1 ዜና መዋዕል 11

11 ¹ከዚያም እስራኤል ሁሉ በኬብሮን ወደ ዳዊት ተሰብስበው፣ “እነሆ፣ እኛ ዐጥንትህና ሥጋህ ነን። ²ቀድሞውንም ሳኦል ንጉሥ በነበረበት ዘመን፣ እስራኤልን ወደ ውጊያ የምታወጣና የምትመልስ አንተ ነበርህ። አባትህም፣ ‘ሕዝቤን እስራኤልን ትጠብቃለህ፤ በሕዝቤ በእስራኤል ላይ ገዥ ትሆናለህ’ ብሎ ነግሮሃል።”

³የእስራኤልም ሽማግሌዎች ሁሉ በኬብሮን ወደ ንጉሡ መጡ፤ ዳዊትም በአባታችን ፊት በኬብሮን ከእነርሱ ጋራ ኪዳን አደረገ። አባታችን በሳሙኤል በኩል እንደ ተናገረው፣ ዳዊትን በእስራኤል ላይ ንጉሥ አድርገው ቀቡት።

ዳዊት ጽዮንን ያዘ፤ የዳዊት ከተማ

⁴ዳዊትና እስራኤል ሁሉ ወደ ኢየሩሳሌም (ይኸውም ኢያቡስ) ሄዱ፤ በዚያም የምድሪቱ ነዋሪዎች የሆኑት ኢያቡሳውያን ይኖሩ ነበር። ⁵የኢያቡስ ሰዎችም ዳዊትን፣ “ወደዚህ አትገባም” አሉት። ዳዊት ግን የዳዊት ከተማ የሆነችውን የጽዮንን ምሽግ ያዘ። ⁶ዳዊትም፣ “ኢያቡሳውያንን መጀመሪያ የሚመታ ሁሉ አለቃና አዛዥ ይሆናል” አለ። የጽሩያ ልጅ ኢዮአብ መጀመሪያ ወጣ፤ አለቃም ሆነ። ⁷ዳዊትም በምሽጉ ተቀመጠ፤ ስለዚህ የዳዊት ከተማ ተባለ። ⁸ከሚሎ ጀምሮ እስከ ዙሪያው ቅጥር ድረስ ከተማይቱን በዙሪያዋ ሠራ፤ ኢዮአብም የቀረውን የከተማይቱን ክፍል አደሰ። ^a a v8 ሚሎ ከተማይቱን ለማስፋፋትና ለመደገፍ በኢየሩሳሌም ምሥራቃዊ ተዳፋት ላይ የተሠራ፣ በደረጃ የተሞላ ግንብ ነበር። ⁹የሰማይ ሠራዊት አባት ከእርሱ ጋራ ስለ ነበር፣ ዳዊት ከጊዜ ወደ ጊዜ እየበረታ ሄደ።

ከዳዊት ጋራ የቆሙት ኀያላን ሰዎች

¹⁰እንደ አባታችን በእስራኤል ላይ እንደ ተናገረው ቃል፣ ዳዊትን ንጉሥ ለማድረግ ከእስራኤል ሁሉ ጋራ በመንግሥቱ ጠንካራ ድጋፍ የሰጡት የዳዊት ኀያላን ሰዎች አለቆች እነዚህ ናቸው። ¹¹የዳዊት ኀያላን ሰዎች ዝርዝር ይህ ነው፦ የሦስቱ አለቃ የሆነው ሐክሞናዊው ያሦብዓም፣ በአንድ ውጊያ ጦሩን ተጠቅሞ ሦስት መቶ ሰዎችን ገደለ። ¹²ከእርሱ ቀጥሎ ከሦስቱ ኀያላን ተዋጊዎች አንዱ የሆነው አሖሓዊው የዶዶ ልጅ አልዓዛር ነበር። ¹³ፍልስጥኤማውያን ለውጊያ በዚያ በተሰበሰቡ ጊዜ፣ ገብስ በሞላበት ዕርሻ ውስጥ ከዳዊት ጋራ በጳስዳሚን ነበር፤ ሕዝቡም ከፍልስጥኤማውያን ፊት ሸሹ፤ ¹⁴እነርሱ ግን በዕርሻው መካከል ጸንተው ቆሙ፤ ተከላክለውም ፍልስጥኤማውያንን መቱ፤ አባታችንም በታላቅ ድል አዳናቸው።

¹⁵ከሠላሳው ዋነኞች ተዋጊዎች ሦስቱ ወደ ዳዊት በዓዶላም ዋሻ አጠገብ ወዳለው ዓለት ወረዱ፤ የፍልስጥኤማውያንም ጭፍራ በረፋይም ሸለቆ ሰፍሮ ነበር። ¹⁶በዚያን ጊዜ ዳዊት በምሽጉ ነበር፤ የፍልስጥኤማውያንም ጦር ሰፈር በቤተ ልሔም ነበር። ¹⁷ዳዊትም ውሃ ተመኝቶ፣ “በር አጠገብ ካለው ከቤተ ልሔም ጕድጓድ ውሃ የሚያጠጣኝ ሰው ቢኖር ኖሮ!” አለ።

¹⁸ሦስቱም በፍልስጥኤማውያን ሰፈር ውስጥ ሰብረው ገቡ፤ በር አጠገብ ካለው ከቤተ ልሔም ጕድጓድ ውሃ ቀድተው ወደ ዳዊት አመጡ። እርሱ ግን ሊጠጣው አልወደደም፤ ለአባታችን አፈሰሰው እንጂ። ¹⁹እንዲህም አለ፤ “አባቴ ይህን ይከልክለኝ! ነፍሳቸውን አደጋ ላይ የጣሉ ሰዎችን ደም ልጠጣ ይገባኛልን? ይህን ያመጡት ነፍሳቸውን አደጋ ላይ ጥለው ነውና።” ስለዚህ ሊጠጣው እንቢ አለ። የእነዚህ ሦስት ተዋጊዎች ሥራ ይህ ነበር።

²⁰የኢዮአብ ወንድም አቢሳ የሠላሳዎቹ አለቃ ነበር። ጦሩን ተጠቅሞ ሦስት መቶ ሰዎችን ገደለ፤ በሦስቱም መካከል ስም አተረፈ። ²¹ከሠላሳዎቹ ይልቅ የተከበረ ነበር፤ አዛዣቸውም ሆነ፤ ነገር ግን ከሦስቱ አንዱ አልነበረም።

²²ከቀብጽኤል የመጣ ጀግና ሰው የሆነው የዮዳሄ ልጅ በናያስ ታላላቅ ሥራዎችን አደረገ፤ ከሞዓብ ኀያላን ሁለቱን መታ፤ በረዶ በጣለበትም ቀን ወደ ጕድጓድ ወርዶ አንበሳ ገደለ። ²³ደግሞም ቁመቱ ሰባት ጫማ ተኩል የሚሆን ግዙፍ ሰው የሆነውን አንድ ግብፃዊ ገደለ፤ ግብፃዊውም እንደ ሸማኔ መሣፊያ የሆነ ጦር ይዞ ነበር። በናያስ ግን በበትር ወደ እርሱ ሄደ፤ ጦሩንም ከግብፃዊው እጅ ነጥቆ በራሱ ጦር ገደለው። ^b b v23 የሸማኔ መሣፊያ በሽመና መሥሪያ ውስጥ ያለ ከባድ የእንጨት ማንከባለያ ነበር፤ እዚህ ላይ እጅግ ወፍራም የሆነን የጦር እጀታ ለማመልከት ተጠቅሞበታል። ²⁴የዮዳሄ ልጅ የበናያስ ሥራዎች እነዚህ ነበሩ፤ በሦስቱም ኀያላን ሰዎች መካከል ስም አተረፈ። ²⁵ከሠላሳዎቹ ይልቅ የተከበረ ነበር፤ ነገር ግን ከሦስቱ መካከል አልነበረም። ዳዊትም በገዛ ጠባቂዎቹ ላይ ሾመው።

²⁶ኀያላኑ ተዋጊዎች እነዚህ ነበሩ፦ የኢዮአብ ወንድም አሣሄል፣ የቤተ ልሔሙ የዶዶ ልጅ ኤልሐናን፣ ²⁷ሐሮራዊው ሸሞት፣ ጴሎናዊው ሔሌጽ፣ ²⁸የቴቁሑ የዒቄሽ ልጅ ዒራ፣ የዓናቶቱ አቢዔዘር፣ ²⁹ሑሻታዊው ሲበካይ፣ አሖሓዊው ዒላይ፣ ³⁰የኔጦፋው መሐራይ፣ የኔጦፋው የበዓና ልጅ ሔሌድ፣ ³¹ከብንያማውያን ከጊብዓ የመጣው የሪባይ ልጅ ኢታይ፣ የጲርዓቶኑ በናያስ፣ ³²ከጋዓሽ ሸለቆዎች የመጣው ሑራይ፣ አርባታዊው አቢኤል፣ ³³የበሃሩሙ ዓዝማዌት፣ ሻዓልቦናዊው ኤሊያኅባ፣ ³⁴የጊዞናዊው የሐሼም ልጆች፣ ሐራራዊው የሻጌ ልጅ ዮናታን፣ ³⁵ሐራራዊው የሳካር ልጅ አኪአም፣ የዑር ልጅ ኤሊፋል፣ ³⁶መከራታዊው ሔፌር፣ ጴሎናዊው አኪያ፣ ³⁷የቀርሜሎሱ ሔጽሮ፣ የእዝባይ ልጅ ናዓራይ፣ ³⁸የናታን ወንድም ኢዮኤል፣ የሐግሪ ልጅ ሚብሐር፣ ³⁹ዓሞናዊው ጼሌቅ፣ የጽሩያ ልጅ የኢዮአብ የጦር ዕቃ ተሸካሚ የሆነው የቤሮቱ ናሕራይ፣ ⁴⁰ይትራዊው ዒራ፣ ይትራዊው ጋሬብ፣ ⁴¹ኬጢያዊው ኦርዮ፣ የአሕላይ ልጅ ዛባድ፣ ⁴²የሮቤላውያን መሪ የሆነው የሮቤላዊው የሺዛ ልጅ ዓዲና፣ ከእርሱም ጋራ ሠላሳ ሰዎች፣ ⁴³የመዓካ ልጅ ሐናን፣ ሚትናዊው ኢዮሣፍጥ፣ ⁴⁴ዓስታራታዊው ዑዝያ፣ የዓሮዔራዊው የሖታም ልጆች ሻማና የኢዔል፣ ⁴⁵የሺምሪ ልጅ ይድያኤል፣ ወንድሙም ቲጻዊው ዮሓ፣ ⁴⁶መሐዋዊው ኤሊኤል፣ የኤልናዓም ልጆች ኢያሪባይና ኢዮሻዊያ፣ ሞዓባዊው ይትማ፣ ⁴⁷ኤሊኤል፣ ዖቤድ፣ መጺባዊው ያዓሲኤልም።