1 Thotrinchān 11

11 ¹Chieina Israel saikorana Hebronli Davidwuili rākazipta hānga, "Yanglu, ithum nawui ashee asāna. ²Khare kachāng, Saulna awunga sālakha, nana Israelli thānshokta thanung khame chi nana; kala nawui Avāna nali hānga, 'Nana iwui Israel mibingwui yao kahoma sāra; iwui Israel mibingwuitungli nana wungnao sāra.'"

³Israelwui khararnao saikorana Hebronli awungawuili rāhaowa; kala chi mikhorda Davidna athumli ithumwui Avāwui mangāli tuingashit sai. Chieina ithumwui Avāna Samuelwui eina hāngkahai thada, athumna Davidli Israel saikorawui awungda thao neomihaowa.

Davidna Zion khuikhui: Davidwui keinung

⁴David eina Israel saikorana Jerusalemli (chiya, Jebus) vai, apam chiwui kapān Jebusnaobing china pamsai. ⁵Jebuswui naobingna Davidli hānga, "Nana hili mazanglakmara." Kha Davidna Davidwui keinung kaji Zionwui raipan chi khuithuihaowa. ⁶Davidna hānga, "Kachikathāna Jebusnaobingli kharena sāthatra jiakha, akho kala kathāna ngasāra." Zeruiahwui nao Joabna kharena kāzanglaga akho ngasāhaowa. ⁷Davidna raipan chili pamhaowa; chiwui vang eina chi Davidwui keinung da hoi. ⁸Ana Millo eina thuilaga kuikhamarei phākho eina tangda keinung chi kuimareida sakāmi; kala Joabna keinung chi tākam hanmiluishita. ^a a v8 Millo chi Jerusalemwui zingshoshong phungpheili tanglon-tanglon ngaleiparna phumkhui sākahai apam akhana, keinung chi mataisang kala pangshap sākhavaina. ⁹Saikorawui Avāna ali ngasokhamiwui vang, Davidna matai-mataida pangshap kharei ngasāhaowa.

Davidli ngasozat kahai kapingabing

¹⁰Hibing hi Davidwui kapingabingwui kathānabingna, Israelwui pongli ithumwui Avāwui tui thada, Israel saikora ngasoda ali awunga sākhavai, awui wungramli ali pangshap sākahaibingna. ¹¹Hi Davidwui kapingabingwui mingna: Hachmonpa Jashobe-am, kapinga kathumwui akhona; ana awui kazei eina atam akhali mi shākathum sāthata. ¹²Awui thili Ahohpa Dodowui nao Eleazar chi kapinga kathumwui alungli akhana. ¹³Philistinenaobingna rai sākhavai yaoyi eina pemtinghai lui akhali kakazip tharan, ana Pas-dammimli Davidwui ngasoda pamsai; kala mibingna Philistinenaobingwui eina yāmhaowa, ¹⁴Kha athumna luilung chili nganingda machikālakmana, kala Philistinenaobingli sāthata; chithāda ithumwui Avāna hakmahālak khayui eina athumli huikhui.

¹⁵Thumrā kapingabingwui ngachaili kathum china, Philistinewui raimibing china Rephaim tampākli rairum rākasa chitharan, Adullamwui lungkhur pheili lunghārli Davidwuili tāhaowa. ¹⁶Atam chichangli Davidna raipanli pamsai; kala Philistinewui raimipam Bethlehemli leisai. ¹⁷Davidna tara̱ mangngaihaoda hānga, "Iyavo, kachikathāna Bethlehem keinungwui ngavei ngalem pheili khalei ra̱khong chieina tara̱ ili khuiungsi kaja jo!"

¹⁸Kathum china Philistinewui rairum kānzangda, Bethlehem keinungwui ngavei ngalem pheili khalei tara̱ asokkhuilaga Davidwuili khuiungmi. Kha ana mamangthuda ithumwui Avāli heishoka. ¹⁹Ana hānga, "Chithashara, iwui Avā! Manglā hamlaga kazata mibingwui ashee ina mangrala? Athumna manglā hamlaga hi khuirāmi." Chiwui vang ana tara̱ chi mangthu maningmana. Hi kapingabing kathum chinawui otsakna.

²⁰Joabwui achinā Abishaina thumrāwui khareiana. Ana awui kazei eina mi shākathumli rungthata, kala athum kathumwui ngachaili maikhayā mingla samphanga. ²¹Thumrāwui yākha ana khayā kāmeida, ana athumwui raithānme sai; kha athum kathumwui alungli maleimana.

²²Jehoiadawui naomayara Benaiah chi Kabzeelwui rai khamarāka kahai mi akhana; ana kasā kaphābing sāmi. Ana Moabwui khamarāka mi khani shaothata, kala horam thakthangli ana akhurli tāda kazingkha̱ akha rungthata. ²³Kala ana Egyptpa yarkhoka kahai mi akha shaothata; akho khuining phangā kasāng juiya, kala awui pāngli kazei kapem rikha akha singsai. Benaiahna khāmshui singda ali khavai, Egyptpawui pāng eina kazei chi angapaikhuida awui kazei eina ali shaothata. ^b b v23 Kapem hi rahli khalei thing kharakna; hili kazei zeipa̱ rik khamarāka meikap chi chitheikhavai singkahaina. ²⁴Hiya Jehoiadawui naomayara Benaiahwui otsakna; ana kapinga mi kathumwui ngachaili maikhayā mingla samphanga. ²⁵Thumrāwui yākha ana khayā kāmeida, kha athum kathumwui alungli maleimana. Davidna ali awui raikanmebingwui akhavā sāngasaka.

²⁶Kapinga raimibing chiya: Joabwui achinā Asahel, Bethlehemwui Dodowui nao Elhanan, ²⁷Harodpa Shammoth, Pelonpa Helez, ²⁸Tekoawui Ikkeshwui naomayara Ira, Anathotwui Abi-ezer, ²⁹Hushathpa Sibbecai, Ahohipa Ilai, ³⁰Netophahpa Maharai, Netophahpa Baanahwui naomayara Heled, ³¹Benjaminnaobingwui Gibe-ahpa Ribaiwui naomayara Ithai, Pirathonwui Benaiah, ³²Gaash kongwui Hurai, Arbathpa Abiel, ³³Baharumwui Azmaveth, Sha-albonpa Eliahba, ³⁴Gizonpa Hashemwui naomayarabing, Hararipa Shageewui naomayara Jonathan, ³⁵Hararipa Sacharwui naomayara Ahiam, Urwui naomayara Eliphal, ³⁶Mecherathpa Hepher, Pelonpa Ahijah, ³⁷Carmelwui Hezro, Ezbaiwui naomayara Naarai, ³⁸Nathanwui achinā Joel, Hagriwui naomayara Mibhar, ³⁹Ammonwui Zelek, Be-erothwui Naharai, Zeruiahwui naomayara Joabwui chāngvei phungme, ⁴⁰Ithriwui Ira, Ithriwui Gareb, ⁴¹Hitwui Uriah, Ahlaiwui naomayara Zabad, ⁴²Reubenpa Shizawui naomayara Adina, Reubennaobingwui kathāna, kala ali ngasoda thumrā, ⁴³Maacahwui naomayara Hanan, Mithnapa Joshaphat, ⁴⁴Ashteratpa Uzzia, Aroerpa Hothamwui naomayarabing Shama eina Je-iel, ⁴⁵Shimriwui naomayara Jedia-el, kala awui achinā Joha, Tizpa, ⁴⁶Mahapa Eliel, Elna-amwui naomayarabing Jeribai eina Joshaviah, Moabpa Ithmah, ⁴⁷Eliel, Obed, kala Mezobapa Ja-asiel.