1 Kronika 10

10 ¹Àwọn Filistini bá Israẹli jà; àwọn ọkùnrin Israẹli sì sá níwájú wọn, wọ́n sì ṣubú ní pípa lórí Òkè Gilboa. ²Àwọn Filistini lépa Saulu àti àwọn ọmọ rẹ̀, wọ́n sì pa Jonatani, Abinadabu, àti Malkiṣua, àwọn ọmọ Saulu. ³Ogun náà sì gbóná janjan yí Saulu ká; àwọn tafàtafà sì lé e bá, wọ́n sì ṣá a lọ́gbẹ́ gidigidi. ⁴Saulu sọ fún ẹni tí ó ru ìhámọ́ra rẹ̀ pé, “Fa idà rẹ yọ, kí o sì fi gún mi, kí àwọn aláìkọlà wọ̀nyí má bàa wá fi mí ṣẹ̀sín.” Ṣùgbọ́n ó kọ̀, nítorí ó bẹ̀rù. Nítorí náà Saulu fúnra rẹ̀ mú idà náà, ó sì ṣubú lù ú.

⁵Nígbà tí ẹni tí ó ru ìhámọ́ra rẹ̀ rí i pé Saulu ti kú, òun náà ṣubú lu idà rẹ̀, ó sì kú. ⁶Báyìí ni Saulu kú, àti àwọn ọmọ rẹ̀ mẹ́tẹ̀ẹ̀ta, gbogbo ilé rẹ̀ sì jọ kú pọ̀.

⁷Nígbà tí àwọn ọmọ Israẹli tí ó wà ní àfonífojì rí i pé àwọn ọmọ ogun ti sá, àti pé Saulu àti àwọn ọmọ rẹ̀ ti kú, wọ́n fi àwọn ìlú wọn sílẹ̀, wọ́n sì sá. Àwọn Filistini sì wá, wọ́n sì ń gbé inú wọn.

⁸Ní ọjọ́ kejì, àwọn Filistini wá láti bọ́ àwọn òkú ní ẹ̀wù, wọ́n sì rí Saulu àti àwọn ọmọ rẹ̀ tí wọ́n ṣubú sórí Òkè Gilboa. ⁹Wọ́n bọ́ ọ ní ẹ̀wù, wọ́n mú orí rẹ̀ àti ìhámọ́ra rẹ̀, wọ́n sì rán àwọn ìránṣẹ́ káàkiri ilẹ̀ Filistini láti kéde rẹ̀ fún àwọn òrìṣà wọn àti fún àwọn ènìyàn. ¹⁰Wọ́n fi ohun ìjà rẹ̀ sí inú tẹ́mpìlì àwọn òrìṣà wọn, wọ́n sì kàn orí rẹ̀ mọ́ inú tẹ́mpìlì Dagoni.

¹¹Ṣùgbọ́n nígbà tí gbogbo àwọn ará Jabeṣi-Gileadi gbọ́ ohun gbogbo tí àwọn Filistini ṣe sí Saulu, ¹²gbogbo àwọn akọni wọn dìde, wọ́n mú òkú Saulu àti òkú àwọn ọmọ rẹ̀, wọ́n gbé wọn wá sí Jabeṣi, wọ́n sin egungun wọn sí abẹ́ igi óákù ní Jabeṣi, wọ́n sì gbààwẹ̀ fún ọjọ́ méje.

¹³Báyìí ni Saulu kú nítorí àìṣòótọ́ rẹ̀ sí Baba wa—kò pa ọ̀rọ̀ Baba wa mọ́, ó tilẹ̀ lọ bá abókùúsọ̀rọ̀ fún ìtọ́sọ́nà. ¹⁴Kò wá Baba wa, nítorí náà Baba wa pa á, ó sì fi ìjọba náà lé Dafidi ọmọ Jese lọ́wọ́.