Kaibü Bou to Peisilei Pendouei Sanoushi
Ditashi, O Israel: seneibü Bou kho che ong ki, hoba nyi hao to maangpon pendouei, soushou pendouei hoba hau pendouei sanoushi. Ho ngüh shuong shaangbou kaibü maanga kilabü, kheijinei chema hoba lama kaibü jembü ngüha laueiashi, kaibü chem kouyema, hoba kaibü shou aila phejinei hao la jongaibü to.
6 1Habü ho sakkubü ngühkhüm, ngühkhüm hoba song, nyi to lenla shanga kaibü Bouei ngo la sakkukei, khoei nyi lela shanga danko kibü kaonyeka khübü kho kümlabü. 2Khoei nyi kaibü Bou to hangenlabü, ngei nyi la kubü haoeibü ngühkhüm hoba sakkubü pendou jungeiko, nyi, kaibü shousi shuong hoba kaibü shisi shuong, kaibü salang pendoua, hoba khoei nyi salang haangko langlabü. 3O Israel, ditashi, hoba khübü kho maangsangko jungeijan, khoei nyi la kikokeiko kilabü hoba sendei hoba naodei koubü kaonyeka nyi juongnyu haalabü, seneibü Bou, kaibü pisibou Mühghaüei, nyi la thekubü tegü.
4O Israel, ditashi: seneibü Bou kho che ong ki. a a v4 Jisuei ho ngüh kho aei yaangenbü sakkubü ngühkhüm ki dogo lenkei (Mark 12:29). Hobaje haoei tokei laukei, “Bou hoba ngo che ong.” (John 10:30). 5Kaibü Bou to maangpon pendouei, soushou pendouei hoba hau pendouei sanoushi. 6Hoba tat ngei nyi la sakkubü habü ngüh shuong kaibü maanga kilabü. 7Khübü kho kaibü shousi shuong la haujembo lenashi; nyi chema setjinei hoba yento haujinei, nyi yepjinei hoba pijinei khübü shanga laueiashi. 8Khübü kho kaibü ika tetsibü che tegü khühan phojan, hoba kaibü khüngjaa shensinge che tegü kaiashi; 9hoba khübü kho kaibü chem kouyema hoba kaibü bakoua doashi.
10Kaibü Bouei kaibü pisibou Abraham, Isak hoba Jakob la theyolanyobü kaonyek to nyi leian loulaje, nyi adangbü yaangbü hoba maibü sangnyu shuong nyi la kula shanga, 11nyi aloutikubü aieilausi maibü peisilei pendouei jakabü chem shuong, nyi athubü shaangla thukei kibü deikhün shuong, nyi alebü semlühlaak hoba oliv bu shuong, hoba nyi shauan shishenlaje. 12Ijep kaodak ka, aaothu ka nyi leiyenbü seneibü Bou to amaala maangsangashi. 13Nyi kaibü Bou to hangenjan hoba hao to khangenjan, hoba hao nyen phongko theyolanyoashi. 14Nyi lubü mühghaü shuong, kaibü kaijembo kibü phangshuongeibü mühghaü shuong phai asemjan; 15aishanga nyi yoa kibü kaibü Bou kho nyekto shatbü Bou ki, ayingsi hao khau nyi khulimbo anglabü hoba kaonyudak khüng ka nyi mautikulabü. 16Nyi Massaa hao takteibü tegü, kaibü Bou atakteijan. b b v16 Massa: khünei Israelei dei akibü shanga oyokei hoba seneibü Bou takteikei kibü kaoen ki (Exodus 17:1-7). 17Nyi kaibü Bou ngühkhüm, haoeibü sakkubü ngühkhüm, hoba haoei nyi la sakkubü haoeibü deikhüm haujembo jungeijan. 18Seneibü Bou thedanga ai tükde hoba maibü ki kho kümashi, khünei kan maisho kilabü, hoba seneibü Bouei kaneibü pisibou la kula thekubü kaodak maibü to kanei atan lelabü, 19seneibü Bouei lenbü tegü, haoei kaneibü dangbou pendou kan thedang ka shian sattilabü.
20Ladang jihsiphaia kaneibü shouei kan to phealonga, ‘Seneibü Bouei kan la sakkubü aukabü, ngühkhüm hoba matjem shuong ai ki?’ 21Kheijinei kaneibü shou to lenashi, ‘Kün Ijep kaodaka Farao aaola lean kikei, hoba seneibü Bouei hau kibü ikei sen Ijep ka leiyenkei. 22Seneibü Bouei Ijep, Farao, hoba haoeibü chempen khümbo thükto, seneibü nyekei thedanga, tetsida hoba seikümseilei yaangbü hoba hatlamoklabü kümbei. 23Haoei sen leian loula hoba seneibü pisibou la kula thekubü kaodak sen la kula shanga, khüka sen leiyenkei. 24Hoba seneibü Bou to soumo hatla, ponpen sen maian kila shanga, hoba tat sühko kibü tegü sen lang phola shanga, seneibü Bouei habü ngühkhüm pendou kümla sen la sakkukei. 25Haoei sen la sakkubü tegü, künei seneibü Bou thedanga habü sakkubü ngühkhüm pendou jungeiko kümla longa, kho seneibü saopobü kilabü.’
