Kayambwadilaku batu bandi
Mukunga wisi funda batu bana bisi honda bafwidi yi banzenza amana bisi banza ni ka mutu ku wisi mona. Mvutu yidi bwadi: Wuna wákuna kutu, kayukiku? Wusi suka mu diambu dyandi mosi — kulu dyama dyakala mu kukhukuma, amana khenda ya bulunda ya Tata wama yánzyamisa.
94 1Tata wetu wuna wisi hangila masonga—A Tata wetu; Tata wetu wuna wisi hangila masonga, lema! 2Telama, A Nzusi wa tsi yosu; vutula kwena bakwa lulendu mana mafwani kwena bawu. 3Nate tangwa dyakwi batu ba mbi, A Tata wetu—nate tangwa dyakwi batu ba mbi basangwala?
4Bisi lubula ndinga za lulendu; boosu bana bisi hanga mambi bisi ditsikisa. 5Bisi fukumuna batu baku, A Tata wetu, amana bisi tusuna kuvwa kwaku. 6Bisi honda mufwidi wa phutu yi munzenza, amana bisi honda bana bakonda batata. 7Bisi zimbula: «Pfumu kamónaku; Nzambi wa Yakobi kasimbululaku.»
8Simbidilenu, benu batu bakonda ngangu ha kati dya batu; benu bilawu, tangwa dyakwi lukála badimuka? 9Wuna wákuna kutu, kayukiku? Wuna wáhanga disu, kamónaku? 10Wuna wisi sungika makanda, kabalwengisaku—yandi wuna wisi longa batu nzayilu? 11Tata wetu wuzayini mabanza ma batu, ni menina kaka mwela.
12Kyesi kwena mutu wuna wisi sungika ngeyi, A Tata wetu, amana wisi longa muna mitsiku myaku, 13mu kuhana luvundu muna bilumbu bya phasi, nate dibulu dyasimwa kwena batu ba mbi. 14Mukuma Tata wetu kayámbwadilaku batu bandi; kalosaku kuvwa kwandi. 15Mukuma masonga makavutuka kwena batu ba masonga, amana batu boosu ba mbundu zilungama bakamalanda.
16Nani kakantelama kikuma kyama ku batu ba mbi? Nani kakansingika kikuma kyama ku bana bisi hanga mambi? 17Yuka ni Tata wetu kakalaku nsadisi wama, moya wama wadi tswatsu kwenda kala muna talala dya lufwa. 18Bu yázimbula: «Kulu dyama dibati bwa,» khenda yaku ya bulunda, A Tata wetu, yánsimba. 19Muna tangwa mayindu makala malawu muna mbundu yama, kikesa kyaku kyámpheka kyesi muna moya wama.
20Kiti kya luyalu kyátota nzila kifwaniku kala hakimosi yi ngeyi—kina kisi sonika kukonda kwa masonga mu mitsiku? 21Bisi kutakana mu kusanda luzingu lwa mutu wa masonga amana bisi zengila mutu wakonda sala mbi mukanu wa lufwa. 22Kaasi Tata wetu wákituka kiswaminu kyama kya ngolu, amana Tata wetu tadi dya kiswaminu kyama. 23Kavútula masumu ma bawu kwena bawu amana kababúnga kikuma kya mbi za bawu; Tata wetu kakababúnga.
