Nali Ra̱changa
Davidwui laa, ana Judahwui lamhāngli leilakha tharan.
Judahwui lamhāngli kagapi, chili ra̱chang chi kachangkhatana. Davidna ali ngaleilai: tara̱ makhalei ngalei thāda awui phasā katongana awui Avāli ningkachānga, kala makhangachei leikashi chili kharing lāngmeida phā da hānga, ngayāwui atam kachida ali phaningda.
63 1Iwui Avā, na iwui Avāna; ina ining tongda nali phai. Tara̱ makhalei siwuk kala kachotna ngaleili imanglāna nali ra̱changa, iphasā katongana nawui vang ningkachānga. 2Chieina ina katharapamli nali yangtāhaira, kala nawui pangshap kala nawui tekhamatei theihaira. 3Nawui makhangachei leikashi mirinliva phāmeiwui vang, imorchaina nali sochikatra. 4Chieina I ringlakha eina tangda ina nali somira; namingli ipāng khāngkāra. 5Imanglāna phasā phākhavai kashakazā thāda thora, kala khamathānwui morchai eina ikhamorna nali sochikata.
6Ipetli nali phaningung tharan, kala ngayā khamayonbing peida nali machuka. 7Kaja na ili khangachonmihaira, kala nawui angachāng khaya̱li ina mathānda laa sāra. 8Imanglāna nali ngavapta lei; nawui yāpangna ili singtita.
9Kha iwui mirin sāshimān khavai kaphābingna, okathuiwui kathukali takailra. 10Athumli raighaili horsangmira; ramsābingwui kashakazā ngasāra. 11Kha awungana ithumwui Avāli ringphāra; ithumwui Avā mingli mingzaida saikorana sochikatra, kaja kakapikbingwui khamor sāshimānmihaora.
