Yoshua 18

18 ¹Kisha jamii yote ya Israeli ikakusanyika Shilo, wakaisimamisha hema ya kukutania huko, kwa maana nchi ilikuwa imetiishwa mbele yao. ²Yalisalia makabila saba miongoni mwa wana wa Israeli ambao walikuwa bado hawajapokea urithi wao. ³Kisha Yoshua akawauliza Waisraeli, "Hata lini mtakawia kuingia kuimiliki nchi ambayo Baba yetu, Mungu wa baba zenu, amewapa? ⁴Toeni watu watatu kwa kila kabila; nami nitawatuma waende kuipita nchi, waiandike kwa ajili ya urithi wao, kisha warudi kwangu. ⁵Wataigawa mafungu saba: Yuda atakaa katika nchi yake upande wa kusini, na nyumba ya Yusufu itakaa katika nchi yake upande wa kaskazini. ⁶Iandikeni nchi mafungu saba, mkaniletee hapa kwangu, nami nitawapigia kura hapa mbele za Baba yetu. ⁷Walawi hawana fungu miongoni mwenu—ukuhani wa Baba yetu ndio urithi wao. Gadi, Reubeni, na nusu ya kabila la Manase walikwisha pokea urithi wao mashariki ya Yordani, waliopewa na Musa, mtumishi wa Baba yetu."

⁸Wale watu wakainuka wakaenda, na Yoshua akawaamuru wale waliokwenda kuiandika nchi, akisema: "Nendeni, mkaipite nchi, mkaiandike, kisha mrudi kwangu, nami hapa nitawapigia kura mbele za Baba yetu huko Shilo."

⁹Wale watu wakaenda, wakaipita nchi, wakaiandika mji kwa mji katika mafungu saba katika kitabu, kisha wakarudi kwa Yoshua kambini huko Shilo. ¹⁰Yoshua akawapigia kura huko Shilo mbele za Baba yetu, na hapo Yoshua akaigawa nchi kati ya Waisraeli, akimpa kila mmoja fungu lake.

Zawadi ya Baba kwa Benyamini

¹¹Kura ya kabila la wana wa Benyamini ikatoka kwa jamaa zao; mpaka wa kura yao ukatokea kati ya wana wa Yuda na wana wa Yusufu. ¹²Mpaka wao wa kaskazini ulianzia Yordani, ukapanda hata ubavu wa kaskazini wa Yeriko, ukapanda milimani upande wa magharibi, na kuishia katika jangwa la Beth-aveni. ¹³Kutoka hapo mpaka ukavuka upande wa kusini hata Luzu, hata mtelemko wake (Betheli), kisha ukashuka hata Atarothi-adari, katika mlima ulio kusini mwa Beth-horoni ya Chini. ¹⁴Mpaka ukapinda ukageuka upande wa kusini kwenye upande wa magharibi, kutoka mlima uliokabili Beth-horoni kuelekea kusini, na kuishia katika Kiriath-baali (Kiriath-yearimu), mji wa wana wa Yuda. Huu ndio upande wa magharibi. ¹⁵Upande wa kusini ulianzia mpakani mwa Kiriath-yearimu; mpaka ukaenda upande wa magharibi hata chemchemi ya maji ya Neftoa. ¹⁶Mpaka ukashuka hata mpakani mwa mlima uliokabili Bonde la Ben-hinomu, ulio upande wa kaskazini wa Bonde la Warefai, kisha ukashuka Bonde la Hinomu hata ubavu wa kusini wa Wayebusi, na kuendelea hata En-rogeli. ¹⁷Ukageuka upande wa kaskazini hata En-shemeshi, ukaendelea hata Gelilothi iliyoko mkabala wa mwinuko wa Adumimu, kisha ukashuka hata Jiwe la Bohani mwana wa Reubeni. ¹⁸Ukapita hata ubavu uliokabili Araba upande wa kaskazini, kisha ukashuka hata Araba. ¹⁹Mpaka ukaenda hata ubavu wa kaskazini wa Beth-hogla, na kuishia katika ghuba ya kaskazini ya Bahari ya Chumvi, katika ncha ya kusini ya Yordani. Huu ndio mpaka wa kusini. ²⁰Yordani ndiyo iliyoupakana upande wa mashariki. Huu ndio urithi wa wana wa Benyamini, pamoja na mipaka yake iliyouzunguka, kwa jamaa zao. ²¹Miji ya kabila la Benyamini, kwa koo zao, ilikuwa Yeriko, Beth-hogla, Emek-kezizi, ²²Beth-araba, Semaraimu, Betheli, ²³Avimu, Para, Ofra, ²⁴Kefar-amoni, Ofni, na Geba—miji kumi na miwili pamoja na vijiji vyake. ²⁵Gibeoni, Rama, Beerothi, ²⁶Mispe, Kefira, Mosa, ²⁷Rekemu, Irpeeli, Tarala, ²⁸Sela, Haelefu, mji wa Wayebusi—Yerusalemu—Gibea, na Kiriathi: miji kumi na minne pamoja na vijiji vyake. Huu ndio urithi wa wana wa Benyamini kwa jamaa zao.