Me basika na mukanda
Dibuku

Tata ke kabula yinsi yina me bikana

Makanda nsambwadi me baka ntete ve yinsi yina Tata ya beto pesaka, mpe Yeswa ke yufula tii ntangu yinki bawu ke lutisa ntangu. Yandi ke fidisa bantu samu na kwenda luta na yinsi mpe kukabula yawu na bitini nsambwadi, ke bula dzeke na Silo, mpe ndambu ya fyoti ya Bezame na kati-kati ya Yuda na Yosefi ba ke tendula yawu ntete.

Kapu 18.

Na manima, bantu nyonso ya Isayeli yonzamaka na Silo mpe bawu tentikaka tenta ya kukutana kuna, samu ti yinsi vwandaka me bwa na yisi ya lutumu na mantwala ya bawu. Makanda nsambwadi bikanaka na kati ya bana ya Isayeli, bayina me baka ntete mvwilu ya bawu ve. Na yina, Yeswa yufulaka bantu ya Isayeli: «Tii ntangu yinki beno ke lutisa ntangu na kukota samu na kubaka yinsi yina Tata ya beto, Nzambi ya batata ya beno, me pesa beno? Beno pesa babakala tatu na konso dikanda; mu ke fidisa bawu samu na kwenda luta na yinsi, kusonika yawu samu na mvwilu ya bawu, mpe kuvutuka na munu. Bawu ke kabula yawu na bitini nsambwadi: Yuda ke bikana na ntoto ya yandi na sude, mpe dikanda ya Yosefi ke bikana na ntoto ya yandi na node. Beno sonika yinsi na bitini nsambwadi mpe beno nata yawu awa na munu, mpe mu ke bula dzeke samu na beno awa na mantwala ya Tata ya beto. Ba-Levi kele ve na kikunku na kati ya beno—bunganga-Nzambi ya Tata ya beto kele mvwilu ya bawu. Ngade, Lubene, mpe ndambu ya dikanda ya Manase me baka mvwilu ya bawu na esete ya nzadi ya Yolodani, yina Moyize, kisadi ya Tata ya beto, pesaka bawu.»

Babakala yango katukaka, mpe Yeswa pesaka ntumunu na bayina vwandaka kwenda samu na kusonika yinsi: «Beno kwenda, beno luta na yinsi, beno sonika yawu, beno vutuka na munu, mpe awa mu ke bula dzeke samu na beno na mantwala ya Tata ya beto na Silo.»

Babakala yango kwendaka, bawu lutaka na yinsi, bawu sonikaka yawu na bambanza na bitini nsambwadi na kati ya dibuku, mpe bawu vutukaka na Yeswa na kivwandu kuna na Silo. Yeswa bulaka dzeke samu na bawu na Silo na mantwala ya Tata ya beto, mpe kuna Yeswa kabulaka yinsi na kati ya bana ya Isayeli, na kupesaka konso muntu kikunku ya yandi.

Dikabu ya Tata ya beto na Bezame

Dzeke ya kifumba ya bana ya Bezame basikaka mutindu kele makanda ya bawu; ndilu ya dzeke ya bawu lutaka na kati-kati ya bana ya Yuda mpe bana ya Yosefi. Ndilu ya bawu na node bandaka na nzadi ya Yolodani, yawu yulukaka na mbanzi ya mongo na node ya Yeliko, yawu lutaka na myongo na wesete, mpe yawu sukaka na yinsi ya kuyuma ya Bete-Avene. Katuka kuna, ndilu yango sabukaka na sude tii na Luze, na mbanzi ya yawu (Betele), mpe yawu kulumukaka na Atalote-Adale, na zulu ya mongo mosi na sude ya Bete-Wolone ya Yisi. Ndilu yango zungidilaka mpe balukaka na sude na lweka ya wesete, katuka na mongo yina vwandaka na mantwala ya Bete-Wolone, na lweka ya sude, mpe yawu sukaka na Kilyate-Baale (Kilyate-Yeyalime), mbanza ya bana ya Yuda. Yina vwandaka lweka ya wesete. Na sude, ndilu bandaka na nsuka ya Kilyate-Yeyalime; ndilu yango lutaka na wesete tii na yinto ya maza ya Nefetowa. Ndilu yango kulumukaka tii na nsuka ya mongo yina ke talaka mudimba ya Bene-Yinome, kuna na node, na nsuka ya mudimba ya ba-Lefayi. Na nima, yawu kulumukaka na mudimba ya Yinome tii na mbanzi ya ba-Yebuse na lweka ya sude, ebuna yawu kwendaka tii na Eyine-Longele. Yawu balukaka na lweka ya node mpe kumaka na Eyine-Semese, ebuna yawu kwendaka na Ngelilote yina kele na ntwala ya mwa mongo ya Adumime. Na nsuka, yawu kulumukaka na Ditadi ya Bowane, mwana ya Lubene. Yawu lutaka na mbanzi yina ke talasanaka na Alaba na node, mpe yawu kulumukaka na Alaba. Ndilu yango lutaka na node ya mbanzi ya Bete-Wongela, mpe yawu sukaka na nsuka ya node ya Mubu ya Mungwa, na sude ya nsuka ya nzadi ya Yolodani. Yina vwandaka ndilu ya sude. Nzadi ya Yolodani vwandaka ndilu ya yawu na esete. Yina vwandaka mvwilu ya bana ya Bezame; bandilu ya yawu zungaka yawu na balweka nyonso, mutindu kele makanda ya bawu. Bambanza ya kifumba ya Bezame, mutindu kele makanda ya bawu, vwandaka Yeliko, Bete-Wongela, Emeke-Kezize, Bete-Alaba, Zemarayime, Betele, Avime, Pala, Ofela, Kefale-Amona, Ofeni, mpe Ngeba—bambanza kumi na zole na babwala na yawu. Ngabawone, Lama, Beelote, Misepa, Kefila, Mosa, Lekeme, Yirepeyele, Tarala, Sela, Aelefe, mbanza ya bantu ya Yebuse—Yelusalemi—Ngibeya, mpe Kilyate: yawu vwandaka bambanza kumi na iya, kumosi na babwala ya yawu. Yina kele mvwilu ya bana ya Bezame, na kutadila mabuta ya bawu.