Saul le basa rwan kraan bi ket basuiye
Chongdip om chong hung hung ga kraan daannu gaye. Saul na, kraan bi kanatga, bahak kachaak chem chung bi ket basuiwe; basa rwan maan le diga thi drwe khatle Philistine rwanna bating lu ding bani om ri katha om kalum in bi thinzum na zam thang rwe. Jabesh-gilead mi nunna bapum bing ga lou han rwe. Bachu katak ga: balumsa maknu—maanna ani Pa khou han make—khatle krwang ga David khou han hung rwe.
10 1Philistine rwanna Israel maitwang bi kraan katwak rwe; Israel sa rwanna bani meithaan bina pak thouluga Gilboa Rammwan la athat tamnu ga ta thang drwe. 2Philistine rwanna Saul le basa rwan ding rai dam rwe, khatle Saul sa rwan Jonathan, Abinadab, khatle Malchishua ding athat sat rwe. 3Saul om raan bi kraan ga kanatnu ga hung rwe; thanri kaapnu rwanna Saul ding nai louluga taswang khakka bazam thang rwe. 4Saul na baom kraan kutchoi pwannu manpa khou rinne, “Nachaak chem ga choiluga ating thun thouro, ati mak tabe heiba mun rom maknu mi rwanna hungluga ating rai thang nge.” Atiyeda maan kachiga za mak ngaake. Atibriakpina Saul na maan tatoga kachaak chem ga louluga haba chung bi ket basui drwe.
5Baom kraan kutchoi pwannu manpa na Saul thi drwe dinu munu kaan bi, maan le baom kachaak chem chung bi ket basuiluga thi drwe. 6Hadanga Saul le, basa kapaisa pat thum le, khatle baom in inkhun brumza le, bachamga thi drwe.
7Tuiqwa bi ongnu Israel sa rwanna kraanmi rwan ga pak thou drwe khatle Saul le basa rwan le thi drwe dinu munu kaan bi, banina bani om namlian bing ga bathan satluga pak thou drwe. Philistine rwanna hungluga haba bing bi ong ngaake.
8Inswan lampai, Philistine rwanna thinu nun ding pwan lwak sat lang hungluga, Gilboa Rammwan la ket basui ongnu Saul le basa rwan ding mu rwe. 9Banina bating pwan lwak satluga, balu le kraan kutchoi ga louluga, bani om ri katha nun khatle mi nun khou pao swak lang Philistine taram bing bi chonglang rwan ding thang lat rwe. 10Banina baom kraan kutchoi ga bani om rikrwang nun om kalum in bi thangluga, balu ga Dagon om kalum in bi bang thang rwe.
11Atiyeda Jabesh-gilead om mi nun brumzana Philistine rwanna Saul khou to thang damnu bing ga ngaisunu kaan bi, 12bani om kraanmi rwan brumza ga thouluga, Saul om bapum khatle basa rwan om bapum bing ga louluga, Jabesh la pwan hungluga, bani om baru bing ga Jabesh om oak kung thwei bi kairi thangluga, lumik siari balung kalumsan drwe.
13Hadanga Saul ga ani Pa khou baom balumsa maknu lang bina thi drwe—maanna ani Pa om chong ga ngaak mak ngaake, khatle lampui zong lang khei katha pwan to ongnu mannu khou chong kathui ngaake. 14Maanna ani Pa ding zong mak ngaake, atibriakpina ani Pa na Bating athat satluga krwang talei ga Jesse sa kapaisa David khou choi thang rwe.