Kapinga Raimibing Ziklagli Davidli Rangalengser
David yāmkhangachāng atamli mibingna ali ngarāda vāchinga: Saulwui shang amāngwui eina kharā, pāng khani eina kāpthei Benjaminshi, khayongla mangā kathā Gadshi, tara kaphāk Jordan kasāk mibing, kala atam kathei Issacharwui mibing. Hebronli shangbing pangshap eina rāhaowa, athumwui Avāna ali kanmi da hānga, kala Israel ningshitkhaowa.
12 1Davidna Kishwui naomayara Saulwui pāngli vāthukmalak tharan, Ziklagli Davidwuili rāsā mibing chi hina; athum raili ali ngachonmi kapinga raimibingna. 2Athum malā shaneikhuida, yāpang lah uithap eina shairong eina lunggui kapza̱ lah malā kāp theibingna; athum Benjaminnaobing, Saulwui theisābingna. 3Ahiezerna wungva̱na, chieina Joash, Gibeahli khalei Shemaahwui naomayarabing; Azmavethwui naomayarabing Jeziel kala Pelet; Beracah; Anathothli khalei Jehu; 4Gibeonli khalei Ishmaiah, thumrā chiwui ngachaili kapinga raimi akha, thumrā chiwui kathāna; Jeremiah, Jahaziel, Johanan, Gederahpa Jozabad; 5Eluzai, Jerimoth, Bealiah, Shemariah, kala Haruphpa Shephatiah; 6Elkanah, Isshiah, Azarel, Joezer, kala Jashobe-am, athum Korahshina; 7kala Gedorli khalei Jerohamwui naomayarabing Joelah kala Zebadiah.
8Gadwui mibing kaikhana lamhāngli khalei raipanlungli Davidwui shong latunghaowa; athum raiwui vang tamchitheiser kapinga raimibing, chāngvei kala kazei them-kathembing, athumwui amai kazingkha̱ thāda, kaphunglila seichui thāda kathākabingna. 9Ezerna wungva̱na, Obadiahna kakhanena, Eliabna kakathumana, 10Mishmannahna khamatena, Jeremiahna kaphangāna, 11Attaina katharukana, Elielna kashinena, 12Johananna kachishatana, Elzabadna kachikona, 13Jeremiahna katharāna, Machbannaina tharāda kharena. 14Hibing Gad shiwui raithānabingna; kateo china shākhali ngaraichā, kala reimeikap china thing khali ngaraichā. 15Hi kachāng khareli, chiwui kongphei saikora tara̱ pemda longa tharan, Jordan makānlaga zingshong eina zingtunshong tampākli khalei mi saikorali yui mibingna.
16Benjamin kala Judahwui mibing kaikhanala Davidwui pāngli raipanlungli rāsahaowa. 17Davidna athumli samphang khavai shokta hānga, "Nathum ili ngachonmi khavai chingri kahaina rāsākha kaje, iwui ning nathumli ngashikkhasāra; kha iwui yangkashebingli ili yansai khavaina rāsākha kaje, iwui pāngli khayon maleilala, ithumwui shāvā ngarāwui Varena chi theilaga nathumli bichar sāranu." 18Chieina ithumwui Avāwui Manglāna thumrā chiwui kathāna Amasaili ngavaimida, ana hānga: "David, ithum nawuina! Jessewui nao, ithum nali ngasoda leira! Chingri kahai, chingri kahai nali, nawui khangachonbingli chingri kahai, kaja nawui Avāna nali ngachona." Davidna athumli samphangda, awui khangaponbingwui kathānabing sākhui.
19Davidna Philistinenaobingli ngasoda Saulli rai sā khavai vātharan, Manassehwui eina kaikhana Davidli yāmhaowa. Kha Davidna eina awui mibingna Philistinenaobingli ngachon makhamimana; kaja Philistinewui wungnaobingna ngasanlaga, "Ana awui akhavā Saulli yāmhaira, kala ithumwui akui rangkakhuira" da hāngda, Davidli hanung ngasakhaowa. 20A Ziklagli vātharan, Manassehwui eina hibingna ali yāmhaowa: Adnah, Jozabad, Jedia-el, Michael, Jozabad, Elihu, Zillethai; athum Manassehwui thingthingwui kathānabingna. 21Athumna khangaponbingli khangarar tharan Davidli ngachonmi, kaja athum saikora rai kapingpinga mimānga, kala awui raimibingwui alungli kathānabing ngasāhaowa. 22Thangkachida mibing Davidli ngachon khavai rāhaowa, chithāda awui raimibing ithumwui Avāwui raimibing thāda kachungkha ngasāhaowa.
23Hi ithumwui Avāna hāngkahai thada Saulwui wungram chi Davidli ngasakhui khavai Hebronli Davidli rākazipta raiwui vang shaksākahai mibingwui shānkakhui chi hina: 24Judahshiwui eina chāngvei kala kazei singda raiwui vang shaksākahai mi thing tharuk shāchishat; 25Simeonwui eina, rai kapingpinga raiwui vang ngarān kahai mi thing shini shākhana; 26Levinaobingwui eina thing mati shātharuk, 27Aaronwui shimkhurwui kathāna Jehoiada, kala ali ngasoda thing kathum shāshini, 28kala rai kapinga yaronnao Zadok eina awui shimkhurwui otva̱bing maga̱da khani. 29Benjaminwui eina, Saulwui theisābing thing kathum; athumwui ngachaili kachungkhana aruila Saulwui shimwui vang khamayona sai, 30Ephraimwui eina athum shimkhurwui alungli aming kazata rai kapingpinga mi thing maga̱ shāchishat; 31Manasseh shang ngayarpakwui eina rālaga Davidli awunga sāngasak khavai aming eina hāngkahai mi thing tharāda chishat; 32Issacharshiwui eina: atam theishingkakhui, kala Israelna khi sāra kaji thei kathānabing shākhani; kala athumwui theisābing saikora athumwui hāngwui azingli sai. 33Zebulunshiwui eina: rai vatheiran kathethema, raiwui zeighai kachiva̱ eina ngarān kahai, ning tharchao Davidli ngachon khavai ngarān kahai raimibing thing hangphangā, 34Naphtaliwui eina otva̱bing thing kha, kala athumwui ngasoda chāngvei kala kazei singda mi thing thumrāda shini; 35Danshiwui eina, raiwui vang ngarān kahai mi, mashing thing maga̱da shet shātharukna; 36Ashershiwui eina, rai vatheiran kathethema kala raiwui vang ngarān kahai raimibing, mashing thing hangmatina; 37Jordan kānda zingshoshongwui Reuben, Gad, kala Manasseh shang tangkhaiwui eina raiwui zeighai saikora eina shaksā kahai mi, mashing thing shākha maga̱na.
38Hibing saikora hi raiwui vang shakkasā kahai raikapingabingna, Israel saikorawuitungli Davidli awunga sākhavai ningtonglak eina Hebronli rāhaira; kala Israelwui katai saikorala Davidli awunga sākhavai ning akha sāhaowa. 39Athumna chili Davidli ngasoda phāshak phāzāda zimiksho kathumthang pamsai; kaja athumwui achinābingna athumwui vang kashakazā ngarānhaira. 40Athumwui khongnainao, Issachar, Zebulun, kala Naphtali vāshungda, gadhā, ut, katong gadhā, kala sei eina kashakazā, mathir, khaorāthei khamui, drakhāthei khamui, drakhāra̱, thao, sha̱kei, kala yao mavātla khuirāmi; kaja Israelli ringkaphā leihaowa.
