ኢያሱ 18

18 ¹ከዚያም የእስራኤል ማኅበር ሁሉ በሴሎ ተሰበሰበ፤ ምድሪቱም በፊታቸው ተገዝታ ስለ ነበር የመገናኛውን ድንኳን በዚያ ተከሉ። ²በእስራኤል ልጆች መካከልም ርስታቸውን ገና ያልተቀበሉ ሰባት ነገዶች ቀሩ። ³ኢያሱም እስራኤላውያንን እንዲህ አላቸው፤ “አባታችን፣ የአባቶቻችሁ አምላክ የሰጣችሁን ምድር ገብታችሁ ለመውረስ እስከ መቼ ትዘገያላችሁ? ⁴ከእያንዳንዱ ነገድ ሦስት ሰዎች አዘጋጁ፤ እኔም ምድሪቱን እንዲያዞሩ፣ ለርስታቸው እንዲመዘግቡ፣ ከዚያም ወደ እኔ እንዲመለሱ እልካቸዋለሁ። ⁵ወደ ሰባት ክፍልም ይከፍሉታል፤ ይሁዳ በደቡብ በኩል ባለው ግዛቱ ይኖራል፣ የዮሴፍም ቤት በሰሜን በኩል ባለው ግዛቱ ይኖራል። ⁶ምድሪቱን በሰባት ክፍል መዝግባችሁ ወደዚህ ወደ እኔ አምጡ፤ እኔም እዚህ በአባታችን ፊት ዕጣ እጥልላችኋለሁ። ⁷ሌዋውያን በመካከላችሁ ድርሻ የላቸውም፤ የአባታችን ክህነት ርስታቸው ነውና። ጋድ፣ ሮቤልና የምናሴ ነገድ እኩሌታ የአባታችን አገልጋይ ሙሴ በሰጣቸው መሠረት በዮርዳኖስ ምሥራቅ በኩል ርስታቸውን ተቀብለዋል።”

⁸ሰዎቹም ተነሡ፤ ኢያሱም ምድሪቱን ለመመዝገብ የሚሄዱትን እንዲህ ብሎ አዘዛቸው፤ “ሂዱ፣ ምድሪቱን ዙሩ፣ መዝግቡ፣ ወደ እኔም ተመለሱ፤ እዚህም በሴሎ በአባታችን ፊት ዕጣ እጥልላችኋለሁ።”

⁹ሰዎቹም ሄደው ምድሪቱን አቋርጠው በከተሞች ከፋፍለው በሰባት ክፍል በመጽሐፍ መዝግበው በሴሎ ወዳለው ሰፈር ወደ ኢያሱ ተመለሱ። ¹⁰ኢያሱም በሴሎ በአባታችን ፊት ዕጣ ጣለላቸው፤ በዚያም ኢያሱ ለእስራኤላውያን ምድሪቱን ለእያንዳንዱ እንደ ድርሻው ከፋፈለ።

የአባታችን ስጦታ ለብንያም

¹¹የብንያም ዝርያ ነገድ ዕጣ እንደ ጎሣዎቻቸው ወጣ፤ የዕጣቸውም ድንበር በይሁዳ ዝርያና በዮሴፍ ዝርያ መካከል ወጣ። ¹²የሰሜኑ ድንበራቸው ከዮርዳኖስ ተነሥቶ ወደ ኢያሪኮ ሰሜን ጫፍ ወጣ፣ በተራሮቹም መካከል ወደ ምዕራብ ወጥቶ በቤትዐዌን ምድረ በዳ አለቀ። ¹³ድንበሩም ከዚያ ወደ ደቡብ ወደ ሎዛ፣ ማለትም ወደ ተዳፋቷ (ቤቴል) አቋርጦ ወደ ታችኛው ቤትሆሮን ደቡብ ባለው ተራራ ላይ ወዳለው ወደ ዓጣሮትዓዳር ወረደ። ¹⁴ድንበሩም ተጠምዝዞ በምዕራብ በኩል ወደ ደቡብ ዞረ፤ ቤትሆሮንን ትይዩ ካለው ተራራ ጀምሮ ወደ ደቡብ ሄዶ የይሁዳ ዝርያ ከተማ በሆነችው በቂርያትባአል (ቂርያትይዓሪም) አለቀ። ይህ የምዕራብ በኩል ነበር። ¹⁵የደቡቡ በኩል ከቂርያትይዓሪም ዳርቻ ተነሣ፤ ድንበሩም ወደ ምዕራብ ወደ ኔፍቶሃ ውሃ ምንጭ ሄደ። ¹⁶ድንበሩም በሬፋይም ሸለቆ ሰሜናዊ ጫፍ ላይ ያለውን የቤንሂኖም ሸለቆ ትይዩ ወዳለው ተራራ ዳርቻ ወረደ፤ ከዚያም በሂኖም ሸለቆ ወደ የቡሳውያን ደቡባዊ ተዳፋት ወርዶ ወደ ዔንሮጌል ሄደ። ¹⁷ወደ ሰሜንም ዞሮ ወደ ዔንሰሜስ ሄደ፣ ወደ አዱሚም ዓቀበት ትይዩ ወዳለው ወደ ገሊሎት ቀጠለ፤ ከዚያም ወደ ሮቤል ልጅ ወደ ቦሃን ድንጋይ ወረደ። ¹⁸ወደ ሰሜን ዓረባን ትይዩ ወዳለው ተዳፋት አለፈ፤ ቀጥሎም ወደ ዓረባ ወረደ። ¹⁹ድንበሩም ወደ ቤትሖግላ ሰሜናዊ ተዳፋት ሄደ፤ በዮርዳኖስ ደቡባዊ ጫፍ ላይ ባለው በሙት ባሕር ሰሜናዊ ወሽመጥ አለቀ። ይህ የደቡብ ድንበር ነበር። ²⁰ዮርዳኖስም በምሥራቅ በኩል ያዋስነው ነበር። ይህ በዙሪያው ካለው ድንበሩ ጋራ እንደ ጎሣዎቻቸው የብንያም ዝርያ ርስት ነበር። ²¹የብንያም ነገድ ከተሞች እንደ ጎሣዎቻቸው እነዚህ ነበሩ፤ ኢያሪኮ፣ ቤትሖግላ፣ ዔሜቅቄሲስ፣ ²²ቤትዓረባ፣ ጸማራይም፣ ቤቴል፣ ²³ዓዊም፣ ፓራ፣ ዖፍራ፣ ²⁴ከፋርዓሞኒ፣ ዖፍኒ፣ ጌባ፤ ከመንደሮቻቸው ጋራ ዐሥራ ሁለት ከተሞች ነበሩ። ²⁵ገባዖን፣ ራማ፣ ብኤሮት፣ ²⁶ሚጽጳ፣ ከፊራ፣ ሞጻ፣ ²⁷ሬቀም፣ ይርጵኤል፣ ታራላ፣ ²⁸ጸላ፣ ሃኤሌፍ፣ የቡሳውያን ከተማ፣ ማለትም ኢየሩሳሌም፣ ጊብዓ፣ ቂርያት፤ ከመንደሮቻቸው ጋራ ዐሥራ አራት ከተሞች ነበሩ። ይህ እንደ ጎሣዎቻቸው የብንያም ዝርያ ርስት ነው።