Ma Ki Akoonin Koigeny
Teebee Kwandanyo kole mi au sireetap peesyet ne po kamenng'wong', ak le ma ki koisto piikyik. Yeityo kong'alaal poisyendet: kigoochin ng'elyep ne kineetaat si kotononchi che nyaluli, name letyet, tagilgilyetap tamnet, ak sing'ilet, ma ung'e togeennyi, ingen kole neegit ne iimanisyoe ineendet.
Ng'alaali Kwandanyo eng' mustarisyek 1–3
50 1Ko uu ni ne mwaei Kwandanyo: “Mi au sireetap peesyet ne po kamenng'ung', ne ki akoonen ineendet? Anan ko ne ng'oo eng' piik che asuumei eng' icheek ne ki aaldoiwok inyee? Keer, ki kialdok amu tengekwogik, ak ki kioon kamenng'ung' amu lelutiguk. 2Amu nee, ye ki anyoon, ma mi chiito? Ye ki aguur, ma mi chiito ne woljiwo? Tos nwach eunnyu si atyach? Anan ko ma atinye kamuget si asar? Keer, eng' kereetap koonyu ayaamei nyanjet, ayai ainoosyek koek surkwen; pulyo njireenikwak amu mami peek, ak kome eng' melelda. 3Alaakyi kipsengwet mesundeito, ak atuge icheek eng' ngoryeet ne tuui.”
4Kagoochiwo Kiptaiyat Abba ng'elyeptap chii ne kineetaat, si angen aleenji ng'olyoot ne tononchini chii ne nyaluli. Mornet ak mornet koing'eetwo, koing'eetyi itinnyu si agas ko uu chii ne kineetaat. a a v4 Tyengtap Otwogindet ne po somok eng' Isaiah — ng'alaali Jeso ko uu Weeriit ne kase iit, ne neetyo eng' Kwandanyi mornet ak mornet. Ibwaatei saruutikap kesaetyennyi kiit ni eng' kurgeet. 5Kagoyatiwo Kiptaiyat Abba itinnyu, ak ma ki angelel; ak ma ki achuchuigei let. 6Kaagoochi letnyu che ebei, ak tagilgiliguk che ng'usei tamnet; ma ki aung'e togeennyu eng' teweernateet ak sing'ilet. 7Ago toretiwo Kiptaiyat Abba; amu niito ma ki atoptoben; amu niito kaainde togeennyu ko uu koita ne ng'atip, ak angen ale ma alilan. 8Neegit ineendet ne iimanisyo. Ng'oo ne boryoei ak anee? Ketonone togeet. Ng'oo puunyootinyu? Ingonyo neegit anee. 9Keer, toretiwo Kiptaiyat Abba; ng'oo ne mwaituno ale tengegitaat? Keer, osegitu icheek tugul ko uu ngoryeet; amei icheek kuutik.
10Ng'oo eng' okweek ne iywei Kwandanyo ak kase iit kutitap otwogindennyi? Ineendet ne pendi eng' mesundeito ak ma tinyei lapkeiyet, ingomang'u kainennyi ak kotiegei Kwandanyi. 11Keer, okweek tugul che kindoi maat, che laachegei kegenganik: opendi eng' lapkeiyetap maatng'wong' ak eng' kwenutap kegenganik che kaolal! Ni ne otaaten eng' eunnyu: orue eng' sastaet.