1 ዜና መዋዕል 10

10 ¹ፍልስጥኤማውያን ከእስራኤል ጋራ ተዋጉ፤ የእስራኤልም ሰዎች ከፊታቸው ሸሹ፤ በገለቦዓ ተራራ ላይ ተገድለው ወደቁ። ²ፍልስጥኤማውያን ሳኦልንና ልጆቹን አሳደዱ፤ የሳኦልንም ልጆች ዮናታንን፣ አቢናዳብንና መልኪ ሱዓን ገደሉ። ³ጦርነቱ በሳኦል ዙሪያ እጅግ ጸና፤ ቀስተኞችም ደረሱበት፤ ክፉኛም አቈሰሉት። ⁴ሳኦልም ጋሻ ጃግሬውን፣ “ሰይፍህን መዝዘህ ውጋኝ፤ አለዚያ እነዚህ ያልተገረዙ መጥተው ያንገላቱኛል” አለው። ነገር ግን ፈርቶ እምቢ አለ። ስለዚህ ሳኦል ራሱ ሰይፉን ወስዶ በላዩ ወደቀ።

⁵ጋሻ ጃግሬውም ሳኦል እንደ ሞተ ባየ ጊዜ፣ እርሱ ደግሞ በሰይፉ ላይ ወድቆ ሞተ። ⁶እንዲሁም ሳኦል፣ ሦስቱ ልጆቹና ቤተ ሰዎቹ ሁሉ አብረው ሞቱ።

⁷በሸለቆው የነበሩ እስራኤላውያን ሰራዊቱ መሸሹንና ሳኦልም ልጆቹም መሞታቸውን ባዩ ጊዜ፣ ከተሞቻቸውን ትተው ሸሹ። ፍልስጥኤማውያንም መጥተው በእነርሱ ውስጥ ሰፈሩ።

⁸በማግስቱም ፍልስጥኤማውያን የሞቱትን ሊዘርፉ መጡ፤ ሳኦልንና ልጆቹን በገለቦዓ ተራራ ላይ ወድቀው አገኙ። ⁹ገፈፉትም፤ ራሱንና የጦር ዕቃውን ወሰዱ፤ ለጣዖቶቻቸውና ለሕዝቡ እንዲያወሩ በፍልስጥኤም ምድር ሁሉ መልእክተኞችን ላኩ። ¹⁰የጦር ዕቃውንም በአማልክቶቻቸው ቤተ መቅደስ ውስጥ አኖሩ፤ ራሱንም በዳጎን ቤተ መቅደስ ቸነከሩ።

¹¹የገለዓድ ኢያቢስ ሰዎች ሁሉ ፍልስጥኤማውያን በሳኦል ያደረጉትን ሁሉ በሰሙ ጊዜ፣ ¹²ጦረኞቻቸው ሁሉ ተነሥተው የሳኦልንና የልጆቹን ሬሳ ወሰዱ፤ ወደ ኢያቢስም አመጧቸው፤ አጥንቶቻቸውንም በኢያቢስ የአድባር ዛፍ ሥር ቀበሩ፤ ሰባት ቀንም ጾሙ።

¹³እንግዲህ ሳኦል በአባታችን ላይ ታማኝ ባለመሆኑ ሞተ፤ የአባታችንን ቃል አልጠበቀም፤ መመሪያም ለማግኘት መናፍስት ጠሪን አማከረ። ¹⁴አባታችንን አልፈለገም፤ ስለዚህ አባታችን ገደለው፤ መንግሥቱንም ለእሴይ ልጅ ለዳዊት አስረከበ።