ኢያሱ 18 FHB Father's Heart Bible™

18 ¹ሽዑ ኵሉ ማሕበር ደቂ እስራኤል ኣብ ሴሎ ተኣኪቦም ኣብኡ ድንኳን ምርኻብ ኣቖሙ፤ እታ ምድሪ ኸዓ ኣብ ቅድሚኦም ተዋሪዳ ነበረት። ²ካብ ደቂ እስራኤል ድማ ገና ርስቶም ዘይተቐበሉ ሸውዓተ ነገዳት ተሪፎም ነበሩ። ³ኢያሱ ድማ ንደቂ እስራኤል ከምዙይ በሎም፦ “ነታ ኣቦና፥ ኣምላኽ ኣቦታትኩም፥ ዝሃበኩም ምድሪ ኣቲኹም ንምውራስ ክሳዕ መዓስ ክትድንጕዩ ኢኹም? ⁴ከካብ ነገድ ሰለስተ ሰብኡት ሃቡ፤ ነታ ምድሪ ሓሊፎም ንርስቶም ፅሒፎም ናባይ ምእንቲ ኽምለሱ ኸዓ ክልእኾም እየ። ⁵ናብ ሸውዓተ ኽፋል ድማ ይመቕልዋ፤ ይሁዳ ብወገን ደቡብ ኣብ ወሰኑ ይፀንሕ፥ ቤት ዮሴፍ ድማ ብወገን ሰሜን ኣብ ወሰኑ ይፀንሕ። ⁶ነታ ምድሪ ናብ ሸውዓተ ኽፋል ፅሒፍኩም ናባይ ኣምፅእዋ፤ ኣነ ድማ ኣብ ቅድሚ ኣቦና ዕፃ ኸውድቐልኩም እየ። ⁷ሌዋውያን ኣብ ማእኸልኩም ግደ የብሎምን፤ ክህነት ኣቦና ርስቶም እዩ እሞ። ጋድን ሮቤልን ፍርቂ ነገድ ምናሴን ከዓ ነቲ ሙሴ ባርያ ኣቦና ዝሃቦም ርስቶም፥ ብምብራቕ ዮርዳኖስ ተቐቢሎም እዮም።”

⁸እቶም ሰባት ድማ ተልዒሎም ከዱ፤ ኢያሱ ኸዓ ነቶም ነታ ምድሪ ክፅሕፉ ዝኸዱ ኣዘዞም፦ “ኪዱ፥ ነታ ምድሪ ዙሩ፥ ፅሓፍዋ፥ ናባይ ተመለሱ፤ ኣነ ድማ ኣብ ሴሎ ኣብ ቅድሚ ኣቦና ዕፃ ኸውድቐልኩም እየ።”

⁹እቶም ሰባት ከዱ፥ ነታ ምድሪ ሓለፉ፥ በብኸተምኡ ናብ ሸውዓተ ኽፋል ኣብ መፅሓፍ ፅሒፎም ድማ ናብ ኢያሱ ናብ ሰፈር ሴሎ ተመለሱ። ¹⁰ኢያሱ ኸዓ ኣብ ሴሎ ኣብ ቅድሚ ኣቦና ዕፃ ኣውደቐሎም፤ ኢያሱ ድማ ኣብኡ ነታ ምድሪ ንደቂ እስራኤል ከከም ክፍሎም መቐሎም።

ኣቦ ንብንያም ዝሃቦ

¹¹እቲ ንነገድ ደቂ ብንያም ዝበፅሖም ዕፃ ኸከም ዓሌቶም ወፀ፤ ወሰን እቲ ዕፃኦም ድማ ኣብ መንጎ ደቂ ይሁዳን ደቂ ዮሴፍን ወፀ። ¹²ወሰኖም ብወገን ሰሜን ካብ ዮርዳኖስ ጀሚሩ፥ ናብ ሰሜናይ ፀግዒ ኢያሪኮ ይድይብ፤ በቲ እምባታት ናብ ምዕራብ ይድይብ፤ እቲ መውፅኢ ኸዓ ናብ ምድረ በዳ ቤት ኣዌን ይበፅሕ። ¹³ካብኡ እቲ ወሰን ናብ ደቡብ ናብ ሎዛ፥ ናብ ፀግዒ ሎዛ፥ ንሳ ቤቴል እያ፥ ይሓልፍ፤ ካብኡ ድማ ናብ ዓጣሮትኣዳር፥ ኣብቲ ብደቡብ ታሕተዋይ ቤትሖሮን ዘሎ እምባ ይወርድ። ¹⁴እቲ ወሰን ከዓ ዘይሩ ብወገን ምዕራብ ናብ ደቡብ ይምለስ፤ ካብቲ ኣብ መንፅር ቤትሖሮን ዘሎ እምባ ብደቡብ ኣቢሉ፥ ናብ ቂርያትበኣል፥ ንሳ ቂርያት የዓሪም እያ፥ ሓንቲ ኸተማ ደቂ ይሁዳ ይበፅሕ። እዝ ብወገን ምዕራብ ዘሎ ወሰን እዩ። ¹⁵ብወገን ደቡብ ዘሎ ወሰን ካብ ጫፍ ቂርያት የዓሪም ይጅምር፤ እቲ ወሰን ድማ ንምዕራብ ናብ ዓይኒ ማይ ነፍቶ ይወፅእ። ¹⁶እቲ ወሰን ከዓ ናብ ጫፍ እቲ ኣብ መንፅር ለሰ ወዲ ሄኖም ዘሎ እምባ፥ ኣብ ሰሜናይ ወሰን ለሰ ራፋይም፥ ይወርድ፤ ካብኡ ድማ በቲ ለሰ ሄኖም ናብ ደቡባዊ ፀግዒ ኢያቡሳውያን ይወርድ፤ ናብ ዔንሮጌል ከዓ ይወፅእ። ¹⁷ናብ ሰሜን ዘይሩ ድማ ናብ ዔይን ሳሚስ ይወፅእ፤ ናብ ጌሊሎት፥ ኣብ መንፅር ዓቐበት ኣዱሚም፥ ይሓልፍ፤ ካብኡ ኸዓ ናብ እምኒ ቦሃን ወዲ ሮቤል ይወርድ። ¹⁸ናብቲ ኣብ መንፅር ጐልጐል ብሰሜን ዘሎ ፀግዒ ይሓልፍ፤ ካብኡ ድማ ናብ ጐልጐል ይወርድ። ¹⁹እቲ ወሰን ከዓ ናብ ሰሜናይ ፀግዒ ቤት ሖግላ ይሓልፍ፤ መውፅኢ እቲ ወሰን ድማ ናብ ሰሜናይ ወሽመጥ ባሕሪ ጨው፥ ኣብ ደቡባዊ ጫፍ ፈለግ ዮርዳኖስ፥ ይበፅሕ። እዝ ብወገን ደቡብ ዘሎ ወሰን እዩ። ²⁰ፈለግ ዮርዳኖስ ድማ ብወገን ምብራቕ ወሰኑ ነበረ። እዝ ርስቲ ደቂ ብንያም፥ ምስ ኵሉ ኣብ ዙርያኡ ዘሎ ወሰኑ፥ ከከም ዓሌቶም እዙይ እዩ። ²¹ከተማታት ነገድ ደቂ ብንያም ከከም ዓሌቶም ድማ ኢያሪኮ፥ ቤት ሖግላ፥ ዔመቅ ቀፂፅ፥ ²²ቤትዓረባ፥ ፄማራይም፥ ቤቴል፥ ²³ዓዊም፥ ፓራ፥ ዖፍራ፥ ²⁴ከፈርዓሞኒ፥ ዖፍኒ፥ ጊብዓ፥ ዓሰርተ ኽልተ ኸተማታት እየን፤ ኣብ ዙርያአን ዘለዋ ቑሸታት እውን ይውስኽ። ²⁵ገባዖን፥ ራማ፥ ብኤሮት፥ ²⁶ምፅጳ፥ ከፌራ፥ ሞፃ፥ ²⁷ሬቀም፥ ይርጵኤል፥ ታራላ፥ ²⁸ፄላ፥ ሃኤለፍ፥ እታ ኸተማ ኢያቡሳውያን፥ ንሳ ኢየሩሳሌም እያ፥ ጊብዓን ቂርያትን፥ ዓሰርተ ኣርባዕተ ኸተማታት እየን፤ ኣብ ዙርያአን ዘለዋ ቑሸታት እውን ይውስኽ። እዝ ርስቲ ደቂ ብንያም ከከም ዓሌቶም እዩ።