Tos Ma Mi Kwanda eng' Israel?
Putetap koi ne po Israel ak Judah koba kamutet. Agot ye butei kirwoogutyet, testai bukuit koboorchi Kwandanyo ne sip koyong'u lagokyik.
Ng'alaali Kwandanyo eng' mustarisyek 4, 6, 16
1 1Kingo me Ahab, kongelelji Moab Israel.
2Ki but Ahasia eng' segengeisyegap koonnyi ne po parak eng' Samaria, ak komyan. Ki iyookto piik, koleenji: “Oba, oteebe Baal-sebub, kamuktaindetap Ekron, ngo asap eng' miondani.”
3Ago ki leenji malaikaiyatap Kwandanyo Elijah Tisbinindet, “Ng'eet, iba ituiyo ak piigap laitoryatap Samaria, ak iteebe icheek, ‘Tos ma mi Kwanda eng' Israel, si iwe iteebe Baal-sebub, kamuktaindetap Ekron?’
4Ko uu ni ne le Kwandanyo: ‘Mo iwendi iong'eet eng' itoogut ne ki itogosta; ibekyini.’” Ak ki wo Elijah.
5Kingo week piik kap laitoryat, koteebe icheek, “Amu nee si oweek?”
6Ki wolji icheek, koleenji, “Ki nyo chiito kotuiyo ak acheek, ak kole, ‘Weeigei laitoryat ne ki iyookto okwek, ak imwachi: Ko uu ni ne le Kwandanyo: Tos ma mi Kwanda eng' Israel, si iyookten piik koteebe Baal-sebub, kamuktaindetap Ekron? Ko uu nooto, mo iwendi iong'eet eng' itoogut ne ki itogosta; ibekyini.’”
7Ki teebe laitoryat, kole, “Kiyae ne uu chiito ne ki nyo kotuiyo ak inyee ak komwaun tuguuchu?”
8Ki le icheek, “Ki ilaachi ngoryeet ne po angook, ak ki rategei pireneetap muito eng' suennyi.” Ki le laitoryat, “Elijah Tisbinindet.”
9Ki iyookten laitoryat kiptaiyatap konom kobooto piiguk che konom kwo kap Elijah. Ki togosta kiptaiyat ole mi ineendet, ye tebee eng' tulweet parak, ak koleenji, “Chiitap Kwandanyo, kole laitoryat, ‘Chorut.’”
10Ki wolji Elijah kiptaiyat, koleenji, “Ngot anee chiitap Kwandanyo, kobut maat eng' kipsengwet ak kopeel inyee ak konomuguk.” Ak ki but maat eng' kipsengwet, ak kopeel ineendet ak konomnyi.
11Ki iyookten kogeny laitoryat kiptaiyat age kobooto piik che konom, ne le, “Chiitap Kwandanyo, kole laitoryat: ‘Chorut ichokyini.’”
12Ki wolji Elijah, koleenji, “Ngot anee chiitap Kwandanyo, kobut maat eng' kipsengwet ak kopeel inyee ak konomuguk.” Ak ki but maatap Kwandanyo eng' kipsengwet, ak kopeel ineendet ak konomnyi.
13Ki iyookten laitoryat kiptaiyatap konom ne po somok kobooto konomnyi. Ki togosta chiichooto, kogutuny eng' taitap Elijah, ak kogaigai, koleenji, “Chiitap Kwandanyo, asoomin ale ingobunji kamanuut saboondanyu ak saboonwegap otwogiguk, konom chu, eng' taing'ung'. 14Ki but maat eng' kipsengwet ak kopeel kiptainik aeng' che po tai kobooto konomwak. Nguno anyun, ingobunji kamanuut saboondanyu eng' taing'ung'.”
15Ki leenji malaikaiyatap Kwandanyo Elijah, “Chorut kobooto ineendet; amoiywei ineendet.” Ki chor anyun Elijah kobooto ineendet koba kap laitoryat.
16Ak ki leenji laitoryat, “Ko uu ni ne le Kwandanyo: Ki iyooktoi piik koteebe Baal-sebub, kamuktaindetap Ekron—tos ma mi Kwanda eng' Israel si keteepse ng'olyoondennyi?—ko uu nooto, mo iwendi iong'eet eng' itoogut ne ki itogosta; ibekyini.”
17Ki me Ahasia, ko uu ng'olyootap Kwandanyo ne ki mwa Elijah. Amu ki ma tinyei Ahasia weeriit, ki laitoran Jehoram kogeer ineendet, eng' kenyiitap aeng' ne po Jehoram weeriitap Jehoshaphat laitoryatap Judah. 18Poisyonik che ng'etunotiin che po Ahasia, ak tuguuk tugul che ki yai, ko tos ma ki sirchi kitabuutap ateptap peetuusyek ne po laitorinigap Israel?