1 Mga Cronica 10

10 ¹Nakipaglaban ang mga Filisteo sa Israel; ang mga kalalakihan ng Israel ay tumakas sa harap nila at nangamatay na napatay sa Bundok ng Gilboa. ²Hinabol ng mga Filisteo si Saul at ang mga anak niya, at pinatay sina Jonatan, Abinadab, at Malchisua, na mga anak ni Saul. ³Tumindi ang labanan sa palibot ni Saul; naabutan siya ng mga mamamana at malubha siyang nasugatan. ⁴Sinabi ni Saul sa tagadala ng kanyang sandata, “Bunutin mo ang iyong espada at saksakin mo ako, at nang hindi dumating ang mga lalaking di-tuli na ito at abusuhin ako.” Ngunit tumanggi ito, sapagkat natatakot. Kaya't kinuha ni Saul ang espada at nagpakabuwal dito.

⁵Nang makita ng tagadala ng kanyang sandata na patay na si Saul, nagpakabuwal din ito sa kanyang espada at namatay. ⁶Kaya't namatay si Saul, at ang tatlo niyang anak, at ang buong sambahayan niya ay sama-samang namatay.

⁷Nang makita ng mga Israelita sa lambak na tumakas na ang hukbo at patay na sina Saul at ang mga anak niya, iniwan nila ang kanilang mga bayan at tumakas. Dumating ang mga Filisteo at tumira roon.

⁸Kinabukasan, dumating ang mga Filisteo upang samsamin ang mga patay at natagpuan nila sina Saul at ang mga anak niya na nakabuwal sa Bundok ng Gilboa. ⁹Hinubaran nila siya, kinuha ang kanyang ulo at sandata, at nagpadala ng mga sugo sa buong lupain ng mga Filisteo upang ipahayag ito sa kanilang mga diyus-diyosan at sa mga tao. ¹⁰Inilagay nila ang kanyang mga sandata sa templo ng kanilang mga diyos at ipinako ang kanyang ulo sa templo ni Dagon.

¹¹Ngunit nang marinig ng lahat ng taga-Jabes-gilead ang lahat ng ginawa ng mga Filisteo kay Saul, ¹²lahat ng kanilang mga mandirigma ay humayo, kinuha ang bangkay ni Saul at ang mga bangkay ng kanyang mga anak, dinala ang mga ito sa Jabes, inilibing ang kanilang mga buto sa ilalim ng punong owk sa Jabes, at nag-ayuno nang pitong araw.

¹³Kaya't namatay si Saul dahil sa kanyang kataksilan laban sa ating Ama—hindi niya iningatan ang salita ng ating Ama, at sumangguni pa sa isang espiritista para sa patnubay. ¹⁴Hindi niya hinanap ang ating Ama, kaya't pinatay siya ng ating Ama at ibinigay ang kaharian kay David na anak ni Jesse.