ବୀର ଯୋଦ୍ଧାମାନେ ସିକ୍ଲଗ୍‌ରେ ଦାଉଦଙ୍କ ନିକଟକୁ ଏକତ୍ର ହେଲେ

ଦାଉଦ ପଳାତକ ଥିବା ବେଳେ ମଧ୍ୟ ଲୋକମାନେ ତାଙ୍କ ପକ୍ଷକୁ ଆସୁଥାନ୍ତି: ଶାଉଲଙ୍କ ନିଜ ବଂଶର ଦୁଇ ହାତରେ ସମାନ ଦକ୍ଷ ବିନ୍ୟାମୀନୀୟ, ବନ୍ୟାପୂର୍ଣ୍ଣ ଯର୍ଦ୍ଦନ ପହଁରି ପାର ହୋଇଥିବା ସିଂହମୁଖ ଗାଦୀୟ, ସମୟକୁ ବୁଝୁଥିବା ଇଷାଖରର ଲୋକ। ହିବ୍ରୋଣରେ ବଂଶମାନେ ବଳ ସହ ପହଞ୍ଚନ୍ତି, କହନ୍ତି ସେମାନଙ୍କ ପିତା ତାଙ୍କୁ ସାହାଯ୍ୟ କରନ୍ତି, ଏବଂ ଇସ୍ରାଏଲ ଆନନ୍ଦିତ ହୁଏ।

ଅଧ୍ୟାୟ 12।

ଦାଉଦ ଯେତେବେଳେ କୀଶ୍‌ଙ୍କ ପୁତ୍ର ଶାଉଲଙ୍କ ସମ୍ମୁଖରୁ ଏପର୍ଯ୍ୟନ୍ତ ବାରିତ ଥିଲେ, ସେତେବେଳେ ଯେଉଁ ଲୋକମାନେ ସିକ୍ଲଗ୍‌ରେ ତାହାଙ୍କ ନିକଟକୁ ଆସିଲେ, ସେମାନେ ଏହି ଅଟନ୍ତି—ଯୁଦ୍ଧରେ ତାହାଙ୍କର ସାହାଯ୍ୟକାରୀ ବୀର ଯୋଦ୍ଧାଗଣ। ସେମାନେ ଧନୁରେ ସସଜ୍ଜ, ପୁଣି ଡାହାଣ ଓ ବାମ ହସ୍ତ ଉଭୟ ଦ୍ଵାରା ପ୍ରସ୍ତର ନିକ୍ଷେପ କରିବାକୁ ଓ ଧନୁରୁ ତୀର ମାରିବାକୁ ନିପୁଣ ଥିଲେ; ସେମାନେ ବିନ୍ୟାମୀନ୍‌ର, ଶାଉଲଙ୍କ ଜ୍ଞାତି ଥିଲେ। ପ୍ରଧାନ ଅହୀୟେଷର, ତତ୍ପରେ ଯୋୟାଶ୍‌, ଏ ଦୁହେଁ ଗିବୀୟାସ୍ଥ ଶମାୟାର ପୁତ୍ର; ଯିଷୀୟେଲ ଓ ପେଲଟ୍‌, ଏ ଦୁହେଁ ଅସ୍ମାବତ୍‌ର ପୁତ୍ର; ବରାଖା; ଅନାଥୋତୀୟ ଯେହୂ; ଗିବିୟୋନୀୟ ଯିଶ୍ମୟୀୟ, ଯେ ତିରିଶ ଜଣଙ୍କ ମଧ୍ୟରେ ଜଣେ ବୀର ଯୋଦ୍ଧା ଓ ତିରିଶ ଜଣଙ୍କ ଉପରେ ସେନାପତି ଥିଲେ; ଯିରିମୀୟ, ଯହସୀୟେଲ, ଯୋହାନନ୍‌, ଗେଦେରାସ୍ଥ ଯୋଷାବଦ୍‌; ଇଲୂଷୟ, ଯିରୀମୋତ୍‌, ବୀୟାଲୀୟ, ଶମରୀୟ ଓ ହରୂଫୀୟ ଶଫଟୀୟ; ଇଲ୍‌କାନା, ଯିଶୀୟ, ଅସରେଲ, ଯୋୟେଷର ଓ ଯାଶୋବୀୟାମ୍‌, ଏମାନେ କୋରହୀୟ; ପୁଣି ଯୋୟେଲା ଓ ସବଦୀୟ, ଏ ଦୁହେଁ ଗିଦୋରୀୟ ଯିରୋହମର ପୁତ୍ର।

ଗାଦୀୟମାନଙ୍କ ମଧ୍ୟରୁ କେତେକ ପ୍ରାନ୍ତରସ୍ଥ ଦୁର୍ଗରେ ଦାଉଦଙ୍କ ପକ୍ଷକୁ ଗଲେ—ସେମାନେ ଯୁଦ୍ଧ ନିମନ୍ତେ ଶିକ୍ଷିତ ବୀର ଯୋଦ୍ଧା, ଢାଲ ଓ ବର୍ଚ୍ଛା ଚାଳନାରେ ନିପୁଣ, ସେମାନଙ୍କ ମୁଖ ସିଂହ ତୁଲ୍ୟ ଓ ସେମାନେ ପର୍ବତ ଉପରିସ୍ଥ ହରିଣ ତୁଲ୍ୟ ଦ୍ରୁତଗାମୀ ଥିଲେ। ଏଷର ପ୍ରଧାନ, ଓବଦୀୟ ଦ୍ଵିତୀୟ, ଇଲୀୟାବ୍‌ ତୃତୀୟ, ମିଶ୍ମନ୍ନା ଚତୁର୍ଥ, ଯିରିମୀୟ ପଞ୍ଚମ, ଅତୟ ଷଷ୍ଠ, ଇଲୀୟେଲ ସପ୍ତମ, ଯୋହାନନ୍‌ ଅଷ୍ଟମ, ଇଲ୍‌ସାବଦ୍‌ ନବମ, ଯିରିମୀୟ ଦଶମ, ମଖ୍‌ବନ୍ନୟ ଏକାଦଶ ଥିଲେ। ଏହି ଗାଦୀୟମାନେ ସୈନ୍ୟଗଣର ସେନାପତି ଥିଲେ; କ୍ଷୁଦ୍ରତମ ଜଣେ ଏକଶହ ବିରୁଦ୍ଧରେ ଓ ବୃହତ୍ତମ ଜଣେ ସହସ୍ର ବିରୁଦ୍ଧରେ ସମର୍ଥ ଥିଲେ। ପ୍ରଥମ ମାସରେ, ଯର୍ଦ୍ଦନ ଯେତେବେଳେ ଆପଣାର ସମସ୍ତ କୂଳ ଉଚ୍ଛୁଳି ପ୍ଲାବିତ ହେଉଥିଲା, ସେତେବେଳେ ଏହି ଲୋକମାନେ ତାହା ପାର ହୋଇ ପୂର୍ବ ଓ ପଶ୍ଚିମ ଉଭୟ ଦିଗର ସମସ୍ତ ତଳଭୂମିବାସୀଙ୍କୁ ଘଉଡ଼ାଇ ଦେଲେ।

ଆଉ ବିନ୍ୟାମୀନ୍‌ ଓ ଯିହୂଦାର ଲୋକମାନଙ୍କ ମଧ୍ୟରୁ କେତେକ ମଧ୍ୟ ଦୁର୍ଗରେ ଦାଉଦଙ୍କ ନିକଟକୁ ଆସିଲେ। ଦାଉଦ ସେମାନଙ୍କୁ ଭେଟିବା ପାଇଁ ବାହାରକୁ ଯାଇ ସେମାନଙ୍କୁ କହିଲେ, “ଯଦି ତୁମ୍ଭେମାନେ ମୋହର ସାହାଯ୍ୟ କରିବା ନିମନ୍ତେ ଶାନ୍ତିରେ ମୋʼ ନିକଟକୁ ଆସିଅଛ, ତେବେ ତୁମ୍ଭମାନଙ୍କ ସହିତ ମୋହର ଅନ୍ତଃକରଣ ସଂଯୁକ୍ତ ହେବ; ମାତ୍ର ମୋʼ ହସ୍ତରେ କୌଣସି ଦୌରାତ୍ମ୍ୟ ନ ଥିଲେ ହେଁ ଯଦି ତୁମ୍ଭେମାନେ ମୋʼ ଶତ୍ରୁମାନଙ୍କ ହସ୍ତରେ ମୋତେ ପ୍ରତାରଣା କରିବାକୁ ଆସିଅଛ, ତେବେ ଆମ୍ଭମାନଙ୍କ ପିତୃଗଣର ଈଶ୍ଵର ତାହା ଦେଖନ୍ତୁ ଓ ବିଚାର କରନ୍ତୁ।” ସେତେବେଳେ ଆମ୍ଭମାନଙ୍କ ପିତାଙ୍କ ଆତ୍ମା ତିରିଶ ଜଣଙ୍କ ପ୍ରଧାନ ଅମାସୟଙ୍କ ଉପରେ ଆସିଲେ, ଆଉ ସେ କହିଲେ, “ହେ ଦାଉଦ, ଆମ୍ଭେମାନେ ଆପଣଙ୍କର! ହେ ଯିଶୀର ପୁତ୍ର, ଆମ୍ଭେମାନେ ଆପଣଙ୍କ ସଙ୍ଗରେ ଅଛୁ! ଆପଣଙ୍କର ଶାନ୍ତି, ଶାନ୍ତି ହେଉ, ପୁଣି ଆପଣଙ୍କ ସାହାଯ୍ୟକାରୀମାନଙ୍କର ଶାନ୍ତି ହେଉ, କାରଣ ଆପଣଙ୍କ ପିତା ଆପଣଙ୍କର ସାହାଯ୍ୟ କରନ୍ତି।” ତହିଁରେ ଦାଉଦ ସେମାନଙ୍କୁ ଗ୍ରହଣ କରି ସେମାନଙ୍କୁ ଆପଣା ସୈନ୍ୟଦଳର ନେତା କଲେ।

ଦାଉଦ ଯେତେବେଳେ ଶାଉଲଙ୍କ ବିରୁଦ୍ଧରେ ପଲେଷ୍ଟୀୟମାନଙ୍କ ସଙ୍ଗରେ ଯାତ୍ରା କରିଥିଲେ, ସେତେବେଳେ ମନଃଶି ବଂଶ ମଧ୍ୟରୁ କେତେକ ଦାଉଦଙ୍କ ପକ୍ଷକୁ ଗଲେ। ମାତ୍ର ଦାଉଦ ଓ ତାହାଙ୍କ ଲୋକମାନେ ପଲେଷ୍ଟୀୟମାନଙ୍କୁ କିଛି ସାହାଯ୍ୟ କଲେ ନାହିଁ; କାରଣ ପଲେଷ୍ଟୀୟ ଅଧିପତିମାନେ ମନ୍ତ୍ରଣା କରି, “ସେ ଆପଣା ପ୍ରଭୁ ଶାଉଲଙ୍କ ପକ୍ଷକୁ ଯାଇ ଆମ୍ଭମାନଙ୍କ ମସ୍ତକ ଆମ୍ଭମାନଙ୍କୁ ହରାଇବ,” ବୋଲି କହି ତାହାଙ୍କୁ ବିଦାୟ କଲେ। ସେ ସିକ୍ଲଗ୍‌କୁ ଯାତ୍ରା କରିବା ସମୟରେ ମନଃଶି ବଂଶ ମଧ୍ୟରୁ ଏହି ଲୋକମାନେ ତାହାଙ୍କ ପକ୍ଷକୁ ଗଲେ: ଅଦ୍ନହ, ଯୋଷାବଦ୍‌, ଯିଦୀୟେଲ, ମୀଖାୟେଲ, ଯୋଷାବଦ୍‌, ଇଲୀହୂ ଓ ସିଲ୍ଲଥୟ—ଏମାନେ ମନଃଶି ବଂଶୀୟ ସହସ୍ରପତି ଥିଲେ। ସେମାନେ ଲୁଟେରାଦଳ ବିରୁଦ୍ଧରେ ଦାଉଦଙ୍କ ସାହାଯ୍ୟ କଲେ, କାରଣ ସେସମସ୍ତେ ବୀର ଯୋଦ୍ଧା ଥିଲେ, ପୁଣି ସେମାନେ ସୈନ୍ୟଦଳର ସେନାପତି ହେଲେ। ଦିନକୁ ଦିନ ଲୋକମାନେ ଦାଉଦଙ୍କ ସାହାଯ୍ୟ କରିବାକୁ ଆସୁଥିଲେ, ଶେଷରେ ଆମ୍ଭମାନଙ୍କ ପିତାଙ୍କ ସୈନ୍ୟ ତୁଲ୍ୟ ଏକ ମହାସୈନ୍ୟଦଳ ହେଲା।

ଆମ୍ଭମାନଙ୍କ ପିତା ଯେପରି କହିଥିଲେ, ସେହିପରି ଶାଉଲଙ୍କ ରାଜ୍ୟ ଦାଉଦଙ୍କ ହସ୍ତକୁ ଅର୍ପଣ କରିବା ନିମନ୍ତେ ଯୁଦ୍ଧ ପାଇଁ ସସଜ୍ଜ ଯେଉଁ ଲୋକମାନେ ହିବ୍ରୋଣରେ ଦାଉଦଙ୍କ ନିକଟକୁ ଆସିଲେ, ସେମାନଙ୍କ ସଂଖ୍ୟା ଏହି: ଯିହୂଦା ବଂଶରୁ ଢାଲ ଓ ବର୍ଚ୍ଛାଧାରୀ, ଯୁଦ୍ଧ ପାଇଁ ସସଜ୍ଜ ଛଅ ହଜାର ଆଠଶହ ଜଣ; ଶିମୀୟୋନ୍‌ ବଂଶରୁ ଯୁଦ୍ଧ ପାଇଁ ପ୍ରସ୍ତୁତ ବୀର ଯୋଦ୍ଧା ସାତ ହଜାର ଏକଶହ ଜଣ; ଲେବୀ ବଂଶରୁ ଚାରି ହଜାର ଛଅଶହ ଜଣ, ପୁଣି ହାରୋଣ ବଂଶର ନେତା ଯିହୋୟାଦା ଓ ତାହାଙ୍କ ସଙ୍ଗରେ ତିନି ହଜାର ସାତଶହ ଜଣ, ଆଉ ସାଦୋକ ନାମକ ଜଣେ ବୀର ଯୁବ ଯୋଦ୍ଧା ଓ ତାହାଙ୍କ ପିତୃବଂଶର ବାଇଶ ଜଣ ସେନାନାୟକ। ବିନ୍ୟାମୀନ୍‌ ବଂଶ, ଅର୍ଥାତ୍‌ ଶାଉଲଙ୍କ ଜ୍ଞାତିମାନଙ୍କ ମଧ୍ୟରୁ ତିନି ହଜାର ଜଣ; କାରଣ ସେମାନଙ୍କ ଅଧିକାଂଶ ଏପର୍ଯ୍ୟନ୍ତ ଶାଉଲଙ୍କ ବଂଶ ପକ୍ଷ ରକ୍ଷା କରୁଥିଲେ। ଇଫ୍ରୟିମ ବଂଶରୁ କୋଡ଼ିଏ ହଜାର ଆଠଶହ ଜଣ, ଏମାନେ ଆପଣା ଆପଣା ପିତୃବଂଶ ମଧ୍ୟରେ ବିଖ୍ୟାତ ବୀର ଯୋଦ୍ଧା; ମନଃଶିର ଅର୍ଦ୍ଧ ବଂଶରୁ ଅଠର ହଜାର ଜଣ, ଏମାନେ ଆସି ଦାଉଦଙ୍କୁ ରାଜା କରିବା ନିମନ୍ତେ ନାମ ଦ୍ଵାରା ନିର୍ଦ୍ଦିଷ୍ଟ ହୋଇଥିଲେ; ଇଷାଖର ବଂଶରୁ: ସମୟ ବୁଝିବାରେ ଓ ଇସ୍ରାଏଲ କʼଣ କରିବା ଉଚିତ ତାହା ଜାଣିବାରେ ନିପୁଣ ଦୁଇଶହ ପ୍ରଧାନ, ଆଉ ସେମାନଙ୍କ ଆଜ୍ଞାଧୀନ ସେମାନଙ୍କ ସମସ୍ତ ଜ୍ଞାତି; ସବୂଲୂନ୍‌ ବଂଶରୁ: ଯୁଦ୍ଧ ନିମନ୍ତେ ସର୍ବପ୍ରକାର ଅସ୍ତ୍ରଶସ୍ତ୍ରରେ ସସଜ୍ଜ, ସୁଦକ୍ଷ ପଚାଶ ହଜାର ସୈନ୍ୟ, ଯେଉଁମାନେ ଏକାନ୍ତ ଚିତ୍ତରେ ଦାଉଦଙ୍କ ସାହାଯ୍ୟ କରିବାକୁ ପ୍ରସ୍ତୁତ ଥିଲେ, ନପ୍ତାଲି ବଂଶରୁ ଏକ ହଜାର ସେନାନାୟକ, ପୁଣି ସେମାନଙ୍କ ସଙ୍ଗରେ ଢାଲ ଓ ବର୍ଚ୍ଛାଧାରୀ ସଇଁତିରିଶ ହଜାର ଜଣ; ଦାନ୍‌ ବଂଶରୁ ଯୁଦ୍ଧ ପାଇଁ ପ୍ରସ୍ତୁତ ଅଠାଇଶ ହଜାର ଛଅଶହ ଜଣ; ଆଶେର ବଂଶରୁ ଯୁଦ୍ଧ ପାଇଁ ପ୍ରସ୍ତୁତ ସୁଦକ୍ଷ ଚାଳିଶ ହଜାର ସୈନ୍ୟ; ଯର୍ଦ୍ଦନର ପୂର୍ବ ପାର୍ଶ୍ଵରୁ—ରୂବେନ୍‌, ଗାଦ୍‌ ଓ ମନଃଶିର ଅର୍ଦ୍ଧ ବଂଶରୁ—ଯୁଦ୍ଧର ସର୍ବପ୍ରକାର ଅସ୍ତ୍ରଶସ୍ତ୍ରରେ ସସଜ୍ଜ ଏକ ଲକ୍ଷ କୋଡ଼ିଏ ହଜାର ଜଣ।

ଯୁଦ୍ଧ ପାଇଁ ବ୍ୟୂହ ବନ୍ଦ ହୋଇ ଥିବା ଏହିସମସ୍ତ ଯୋଦ୍ଧା ସମୁଦାୟ ଇସ୍ରାଏଲ ଉପରେ ଦାଉଦଙ୍କୁ ରାଜା କରିବା ନିମନ୍ତେ ଏକାନ୍ତ ଚିତ୍ତରେ ହିବ୍ରୋଣକୁ ଆସିଲେ; ପୁଣି ଅବଶିଷ୍ଟ ଇସ୍ରାଏଲ ମଧ୍ୟ ଦାଉଦଙ୍କୁ ରାଜା କରିବା ନିମନ୍ତେ ଏକମନା ଥିଲେ। ସେମାନେ ସେଠାରେ ଦାଉଦଙ୍କ ସଙ୍ଗରେ ତିନି ଦିନ ରହି ଭୋଜନ ଓ ପାନ କଲେ; କାରଣ ସେମାନଙ୍କ ଜ୍ଞାତିମାନେ ସେମାନଙ୍କ ପାଇଁ ଖାଦ୍ୟ ପ୍ରସ୍ତୁତ କରିଥିଲେ। ଆହୁରି ଇଷାଖର, ସବୂଲୂନ୍‌ ଓ ନପ୍ତାଲି ପର୍ଯ୍ୟନ୍ତ ସେମାନଙ୍କ ନିକଟବର୍ତ୍ତୀ ଲୋକମାନେ ଗର୍ଦ୍ଦଭ, ଓଟ, ଅଶ୍ଵତର ଓ ଗୋରୁ ଉପରେ ବୋଝେଇ କରି ଖାଦ୍ୟ, ଅର୍ଥାତ୍‌, ଅଜାଡ଼ ଅଟା, ଡିମ୍ବିରି ପିଠା, କିସ୍‌ମିସ୍‌ ପିଠା, ଦ୍ରାକ୍ଷାରସ, ତୈଳ, ଗୋରୁ ଓ ମେଷ ପ୍ରଚୁର ପରିମାଣରେ ଆଣିଲେ, କାରଣ ଇସ୍ରାଏଲ ମଧ୍ୟରେ ଆନନ୍ଦ ହୋଇଥିଲା।