Kelasü Menuo Rüda Zü Lavo Süyo
Hio jü süyi lamori zo. Menu kelasü rüda lavo süyo, vele jü nphemere rüda mhakebü süyo, mu timesholü vori jü krü keve zo. Ha Po ngo mha metükolü bazo süo lesida poyo, mu kekhrü de ga tiko, ngomu de teko kaba ti ce samükro nü ketala.
15 1Menu kelasü rüda zü lavo süyo, vele nphemere jüe lü rüda mhakebü süyo. 2Mhashe miko meyi mhase müchuh süyo, vele kenyomi talü kenyo prari süyo. 3Ha Po ngo mha metükolü bazo, kesumiko mu keveko hepü tayo. 4Menu meyi süo kürhüro thevo zo, vele mesakemo meyi rüpü thathi süyo. 5Kenyomi püpo methakesü thalice tayo, vele thüma kehopüri lekhu rünyiyo sü mhashemi zo. 6Jütho miko ki lü mha kekro bazo, vele mesakemo miko ngoyi kümüzhie vato. 7Mhashe miko mülü mhase züpra süyo, vele kenyomi melüko süko sübimote. 8Mesakemo miko thechu ha Po ngo keretsü zo, vele jütho miko kücho thi Pu künüo zo. 9Mesakemo miko choo ha Po ngo keretsü zo, vele jütho phuyo kesü Pu khrüyo. 10Cholü tami lü thekre methi bazo, mu lekhu ngo metsü ketami thito. 11Mhakhre mu kedi vao ha Po mhüjülü khripü bazo; thüma metü melüko ri Pu khasü mükro seba! 12Mi kepomesumie lekhu süo khrümo; pü mhashe miko ce vomote. 13Unü melü mhüjü vekrü süyo, vele kümüzhie melü rüpü thathi süyo. 14Mhaco melü mhase phuyo, vele kenyomi talü kenyo tiyo. 15Kümüzhie bami tüso metü meza zo, vele udzüvekrü melü mha metü unü thi bayo. 16Ha Po meprü mu mha dopü bao, mha kekro mu lü kümüzhie ba süo ceri vezo. 17Kekhrü bami lü ga ti süo, ngo metsü de metho upho keve ti süo ceri vezo. 18Thelü reda mhamha kelakre mhakebü süyo, vele u lü rüda mhatahimi küzhe bühi thihi süyo. 19Kemetsümi choo thori sheri zo, vele jütho miko choo cejü kethe za veo zo. 20Mhashe nue pü po unü süyo, vele kenyomi pü zu thalice tayo. 21Mhase bamomi lü kenyo unü zo, vele mhaco mie jütho cho chota süyo. 22Jü kha bamo lize mharhü ditato, vele jü kha pümi kekro ba lize nvekeyi to. 23Thümae kelasü keve lasü lü unü ngoyo, mu püpe timesü de jü poo di keve zo! 24Mhasemi lü kürhüro choo meso ce voyo, mekhroco mhakhre celü pü zü lavo süyo. 25Ha Po kümüko kütsümi ki mezü süyo, vele thenopü cejü Pu hepü tayo. 26Mesakemo miko medoko ha Po ngo keretsü zo, vele jü keveko mesa zo. 27Thüma kehopüri mizü yinyio kesüo pü ki lü kümüzhie vayo, vele khasü mizü ngo metsü ketami kürhüyito. 28Jütho miko melü kelasü dibi po süo mejo tayo, vele mesakemo talü kesu prari süyo. 29Ha Po mesakemo miko celü müchuh tayo, vele jütho miko kücho Pu fü reniyo. 30Ngo keveo melü unü süyo, mu jü keveo uroko thepu süyo. 31Kerhü süyi lekhu rünyi kütami rünio mhashemi dolü tato. 32Thüma kehopüri metha mhasemo tami, utho uthi ngo metsü tayo, vele thüma kehopüri lekhu rünyi tami, mhase mhalu ngoyi yo. 33Ha Po meprü mhashe metha zo, mu renu metsa müno mhüjülü tayo.
