Meiwui Vang Mānga Kānnai Drakhārong
Kachihan, ngachaoda kathei akha. Angur thing kaphunmahao sākhavai athi maleila, kala meili kachokhui eina athi hakmi maleila. Ithumwui Avāna hanga, Jerusalemwui miyara Wui vang hina: meiwui vang kahikhui, sākhavai khipā khom mashungla.
15 1Chieina ithumwui Avāwui tui china ili rāhānga:
2"Miwui naomayara, ngahongli khalei thingrongbing ngachaili khalei drakhārong aphāng, drakhārongwui thing chi thing khangatei saikorawui vanga kathada phāmeirakhala? 3Awui thing chi khikhikha kānnaiwui vang singpaira̱khala? Chiwui eina ot hokthāng khavai thingshun akha sāpairakhala? 4Yanglu, chi meiwui rikkhavaiwui vang meilungli horsanghaira. Meina awui akatang khanini chuitāhaira, alungthung chi chara̱haira. Chi khikha ot sākhavaiwui vang khangayira̱khala? 5Tongtingda leilala kānnai maleimana; meina chi chuitāda chara̱haira tharan, chi khikhikha sāpairakhala?"
6Chiwui vang Khamunga Avāna hithāda hānga: "Ngahongli khalei thingrongbing ngachaili khalei drakhārongwui thing chi ina meiwui rikkhavaiwui vang mikahai thāda, chithāda ina Jerusalemli khalei mibingli horsangmihaira. 7Ina athumli mamayāmara. Athum mei akha eina yāmshokhaowa, kha mei khangatei akhana athumli chuitāhaora; chieina ina athumli mamayā tharan, I nathumwui Avāna da nathumna theira. 8Athum kachangkhat eina shitkasang makhalei kahaiwui vang, ina ngalei chi ramcho sāngasakra, da Khamunga Avāna hānga."
