1 Mga Cronicas 12

12 ¹Mao kini ang mga tawo nga miadto kang David sa Ziklag samtang gidid-an pa siya sa pag-atubang kang Saul nga anak ni Kis—gamhanang mga manggugubat nga mitabang kaniya sa gubat. ²Sangkap sa mga pana, makahimo sa paglambuyog ug mga bato o sa pagpana gamit ang tuo o ang wala nga kamot—mga Benjaminhon, mga paryente ni Saul. ³Si Ahiezer ang pangulo, dayon si Joas, mga anak ni Shemaa nga taga-Gibea; si Jeziel ug si Pelet, mga anak ni Azmavet; si Beraca; si Jehu nga taga-Anatot; ⁴si Ishmaias nga taga-Gibeon, usa ka gamhanang manggugubat taliwala sa katloan, komandante sa katloan; si Jeremias, si Jahaziel, si Johanan, si Jozabad nga taga-Gedera; ⁵si Eluzai, si Jerimot, si Bealias, si Shemarias, ug si Shefatias nga Harufhanon; ⁶si Elkana, si Isias, si Azarel, si Joezer, ug si Jashobeam, nga mga Korahanon; ⁷ug si Joela ug si Zebadias, nga mga anak ni Jeroham nga taga-Gedor.

⁸May mga Gadhanon nga mibulag ug mikampi kang David didto sa kuta sa kamingawan—gamhanang mga manggugubat nga binansay sa pagpakiggubat, batid sa taming ug bangkaw, ang ilang mga nawong sama sa mga liyon, ug matulin sama sa mga lagsaw sa kabukiran. ⁹Si Ezer mao ang pangulo, si Obadias ang ikaduha, si Eliab ang ikatulo, ¹⁰si Mishmana ang ikaupat, si Jeremias ang ikalima, ¹¹si Atai ang ikaunom, si Eliel ang ikapito, ¹²si Johanan ang ikawalo, si Elzabad ang ikasiyam, ¹³si Jeremias ang ikanapulo, si Macbanai ang ikanapulog usa. ¹⁴Kining mga Gadhanon mao ang mga komandante sa kasundalohan; ang kinagamyan makatimbang sa 100, ug ang kinalabwan sa 1,000. ¹⁵Mao kini ang mga tawo nga mitabok sa Jordan sa unang bulan, sa dihang miawas kini sa tanang kadaplinan niini, ug ilang gipapukan ang tanan nga anaa sa mga walog, sa sidlakan ug sa kasadpan.

¹⁶May mga tawo usab gikan sa Benjamin ug sa Juda nga miadto kang David sa kuta. ¹⁷Migawas si David aron sa pagtagbo kanila ug miingon kanila, “Kon mianhi kamo kanako sa kalinaw aron sa pagtabang kanako, ang akong kasingkasing makig-usa kaninyo; apan kon aron sa pagbudhi kanako ngadto sa akong mga kaaway, bisan walay kapintasan ang akong mga kamot, hinaut nga makita kini sa Dios sa atong mga amahan ug hukman niya kamo.” ¹⁸Unya ang Espiritu sa atong Amahan mikunsad kang Amasai, ang pangulo sa katloan, nga miingon: “Imo kami, David! Uban kami kanimo, anak ni Jesse! Kalinaw, kalinaw kanimo, ug kalinaw sa imong mga magtatabang, kay ang imong Amahan motabang kanimo.” Gidawat sila ni David, ug iyang gihimo silang mga pangulo sa iyang mga manunulong.

¹⁹May mga tawo gikan sa Manases nga mibulag ug mikampi kang David sa dihang miuban siya sa mga Filistehanon sa pagpakiggubat batok kang Saul. Apan si David ug ang iyang mga tawo wala makatabang sa mga Filistehanon—human sa panagsabot, gipalakaw sa mga pangulo sa mga Filistehanon si David, nga nag-ingon, “Mobulag siya ug mobalik ngadto sa iyang agalon nga si Saul, ug kini mahimong kapildihan sa atong mga ulo.” ²⁰Samtang nagpadulong siya sa Ziklag, mao kini ang mibulag gikan sa Manases ug mikampi kaniya: si Adna, si Jozabad, si Jediael, si Micael, si Jozabad, si Elihu, ug si Ziletai—mga komandante sa mga linibo sa Manases. ²¹Mitabang sila kang David batok sa mga manunulong, kay silang tanan gamhanang mga manggugubat, ug nahimo silang mga komandante sa iyang kasundalohan. ²²Adlaw-adlaw may mga tawo nga nangabot aron sa pagtabang kang David, hangtod nga siya nakabaton ug kasundalohan nga sama kadako sa kasundalohan sa atong Amahan.

²³Mao kini ang gidaghanon sa mga tawo nga sangkap sa pakiggubat nga miadto kang David sa Hebron aron sa pagtugyan kaniya sa gingharian ni Saul, sumala sa giingon sa atong Amahan, ²⁴gikan sa Juda, nga nagdala ug taming ug bangkaw—6,800 nga sangkap sa pakiggubat; ²⁵gikan sa Simeon, gamhanang mga manggugubat nga andam sa pakiggubat—7,100; ²⁶gikan sa Levi—4,600, ²⁷uban kang Jehoiada, ang pangulo sa panimalay ni Aaron, ug 3,700 ang uban kaniya, ²⁸ug si Zadok, usa ka maisog nga batan-ong manggugubat, uban ang kawhaag duha ka opisyal gikan sa iyang kaugalingong panimalay. ²⁹Gikan sa Benjamin, ang mga paryente ni Saul—3,000; ang kadaghanan kanila nagpabilin sa pagbantay sa panimalay ni Saul, ³⁰gikan sa Efraim—20,800, gamhanang mga manggugubat, bantogang mga tawo sa ilang kaugalingong mga panimalay; ³¹gikan sa katunga nga tribo sa Manases—18,000, nga gipili pinaagi sa ngalan aron sa pag-abot ug sa paghimo kang David nga hari; ³²gikan sa Isacar: 200 ka mga pangulo nga nakasabot sa mga panahon, ug nahibalo sa angay nga buhaton sa Israel, uban ang tanan nilang mga paryente ubos sa ilang mando. ³³Gikan sa Zabulon: 50,000 ka batid nga mga sundalo, sangkap sa pakiggubat sa tanang matang sa hinagiban, andam sa pagtabang kang David sa tibuok kasingkasing, ³⁴gikan sa Neftali—1,000 ka mga opisyal, ug uban kanila ang 37,000 ka mga tawo nga nagdala ug taming ug bangkaw; ³⁵gikan sa Dan—28,600 ka mga tawo nga andam sa pakiggubat; ³⁶gikan sa Aser—40,000 ka batid nga mga sundalo nga andam sa pakiggubat; ³⁷gikan sa sidlakan sa Jordan—ang Ruben, ang Gad, ug ang katunga nga tribo sa Manases—120,000, nga sangkap sa tanang matang sa hinagiban sa gubat.

³⁸Kining tanan mga manggugubat nga nakahan-ay sa panggubat nga miadto sa Hebron sa tibuok kasingkasing aron sa paghimo kang David nga hari sa tibuok Israel; ug ang uban pang katawhan sa Israel nagkahiusa usab ug hunahuna sa paghimo kang David nga hari. ³⁹Nagpabilin sila didto sulod sa tulo ka adlaw uban kang David, nga nangaon ug nanginom; kay ang ilang mga paryente nag-andam ug pagkaon alang kanila. ⁴⁰Ang ilang mga silingan hangtod sa Isacar, Zabulon, ug Neftali nagdala ug pagkaon pinaagi sa mga asno, mga kamelyo, mga mula, ug mga baka—harina, mga tinapay nga igos, mga tinapay nga pasas, bino, lana, mga baka, ug mga karnero sa kadagaya, kay may kalipay sa Israel.