Kopchei Kwanda Emet ne Kagong'etu
Ta ma kinam pororyosyek tisap emet ne ki koochi Kwandanyo, ak koteebe Joshua kole agoi ano ye ogagei. Ki iyookto piik si kosir emet koek kebeberwek tisap, ak koseer parbareek eng' Shiloh, ak kisir kebebertap Benjamin ne ming'in ne mi kwenutap Judah ak Joseph taunet.
18 1Ki iyumgei tuiyetap piigap Israel komugul eng' Shiloh, ak koteech eng' olooto koot ne po tuiyet, amu ki kiterteer emet eng' taitap icheek. 2Ki kong'etu pororyosyek tisap eng' kwenutap lagogap Israel che ta ma kisich porotennywa. 3Ki teebee Joshua piigap Israel koleenji, “Agoi ano ye ogagei ochut onam emet ne kagoonok Kwandanyo, Kamuktaindet ne po kwanisyeguk? 4Igoono murenik somok eng' pororyet age tugul; ayookto icheek si kobendi emet, kosiirto agobo porotennywa, ak koweek oli. 5Kopchei emet koek kebeberwek tisap: Komeny Judah eng' emennyi eng' murot tai, ak komeny kootap Joseph eng' emennyi eng' murot kaataam. 6Osiirto emet koek kebeberwek tisap ak oibwa oli, ara aseer parbareek agobo akwek eng' yu eng' taitap Kwandanyo. 7Ma tinyei Lawiik kebeberta eng' kwenung'wong'—amu tiseinatetap Kwandanyo ko porotennywa. Ki kagosich Gad, Reuben ak kebebertap pororyetap Manasseh porotennywa eng' kong'asiis ne po Jordan, ne ki kagoochi icheek Musa, otwogindetap Kwandanyo.”
8Ki pa murenik, ak ki ng'at Joshua che bendi kosiirto emet koleenji, “Oba, obendi emet, osiirto, oweege oli, ara yu aseer parbareek agobo akwek eng' taitap Kwandanyo eng' Shiloh.”
9Ki pa murenik, kobun emet, kosir eng' bukuit kebeberwek tisap ko uu nganasook, ak koweek ole mi Joshua eng' nganaseet eng' Shiloh. 10Ki seer Joshua parbareek agobo icheek eng' Shiloh eng' taitap Kwandanyo, ak ki pchei eng' olooto Joshua emet eng' kwenutap piigap Israel, kogoochi age tugul kebebertanyi.
Kaanetap Kwanda ne po Benjamin
11Ki ibutyi parbaryat pororyetap lagogap Benjamin ko uu ortinwekwak; ak ki mang'u kiwotetap parbareekwak eng' kwenutap lagogap Judah ak lagogap Joseph. 12Kiwotennywa ne po murot kaataam kong'etee Jordan, ak kotogosta kot koit tabandap Jeriko murot kaataam, ak kotogosta kobun tulweet kotokyigei cherongo, ak kobekyi surkwen ne po Beth-aben. 13Kong'eetee yooto kosiirto kiwoteet kotokyigei murot tai kwo Luz, kot koit tabandanyi (ne nooto ko Bethel), yeityo kochoortagei kwo Ataroth-addar, eng' tulweet ne mi murot tai ne po ole rektoot ne po Beth-horon. 14Kowegaak kiwoteet kotokyigei murot tai eng' komosta ne po cherongo, kong'eetee tulweet ne itoorchingei Beth-horon kotokyigei murot tai, ak kobekyi Kiriath-baal (ne nooto ko Kiriath-jearim), nganaseet ne po lagogap Judah. Egu nooto komosta ne po cherongo. 15Komosta ne po murot tai kong'etee ngeguutap Kiriath-jearim; ak kwo kiwoteet kotokyigei cherongo kot koit kondap peegap Neptoa. 16Kochoortagei kiwoteet kot koit ngeguutap tulweet ne itoorchingei atebweetap weeriitap Hinom, eng' murot kaataam ne po atebweetap Repaik, yeityo kochoortagei atebweetap Hinom kwo tabandap Jebusik murot tai, ak kosiirto kwo En-rogel. 17Koweek kotokyigei murot kaataam kwo En-shemesh, ak kosiirto kwo Geliloth ne itoorchingei ole kitogostoe kebendi Adumim, yeityo kochoortagei kwo Koita ne po Boan weeriitap Reuben. 18Kosiirto kwo tabanda ne itoorchingei Arabah murot kaataam, yeityo kochoortagei kwo Arabah. 19Kosiirto kiwoteet kwo tabandap Beth-hogla murot kaataam, ak kobekyi nyanjet ne kiluktogei ne po murot kaataam ne po Araraitap Munyuk, eng' tabandap murot tai ne po Jordan. Egu nooto kiwoteet ne po murot tai. 20Ki itei Jordan kiwoteet eng' komostap kong'asiis. Egu nooto poroteetap Benjaminik, kobooto kiwotosyekyik che yiemei tugul, ko uu ortinwekwak. 21Nganasoogap pororyetap Benjamin, ko uu ortinwekwak, ko ki Jeriko, Beth-hogla, Emek-keziz, 22Beth-araba, Zemaraim, Bethel, 23Abim, Para, Ophrah, 24Chephar-amoni, Ophni, ak Geba—nganasook taman ak aeng' kobooto kokwotinwekwak. 25Gibeon, Ramah, Beerot, 26Mispe, Kepira, Mosa, 27Rekem, Irpeel, Tarala, 28Shelah, Haeleph, nganaseetap Jebusik—ne nooto ko Jerusalem—Gibea, ak Kiriath: nganasook taman ak ang'wan kobooto kokwotinwekwak. Egu nooto poroteetap lagogap Benjamin ko uu ortinwekwak.