wentek kaangbü phau tegü longan nyangko louda, haoen haiyeiko kijinei; langyang pendou haoeneibü ange longda, hoba ngeyang kho jajalalabü wan tegü longtida. 7Haoen pendou wentek kaangbü phau tegü aubü ki, hoba haoenei haoeneibü matjembü shuong suida. Haoeneibü Choba pendou tuongkei; haoen yoka aoeikei ngo ngada.
8Efraim mütli shuong amonbü himshuong shaknyinda; Efraim phaia asepeibü wentek peklebü ki. 9Yenbou shuongei haoeibü hau suida, hoba haoei kho angeda; khuthu phambü khulou hao thüka lakkukei, hoba haoei kho angeda. 10Israelbü lilibüei haoeibü thenyek thedanga aukabü kuda, khei yingasikei habü pendoua haoenei haoeneibü Bou jungto asepeida, ayingsi hao alamda.
11Efraim dukutuk tegü yeikei, ngoubü hoba sensi akibü, Ijep to ngeda, Assiria to hauda. 12Haoen haujinei, ngei ngeibü wennyishou haoen thüka shenlabü; khuthük aushuong tegü ngei haoen lottilabü. Haoeneibü tan huiletbü tegü ngei haoen shieikoelabü.
13Haoen shanga ügütü, aishanga haoenei ngo ka shoongaikei! Haoen shanga mautibü, aishanga haoenei ngo khulimbo meimeikei! Ngei haoen angngaila maangkei, lausikei haoenei ngo khulimbo amlangbü lauda. 14Haoenei haoeneibü maangpon ka ngo to angekda, lausikei haoeneibü shen thüka wailetda; youshou hoba ih haanbü shanga haoenei himshuong manga püpda; haoenei ngo ka satkhümda. a a v14 Manga püpbü kho Kanan kaodaka mühghaü shuong jutibü tengai che kikei, youshou hoba ih shanga lang hoba müh jungeibü mühghaü shuong to shanla kümbei—habü kho maangpon ka Bou to ngekbü yoa dangbou ki. 15Ngei haoeneibü ik lenenan hau kitikei, khei yingasikei haoenei ngo khulimbo amaibü dobüshida. 16Haoen sepeida, lausikei thükae aying; haoen semthetbü lau tegü yeikei. Haoeneibü leiyeibü shuong haoeneibü tongde lilibüei inei tuonglabü; ho shangaje Ijep kaodaka haoen to nyikulabü.
