Melelda agobo Inyee
Tyeniitap Daudi, ye ki mi eng' surkwen ne po Judah.
Ki kisir eng' timdotap Judah, ole mi melelda ne po iman. Weeksei Daudi niito: machei mugenyi komugul Kwandanyi ko uu emet ne yaam ne machei peek, ak le kole siirei rireenetap ung'oot saboondo, ye bwaatei ineendet eng' saaisyegap kemoi.
63 1Kwandanyu, inyee ko Kwandanyu; acheeng'in eng' muguleldanyu tugul. Melelda saboondanyu agobo inyee, machei mugenyu komugul inyee, eng' emet ne yaam ak ne ng'etat ne ma mi peek. 2Ki ageerin anyun eng' ole-tiliil, ak ki ageer kimnateeng'ung' ak liilindang'ung'. 3Amu siirei rireeneng'ung' saboondo, lasune kutinnyu inyee. 4Alasunin anyun ko uu ye asabe; eng' kaineng'ung' aito eunnyu. 5Piyang'u saboondanyu ko uu amitwogik che karaaran, ak komwa kutinnyu kalasuneng'ung' eng' poiboiyet.
6Ye abwaat inyee eng' itogunnyu, ak abwaatati inyee eng' saaisyek che koi che po kemoi. 7Amu inyee ko toreetanyu, ak eng' urwetap kebebaiguk atyen eng' poiboiyet. 8Namegei saboondanyu ak inyee; namei eung'ung' ne po tai anee.
9Ago icheek che cheeng'ei kobar saboondanyu, kirorokta koba rirosyegap ng'wony. 10Kigoito icheek rotwetap chok; koek icheek amitwogigap ng'okiik che po timiin. 11Ago poiboitu laitoryat eng' Kwandanyo; koiloskei icheek tugul che iyasye eng' Kwandanyo, amu kisilem kutusweegap kiplembechonik.