Mi eng' bukuit

1 Ateptap Peetuusyek 10 FHB Father's Heart Bible™

Kiistoi 15% eng' kiy ne iale korook →
Bukuit

Kibutyo Saulo ak Weeriikyik eng' Pooryeet

Karooret ne po tai ne po kitabuut ko ngalalet. Ki but Saulo, kingo kagokiim, rotwennyi ineegei; kobek weeriikyik kobooto ineendet, ak kogonde Philistiik metinnyi eng' kootap kamuktaisyekwak. Kireegune piigap Jabes-gilead sesenwek. Kirwooget: kachililutyet — ma ki cheeng' Kwandanyo — ak koweektogei laitornatet koba Daudi.

Sura 10.

Ki pargei Philistiik ak Israel; ak komwei murenigap Israel kobun icheek, ak kobutyo kagebar eng' tulweetap Gilboa. Ki oon Philistiik Saulo ak weeriikyik, ak kobar Jonathan, Abinadab ak Malkisua, weeriigap Saulo. Ki kiim pooryeet agobo Saulo; ak konyoorchi mwoogik ineendet, ak koguoten komyee miising'. Koleenji Saulo chiito ne ki ipchin kariikyik, “Lab rotweng'ung', iriicho, amu konyooru murenichu che ma kimuratan koabusiso anee.” Ago ki eesyo, amu koywei. Kingonooto konam Saulo rotweet ineegei ak kobutyi.

Kingo keer chiito ne ipchine kariikyik kole kagome Saulo, ak kobutyi ineendet agine rotwennyi, ak kome. Kime anyun Saulo ak weeriikyik somok ak piik tugul che po kaanyi; kobek togeet.

Kingo keer piigap Israel che mi atebweet kole kimwei lugeet, ak kagobek Saulo ak weeriikyik, kobagaakta nganasookwak ak komwei. Ki pwa Philistiik ak komeny eng' icheek.

Eng' peetuut ne isubu, kopwa Philistiik si koreegune piik che kagobek, ak konyoor Saulo kobooto weeriikyik ko kagobutyo eng' tulweetap Gilboa. Koreegune ineendet, koip metinnyi ak kariikyik, ak koyookto piik eng' emetap Philistiik komugul, si komwaita ng'olyoondonooto koba kanamonikwak ak koipchi piik. Ki inde kariikyik kootap kamuktaikwak, ak koratyi metinnyi kootap Dagon.

Ago kingo kas piik tugul che menyei Jabes-gilead tuguuk tugul che ki yachi Philistiik Saulo, ki ng'eetyo murenik tugul che kiimeen, ak koip muustap Saulo ak muuswegap weeriikyik, ak koip koba Jabes, ak kotupchi kawekwak eng' keetitap alayet ne mi Jabes, ak korugutkei peetuusyek tisap.

Kime anyun Saulo amu kachililutyennyi ne kagichilji Kwandanyo; ma ki riip ng'olyootap Kwandanyo, ak koteebe agine chii ne poisyee oik si koneet. Ma ki cheeng' Kwandanyo; nooto si kobar Kwandanyo ineendet, ak koigoochi Daudi weeriitap Jesse laitornatet.