Ngei Ka Ladangkei Asattikei
Seneibü Bouei kaibü nyueibü bangbü le laeto ki dogo phekei, ngei kü mütshuong sattikei dogo lenkei. Kheijinei soushou lenkei: semthetbü shuong to ngüh laula ngei eik tongde kubü, wapbü shuong la himshuong kua, sembung wi phenbü hoba eok thokbü to himou ahuko, kü thuibou nyangko kia dogo maangkaangbü.
50 1Seneibü Bouei ho hai lauda, “Kaibü nyueibü bangbü le kho laeto ki, aoei ngei sao sattikei? Ayingsi ngeibü lotkubou shuong yoa aoyou to ngei ka yaakkukei? Chühashi, kaibü shabü shanga ka yaakkukei, hoba kaibü shedbü shanga kaibü nyu sattikei. 2Aila ngei loukeije aoei akitei? Ngei ngakei, jongaibou aoei akitei? Angngaila ngeibü ik kheinyu tuikei lo? Ayingsi ngo khümenla hau aki lo? Chühashi, ngeibü hakbüei ngei yungnyu ulangtikuda, ngei shumang shuong yam la yeitikuda; haoeneibü ngau dei lako nyaülüm hilabü hoba deilaei hailabü. 3Ngei müh to nakthühei neitikuda hoba khoto nakkhübü neiei naanglepan phokulabü.”
4Kü Thükenbou Bouei kü la eik tongde kua, semthetbü shuong to solotila ngüh laula ngei ngela shanga. Ngeyang ngeyang Haoei ngo loentikuda, eik tegü ditla kü nou loentikuda. a a v4 Isaiah kho sembounyet Khangenbou Chia ki — Jisuei ngüha lebü Shou tegü joyoda, aoei ngeyang ngeyang haoeibü Bou ka thepet hapda. Jisu khonkubü ngühli shuongei singsalanga ho kümbü to tongtongbü lenda. 5Kü Thükenbou Bouei kü nou ipbei, hoba ngo khulimbo aloukei; ngo tongde asepeikei. 6Ngei wapbü shuong la kü manga kukei, hoba sembung wi phenbü shuong la kü kaoshang kukei; himou hoba eok thokbü ka kü thenyek ahukei. 7Lausikei Kü Thükenbou Bouei ngo thuida; khoei ngo himouko akitei; khoei ngei kü thenyek laang tegü kaangkhühtham phokua, hoba ngo himouko akilabü dogo ngei ngeda. 8Ngo ngühmaanglantibou nyangko kia. Ngo khulimbo aoei tokyotila? Sen che ongkei haiteishi. Ngeibü dangbou aoyou ki? Hao kü jungto nyangko louashi. 9Chühashi, Kü Thükenbou Bouei ngo thuida; aoei ngo shedbü ki dogo ngetila? Chühashi, haoen pendou nei tegü hanglabü; ainei phetei haoen shauan apbulabü.
10Kan yoa aoei seneibü Bou to souhatda hoba haoeibü khangenbou ngüha leda? Nakthüha paibü hoba ngesakbü akibü müt kho hao nyena mailemashi hoba jembü Bou to chühtishi. 11Chühashi, wan jikbü kan pendou, wanemshang kan lolo lamlebü kan: kaneibü wan ngesakbüa paiashi hoba kanei sapbubü wanemshang yoa! Ho kanei kü ik ka haplabü ki: kan khonkubü danko yepan kilabü.
