Nathumwui Avāli Saikora Eina Leishilu
Nganālu, O Israel: ithumwui Avā A mānga, kala nathumna wuklung, manglā, yāng tongtingda ali leishira. Tui hibing wuklungli khare leira, chiwui thili shimli kala shongfali kasāng ngazekli, kasakhongli, kala naongarāna khikhalajila da ngahāna tharan kahāng ngahānli leira.
6 1Hi ningkhami, ain kala shiyan-chikanbing, nathumwui Avāna nathumli tamchithei khavai ili kaso kahaina, chithakha nathumna vākhuiki kaji ngalei chili chi mayonra. 2Chithakha nathumna nathumwui Avāli khayāshira; nala, nanaongarāla, kala nara̱-azāla nawui mirin peida ina nathumli kaso kahai awui shiyan kala ningkhami saikora mayonra, kala chithakha nathum okpeimeira. 3Israel, nganālu, kala ning ngasharlak eina chi mayonlu, chithakha nathum ringphāmeira, kala ithumwui Avā, navā ngarāwui Varena, nathumli ngashit kahai thāda seina̱ eina khuira̱ khalong ngaleili nathum kachangkhata mataisangra.
4Israel, nganālu: ithumwui Avā akhana. a a v4 Jishuna hi kahāng chi mataimeikap kaje ningkhamina da mashunga (Mark 12:29). Ana chila hānga, "Iwui Avā eina I akhana" (John 10:30). 5Nathumwui Avāli nawui ning tongda, nawui manglā tongda, kala nawui yāng tongda leishilu. 6Kala aja ina nathumli kaso kahai tui hi nawui ningli leira. 7Chibing chi nanao ngarāli ningsanglak eina tamchitheilu, kala nathumna shimli pamlala, shongfali zatlala, kapi kala kathui atamli chiwui maramli tuimatuilu. 8Chibing chi nawui pāngli machut thāda khalaplu, kala nawui khaveili masa̱khui khavai thāda leiranu; 9kala chibing chi nathumwui shimwui khāmonglila, ngaveithinglila kapihailu.
10Nathumwui Avāna navā ngarā Abraham, Isaac, kala Jacob, athumli ngashit kahai ngaleili nathumli thānkazang tharan, nathumna masākakā reikhamatai kala kaphā keinungbing nathumli mikhavai, 11nathumna masākuphaokahai khamathā ot saikora pemkahai shimbing, nathumna makhonkahai khonkhui kahai ra̱khongbing, nathumna masāsangkahai drakhā yāmgui kala oliverongbing, kala nathumna shaida ningyāng ungshung tharan, 12Nathum ning ngasharlu, Egypt ngaleiwui eina, narkahai shimwui eina nathumli thānshokkhame ithumwui Avāli malaihaipaishina. 13Nathumwui Avāli khayāshida ali otram ngatha̱lu, kala awui mingli mingzailu. 14Nathumli kuimareida khalei yurbingwui khangatei varebingli mashurpaimara, 15khikhalajila nathumli ngasokazata nathumwui Avā chi mikpaishikatha Avāna, maningakha awui malungkhavāt nathumtungli mei thāda chuithaida nathumli okathuiwui maiwui eina sāshimitmi ngasakra. 16Massahli nathumna ali chāng khayanga thāda, nathumwui Avāli chāng mayangpaimana. b b v16 Massah: tara̱ makhalei maramli Israelna khayon phāngarokta kala ithumwui Avāli chāng yanga kaji apamna (Exodus 17:1–7). 17Nathumwui Avāwui ningkhamibing, awui tamkachithei, kala nathumli kaso kahai awui shiyanbing chi ningsanglak eina mayonlu. 18Ithumwui Avāwui mikyanli khamashung khangarong kala kaphā chi sālu, chithāda nathumwui vang kaphā ngasāra, kala nathumna vāzangda navā ngarāli ithumwui Avāna mira da ngashit kahai khamathā ngalei chi akhuishapra, 19ithumwui Avāna kahāng kahai athishurda, nathumwui yangkashe saikorali nathumwui miktāli ana kashamshokra.
20Naoda nanaona nali, 'Ithumwui Avāna nathumli kaso kahai tamkachithei kala ain kala shiyan-chikanbing hi khikhala?' da ngahānakha, 21Chitharan nanaoli nathumna ngahānkāra, 'Ithum Egyptli Pharaohwui raonao sāhaira, kala ithumwui Avāna pāngwui pangshap eina ithumli Egyptwui eina thānshoka. 22Ithumwui Avāna Egyptli, Pharaohli, kala awui shimkhur katongali, ithumwui miktāli hakkhamahā kala khangachee khangachā khudam kala matakhak kahai sāchithei. 23Ithumli thānzang khavai, kala ithumwui avāva̱ ngarāli ana ngashit kahai ngalei chi ithumli mikhavai, ana ithumli chiwui eina thānshoka. 24Kala ithumwui Avāna ithumli hi ain saikora mayon khavai, ithumwui Avāli khayāshi khavai, atam kachida ithumwui vang kaphā ngasākhavai, kala aja ithum khalei thāda ithumli ringngasak khavai kaso kahaina. 25Ana ithumli kaso kahai thāda ithumna ithumwui Avā mikatingli hi ningkhami saikora ningsanglak eina mayonakha, chi ithumwui vang khamashung khangarong ngasāra.'
