1 Kwonik 10 FHB Father's Heart Bible™

10 ¹Filisten yo t'ap goumen ak pèp Izrayèl la; sòlda pèp Izrayèl yo kouri devan yo, anpil ladan yo tonbe mouri sou mòn Gilboa. ²Filisten yo kouri dèyè Sayil ak pitit gason l yo, yo touye Jonatan, Abinadab ak Malkichwa, pitit gason Sayil yo. ³Batay la vin cho toupatou bò kote Sayil; moun k'ap tire flèch yo jwenn li, yo blese l byen grav. ⁴Sayil di gad ki t'ap pote zam li a: “Rale nepe ou, pèse m avè l, san sa moun sa yo ki pa sikonsi va vini pou yo pase m nan betiz.” Men, gad la refize, li te pè. Se konsa Sayil pran nepe a li menm, li lage kò l sou li.

⁵Lè gad ki t'ap pote zam li a wè Sayil mouri, li menm tou li lage kò l sou nepe pa l, li mouri. ⁶Se konsa Sayil mouri, ansanm ak twa pitit gason l yo, tout moun lakay li mouri ansanm.

⁷Lè moun pèp Izrayèl ki te nan fon an wè lame a te kouri, epi Sayil ak pitit gason l yo te mouri, yo kite lavil yo, yo kouri ale. Filisten yo vini, yo tabli ladan yo.

⁸Nan denmen, Filisten yo vini pou yo depouye kadav yo, yo jwenn Sayil ak pitit gason l yo tonbe sou mòn Gilboa. ⁹Yo depouye l, yo pran tèt li ak zam li, yo voye mesaje toupatou nan peyi Filisten yo pou anonse nouvèl la bay zidòl yo ak pèp la. ¹⁰Yo mete zam li yo nan tanp bondye yo, yo kloure tèt li nan tanp Dagon an.

¹¹Men, lè tout moun lavil Jabès nan peyi Galarad tande tou sa Filisten yo te fè Sayil, ¹²tout vanyan sòlda yo leve, yo pran kò Sayil ak kò pitit gason l yo, yo pote yo lavil Jabès, yo antere zo yo anba pye bwadchenn Jabès la, epi yo fè jèn pandan sèt jou.

¹³Se konsa Sayil mouri poutèt li pa t kenbe pawòl li ak Papa nou—li pa t obeyi pawòl Papa nou an, li menm al konsilte yon moun k'ap rele mò pou mande l konsèy. ¹⁴Li pa t chèche Papa nou, se poutèt sa Papa nou touye l, li renmèt wayòm nan bay David, pitit gason Izayi a.