اول تواريخ 12 FHB Father's Heart Bible™

12 ¹دا هغه سړي دي چې کله داؤد لا تر اوسه د قيس د زوئ ساؤل د مخې نه منع شوے وو، نو په ضِقلاع کښې هغۀ ته راغلل، دا زورور جنګيالي وُو چې په جنګ کښې يې د هغۀ مدد وکړو. ²دوئ په لينده سمبال وُو او کولے يې شوه چې په ښي او کيڼ لاس سره غوزنګ وغورزوى او يا ولونه ولي، دا د بنيامين د قبيلې وُو، د ساؤل خپلوان وُو. ³اخيعزر سردار وو، بيا يوآش، دا دواړه د جبعه د شماعه زامن وُو، او يزيئيل او فلط چې د عزموت زامن وُو، او براکه او د عنتوت يِيهُو، ⁴او د جِبعون اِسمعياه چې د دېرشو جنګيالو په مينځ کښې يو زورور جنګيالے او پر دېرشو باندې سردار وو، او يرمياه، يحزئيل، يوحنان او د جدېره يوزاباد، ⁵اِلعوزى، يريموت، بعلياه، شمرياه او حروفي شفطياه، ⁶اِلقانه، يِشِياه، عزرئيل، يوعزر او يشُبعام چې د قورح د کورنۍ وُو، ⁷او يوعيله او زبدياه چې د جدور د يروحام زامن وُو.

⁸د جد د قبيلې ځنې سړي په بيابان کښې په قلعه کښې داؤد ته راغلل، دا زورور جنګيالي وُو چې د جنګ دپاره روزل شوي وُو، په ډال او نېزه کښې ماهر وُو، مخونه يې د زمريانو غوندې او د غرونو هوسيو غوندې چټک وُو. ⁹عزر سردار وو، عوبدياه دوېم، اِلياب دريم، ¹⁰مِشمنه څلورم، يرمياه پينځم، ¹¹عتى شپږم، اِلى‌ئيل اووم، ¹²يوحنان اتم، اِلزاباد نهم، ¹³يرمياه لسم او مکبنى يوولسم وو. ¹⁴دا د جد قبيلې خلق د لښکر سردارانو وُو، تر ټولو کمزورے يې د سلو سره او تر ټولو زورور يې د زرو سره برابر وو. ¹⁵دا هغه سړي دي چې په اولې مياشت کښې چې کله د اُردن سيند په خپلو ټولو غاړو راوتلے وو، نو دوئ ترې واوښتل او په دښتو کښې يې ټول خلق، چې په ختيځ او لوېديځ کښې وُو، وتښتول.

¹⁶د بنيامين او يهوداه د قبيلو ځنې سړي هم په قلعه کښې داؤد ته راغلل. ¹⁷داؤد د دوئ د مخه لاړو او ورته يې ووئيل چې، ”کۀ تاسو زما مدد کولو دپاره په سلامتۍ سره ما ته راغلي يئ، نو زما زړۀ به له تاسو سره يوځائ شى، خو کۀ تاسو ما زما دُښمنانو ته په دوکه ورکولو دپاره راغلي يئ، که څۀ هم زما په لاسونو کښې کوم ظلم نشته، نو زمونږ د پلرونو خُدائ پاک دې دا وګورى او ستاسو انصاف دې وکړى.“ ¹⁸بيا د زمونږ پلار روح په عماساى باندې چې د دېرشو سردار وو راغلو، او هغۀ ووئيل چې، ”اے داؤده، مونږ ستا يُو! اے د يسى زويه، مونږ له تا سره يُو! تا له سلامتى، سلامتى دې وى او ستا مددګارو له دې سلامتى وى، ځکه چې ستا پلار ستا مدد کوى.“ داؤد دوئ قبول کړل او د خپلو چپاؤ وهونکو مشران يې کړل.

¹⁹کله چې داؤد د فلستيانو سره د ساؤل پر خلاف جنګ ته روان وو، نو د منسى د قبيلې ځنې سړي هغۀ ته راغلل. خو داؤد او د هغۀ سړو د فلستيانو کوم مدد ونۀ کړو، ځکه چې د فلستيانو سردارانو مشوره وکړه او داؤد يې بيرته ولېږلو، او ورته يې ووئيل چې، ”هغه به خپل مالِک ساؤل ته لاړ شى، او دا به زمونږ د سرونو په بيه تمام شى.“ ²⁰کله چې هغه ضِقلاع ته روان وو، نو د منسى د قبيلې نه دا سړي هغۀ ته راغلل، عدناه، يوزاباد، يديعئيل، ميکائيل، يوزاباد، اليهُو او ضِلتى، دا د منسى د زرو زرو سردارانو وُو. ²¹دوئ د چپاؤ وهونکو پر خلاف د داؤد مدد وکړو، ځکه چې دا ټول زورور جنګيالي وُو او د هغۀ په لښکر کښې سرداران شول. ²²ورځ په ورځ سړي د داؤد مدد کولو دپاره راتلل، تر دې چې د هغۀ لښکر د زمونږ د پلار د لښکر غوندې لوئ شو.

²³دا د هغو جنګ دپاره سمبال سړو شمار دے چې د ساؤل بادشاهى داؤد ته سپارلو دپاره په حبرون کښې هغۀ ته راغلل، لکه څنګه چې زمونږ پلار ويلي وُو، ²⁴د يهوداه د قبيلې نه، چې ډال او نېزه يې اخستې وه، شپږ زره اته سوه جنګ دپاره سمبال سړي وُو، ²⁵د شمعون د قبيلې نه، چې جنګ ته تيار زورور جنګيالي وُو، اووۀ زره يو سل، ²⁶د لاوي د قبيلې نه، څلور زره شپږ سوه، ²⁷او يهوياداع چې د هارون د کورنۍ مشر وو او له هغۀ سره درے زره اووۀ سوه وُو، ²⁸او صادوق چې يو زړور ځوان جنګيالے وو، او له هغۀ سره د هغۀ د خپلې کورنۍ نه دوه ويشت افسران وُو. ²⁹د بنيامين د قبيلې نه چې د ساؤل خپلوان وُو، درے زره، خو تر اوسه پورې ډېرو د ساؤل د کور پهره ساتله، ³⁰د افرائيم د قبيلې نه، شل زره اته سوه زورور جنګيالي وُو چې په خپلو کورنيو کښې مشهور سړي وُو، ³¹د منسى د نيمې قبيلې نه، اتلس زره، چې په نوم ټاکل شوي وُو چې راشى او داؤد بادشاه کړى، ³²د يسکار د قبيلې نه، دوه سوه سرداران چې د وختونو پوهه يې لرله او پوهېدل چې اِسرائيل ته څۀ کول په کار دى، او د دوئ ټول خپلوان د دوئ تابعدار وُو. ³³د زبولون د قبيلې نه، پينځوس زره تجربه‌کار فوجيان چې د جنګ دپاره په هر قسم وسله سمبال وُو او په بشپړ زړۀ سره د داؤد مدد کولو ته تيار وُو، ³⁴د نفتالي د قبيلې نه، يو زر افسران، او له دوئ سره اووۀ دېرش زره سړي چې ډال او نېزه يې اخستې وه، ³⁵د دان د قبيلې نه، اته ويشت زره شپږ سوه سړي چې جنګ ته تيار وُو، ³⁶د اشير د قبيلې نه، څلوېښت زره تجربه‌کار فوجيان چې جنګ ته تيار وُو، ³⁷د اُردن د ختيځ نه، روبن، جد او د منسى نيمه قبيله، يو لک شل زره، چې د جنګ په هر قسم وسله سمبال وُو.

³⁸دا ټول جنګيالي وُو چې د جنګ په قطار کښې حبرون ته راغلل، ترڅو چې په بشپړ زړۀ سره داؤد پر ټول اِسرائيل باندې بادشاه کړى، او د اِسرائيل پاتې خلق هم په يوه خيال وُو چې داؤد بادشاه کړى. ³⁹دوئ هلته درے ورځې له داؤد سره پاتې شول، خوراک يې وکړو او څښاک يې وکړو، ځکه چې د دوئ خپلوانو د دوئ دپاره خوراک تيار کړے وو. ⁴⁰د دوئ ګاونډيانو، چې تر يسکار، زبولون او نفتالي پورې وُو، په خرو، اوښانو، کچرو او غوايانو باندې خوراک راووړو، اوړۀ، د انځرو کلچې، د کشمشو کلچې، شراب، تيل، غواګانې او ګډې په ډېرۍ کښې، ځکه چې په اِسرائيل کښې خوشحالى وه.