ኵሎም እስራኤል ንዳዊት ንጉስ ንምቕባእ ተሓበሩ

ብዘለዉ እስራኤል ናብ ኬብሮን መፂኦም፥ ከምቲ ኣቦና ብሳሙኤል ዝበሎ፥ ንዳዊት ይቐብእዎ፤ ንሱ ኸዓ ነቲ ዕርዲ ኢያቡሳውያን ሒዙ ኸተማኡ ይገብሮ። መብዛሕትኡ እቲ ምዕራፍ ንተዋጋእቱ በብስሞም የኽብሮም — ንሱ ክሰትዮ ዝኣበዮ ማይ ምእንቲ ከምፅኡ ነቲ ሰፍ ፀላእቲ ዝሰንጠቑ ሰለስተ ሰባት ሓዊስካ።

ምዕራፍ 11።

ሽዑ ኵሎም እስራኤል ናብ ዳዊት ኣብ ኬብሮን ተኣከቡ፤ ከምዙይ ድማ በሉ፦ “እንሆ ንሕና ዓፅመ ስጋኻ ኢና። ቅድሚ ሕዚ እኳ፥ ሳኦል ንጉስ እንተሎ፥ ንእስራኤል ተመሪሕኻ እተውፅእን እተእትውን ኔርካ። ኣቦኻ ድማ ‘ንስኻ ንህዝበይ እስራኤል ክትጓስዮም ኢኻ፤ ኣብ ልዕሊ ህዝበይ እስራኤል ገዛኢ ክትከውን ኢኻ’ በለካ።”

ኵሎም ዓበይቲ እስራኤል ናብ ንጉስ ኣብ ኬብሮን መፁ፤ ዳዊት ድማ ኣብ ኬብሮን ኣብ ቅድሚ ኣቦና ምስኣቶም ኪዳን ኣተወ። ሽዑ ከምቲ ኣቦና ብሳሙኤል ዝበሎ፥ ንዳዊት ኣብ ልዕሊ እስራኤል ንጉስ ኪኖ ቀብእዎ።

ዳዊት ንፅዮን ሓዛ፦ ከተማ ዳዊት

ዳዊትን ኵሎም እስራኤልን ናብ ኢየሩሳሌም (ንሳ ኢያቡስ እያ) ከዱ፤ ኣብኡ ድማ እቶም ኣብኣ ዝነብሩ ኢያቡሳውያን ነበሩ። ሰብ ኢያቡስ ድማ ንዳዊት “ናብዙይ ኣይትኣቱን ኢኻ” በልዎ። ዳዊት ግና ነታ እምባ ፅዮን፥ ከተማ ዳዊት ሓዛ። ዳዊት ድማ “ንኢያቡሳውያን ቅድም ዝወቕዐ፥ ንሱ ርእስን ሓለቓን ይኸውን” በለ። ኢዮኣብ ወዲ ፅሩያ ቅድም ደየበ፤ ርእሲ ኸዓ ኮነ። ዳዊት ድማ ኣብታ እምባ ተቐመጠ፤ ስለዙይ ከተማ ዳዊት ተብሃለት። ካብ ሚሎ ጀሚሩ ኽሳዕ እቲ ዝዛረ መካበብያ ነታ ኸተማ ብዙርያ ነደቓ፤ ኢዮኣብ ከዓ ነቲ ዝተረፈ ኽፋል ከተማ ኣሐደሶ። ^a ዳዊት ድማ እናበርትዐ ኸደ፤ ኣቦ ሰራዊት ሰማይ ምስኡ ነበረ እሞ።

እቶም ምስ ዳዊት ዝቘሙ ጀጋኑ

እዚኣቶም ሓላቑ ጀጋኑ ዳዊት እዮም፤ ንሳቶም ከምቲ ኣቦና ብዛዕባ እስራኤል ዝበሎ፥ ምስ ኵሎም እስራኤል ኮይኖም ንጉስ ንምግባሩ፥ ኣብ መንግስቱ ኣበርቲዖም ደገፍዎ። ቍፅሪ ጀጋኑ ዳዊት ድማ እዙይ እዩ፦ ያሾብዓም ሓክሞናዊ፥ ርእሲ እቶም ሰለስተ፥ ብሓደ ጊዜ ብዂናቱ ሰለስተ ሚእቲ ሰብ ቀተለ። ድሕሪኡ ኸዓ ኣልኣዛር ወዲ ዶዶ ኣሖሓዊ፥ ካብቶም ሰለስተ ጀጋኑ ሓደ ነበረ። ንሱ ፍልስጥኤማውያን ኣብ ፋስደሚም ክዋግኡ ኣብኡ ተኣኪቦም እንተለዉ፥ ምስ ዳዊት ነበረ፤ እታ ግራት ድማ ብስገም መሊኣ ነበረት፤ እቶም ህዝቢ ኸዓ ካብ ቅድሚ ፍልስጥኤማውያን ሃደሙ፤ ንሳቶም ግና ኣብ ማእኸል እታ ግራት ቆይሞም ተኸላኸሉላ፤ ንፍልስጥኤማውያን ከዓ ወቕዕዎም፤ ኣቦናውን ብዓብዪ ምድሓን ኣድሐኖም።

ካብቶም ሰላሳ ሓለቑ ድማ ሰለስተ ናብ ዳዊት፥ ናብቲ ጥቓ በዓቲ ዓዱላም ዘሎ ኸውሒ ወረዱ፤ ጭፍራ ፍልስጥኤማውያን ከዓ ኣብ ለሰ ራፋይም ሰፊሮም ነበሩ። በቲ ጊዜ እቲ ዳዊት ኣብ ዕርዲ ነበረ፤ ዘብዐኛታት ፍልስጥኤማውያን ከዓ ኣብ ቤተ ልሔም ነበሩ። ዳዊት ድማ ማይ ተመነየ፤ “ካብቲ ኣብ ጥቓ ደገ ዘሎ ዔላ ቤተ ልሔም ማይ መን ኣስትየኒ!” በለ።

እቶም ሰለስተ ድማ ብሰፈር ፍልስጥኤማውያን ሰንጢቖም ኣተዉ፤ ካብቲ ኣብ ጥቓ ደገ ዘሎ ዔላ ቤተ ልሔም ማይ ቀድሑ፤ ናብ ዳዊት ድማ ኣምፅኡሉ። ንሱ ግና ክሰትዮ ኣይደለየን፤ ንኣቦና ኸዓ ከዓዎ። ንሱ ድማ “ኣቦይ ይሰውረኒ! ደም እዞም ብህይወቶም ተፃዊቶም ዘምፅእዎ ሰባትዶ ኽሰቲ? ብህይወቶም ተፃዊቶም ኣምፅእዎ እዮም እሞ” በለ። ስለዙይ ክሰትዮ ኣበየ። እዚ ነገር እዙይ ኸዓ እቶም ሰለስተ ጀጋኑ ገበርዎ።

ኣቢሳ ሓው ኢዮኣብ ድማ ሓለቓ እቶም ሰላሳ ነበረ። ንሱ ብዂናቱ ሰለስተ ሚእቲ ሰብ ቀተለ፤ ኣብ መንጎ እቶም ሰለስተ ኸዓ ስም ረኸበ። ካብቶም ሰላሳ ዝኸበረ ነበረ እሞ፥ ሓለቓኦም ኮነ፤ ግና ማዕረ እቶም ሰለስተ ኣይበፅሐን።

በናያስ ወዲ ዮዳሄ ኸዓ፥ ዓብዪ ስራሕ ዝሰርሐ ጅግና ሰብኣይ በዓል ቀብፅኤል ነበረ፤ ንሱ ካብ ሞኣብ ንኽልተ ኣዝዮም ሓያላት ወቕዖም፤ ብመዓልቲ በረድ ድማ ናብ ጕድጓድ ወሪዱ ንሓደ ኣንበሳ ቐተለ። ሓደ ግብፃዊ ሰብኣይ ድማ ቐተለ፤ ንሱ ዓብዪ ቑመት ዘለዎ፥ ሓሙሽተ እመት ዝቑመቱ ሰብ ነበረ፤ ዛብያ ዅናቱ ድማ ኽንዲ መጠቕለሊ ኣላማይ ነበረ። በናያስ ከዓ ብበትሪ ናብኡ ወሪዱ፥ ነቲ ዂናት ካብ ኢድ እቲ ግብፃዊ መንዚዑ፥ በቲ ዂናቱ ቐተሎ። ^b በናያስ ወዲ ዮዳሄ እዝ ነገር እዙይ ገይሩ ነበረ፤ ኣብ መንጎ እቶም ሰለስተ ጀጋኑ ኸዓ ስም ረኸበ። ካብቶም ሰላሳ ንላዕሊ ይኸብር ነበረ፤ ከምቶም ሰለስተ ግና ኣይኮነን። ዳዊት ከዓ ኣብ ልዕሊ ዘብዐኛታቱ ሸሞ።

እቶም ጀጋኑ ሰባት ድማ እዚኣቶም እዮም፦ ኣሳሄል ሓው ኢዮኣብ፥ ኤልያናን ወዲ ዶዶ ኻብ ቤተ ልሔም፥ ሻሞት ሓሮዳዊ፥ ሴሌስ ጴሎናዊ፥ ዒራስ ወዲ ዒቄሽ በዓል ቴቁሔ፥ ኣቢዔዘር በዓል ኣናቶት፥ ሴቦካይ ሑሳታዊ፥ ዒላይ ኣሖሓዊ፥ ማሃራይ በዓል ነጦፋ፥ ሔሌድ ወዲ በዓና በዓል ነጦፋ፥ ኢታይ፥ ወዲ ሪባ፥ ካብ ጊብዓ ደቂ ብንያም፥ በናያስ በዓል ጲርዓቶን፥ ሁራይ ካብ ሩባታት ገዓስ፥ ኣቢኤል በዓል ዓረባ፥ ዓዝሞት በዓል ባሑሪም፥ ኤልያሕባ በዓል ሸዓልቦና፥ ደቂ ሃሼም ጊዞናዊ፥ ዮናታን ወዲ ሻጌ ኣሮዳዊ፥ ኣምናን ወዲ ሳካር ኣሮዳዊ፥ ኤሊፋል ወዲ ኡር፥ ኤፌር መከራታዊ፥ ኣኪያ ጴሎናዊ፥ ሓፅሮ በዓል ቀርሜሎስ፥ ናዓራይ ወዲ ኤዝባይ፥ ኢዩኤል ሓው ናታን፥ ሚብሓር ወዲ ሃግሪ፥ ፄሌቅ ኣሞናዊ፥ ነሓራይ ብዔሮታዊ፥ እቲ ኣፅዋር ኢዮኣብ ወዲ ፅሩያ ዝፆር፥ ዒራስ ይትራዊ፥ ጋሬብ ይትራዊ፥ ኦርዮ ሔታዊ፥ ዛባድ ወዲ ኣሕላይ፥ ዓዲና ወዲ ሺዛ ሩቤናዊ፥ ሓለቓ ሩቤናውያን፥ ሰላሳ ድማ ምስኡ፥ ሓናን ወዲ መዓካ፥ ኢዮሳፋጥ ሚትናዊ፥ ዑዝያ ኣሽታራዊ፥ ሻማን ኢዩኤልን ደቂ ሆታም ዓሮዔራዊ፥ የድዒኤል ወዲ ሺምሪ፥ ዮሃ ሓዉ ድማ፥ ቲፃዊ፥ ኤሊኤል ማሃዋዊ፥ የሪባይን ዮሻውያን ደቂ ኤልናዓም፥ ይትማ ሞኣባዊ፥ ኤሊኤልን ኢዮቤድን የዓሲኤል ሜፆባዊን።