Joshua 18

18 ¹Chieina Israelwui yarui ashangva̱ saikorana Shilohli rākazipta, kala kazip khavai kachonshim chi chili khaningkā; kaja ngalei chi athumwui mangāli maishihairasai. ²Israelwui mibingwui ngachaili athumwui samphangrān masamphangranga shang shini taisai. ³Chieina Joshuana Israelnaobingli ngahāna, "Ithumwui Avā, nathumwui navā ngarāwui Varena nathumli mikahai ngalei chi shimlui khavai zangkida nathumna khichā chingri sāngda leira? ⁴Shang-shang eina mi kathumthum ngarānlu; ina athumli ngalei chi zangvāda, athumwui samphangrānwui vang chi kapisanglaga ili latung khavai chihora. ⁵Athumna chi yar shinida ngayarra: Judahna azingshong awui leiretli pamra, kala Josephwui shimkhurna atungshong awui leiretli pamra. ⁶Nathumna ngalei chi yar shinida kapisanglaga hili ili khuirālu, kala ina hili ithumwui Avāwui mangāli nathumwui vang kalā yangra. ⁷Levinaobingna nathumwui alungli yar maleimana, kaja ithumwui Avāwui pāngmon chi athumwui shimluina. Gad, Reuben, kala Manasseh shangwui shang ngayarpakna, ithumwui Avāwui rao Mosesna athumli mikahai Jordanwui zingshovāk athumwui samphangrān samphanghairasai."

⁸Mibing china zatphoka, kala Joshuana ngalei chi kapisang khavai kavābingli kasoi, "Vālu, ngalei chi zangvālaga chi kapisanglaga ili latunglu, kala ina hili Shilohli ithumwui Avāwui mangāli nathumwui vang kalā yangra."

⁹Mibing china vālaga ngalei chi zangvāda, keinung-keinung eina yar shinida lairik akhaluili kapisanglaga, Shilohwui rāmrahli Joshuali latunga. ¹⁰Joshuana Shilohli ithumwui Avāwui mangāli athumwui vang kalā yangkhui, kala chili Joshuana Israelnaobingwui alungli ngalei chi kachichāli kachichāwui yar ngayarmi.

Avāwui Lemmet Benjaminli

¹¹Benjaminwui naomayara shangwui vang kalā chi athumwui shimkhur athishurda tāhaowa; kala athumwui kalāwui thari chi Judahwui naomayara kala Josephwui naomayarabingwui ngachaili shoka. ¹²Athumwui atungshong thari chi Jordanwui eina haophoka, laga Jericho atungshong kaphungpheili shanga; kala zingtunshong kaphungramli shanglaga Beth-aven lamhāngli tātanga. ¹³Chiwui eina thari chi azingshong Luzwui kaphungpheilivāk (chiya Bethel) makānda, laga Khamaze Beth-horonwui azingshong khalei kaphungli khalei Ataroth-addar tāshunga. ¹⁴Thari chi zingtunshongvāk ngareiunglaga, Beth-horonli yangngasungda kaphung eina azingshong vākuikhui, laga Judahwui naomayarabingwui keinung Kiriath-baal (chiya Kiriath-jearim) li ungtanga. Hi zingtunshong vākna. ¹⁵Azingshong vāk chi Kiriath-jearimwui ayar eina haophoka; kala thari chi zingtunshong Nephtoahwui Tara̱ ura̱pam vāshunga. ¹⁶Thari chi Hinnomwui naomayara tampākli yangngasungda kaphungpheili, Rephaim tampākwui atungshong akatangli tāshunga; laga Hinnom tampāk tāda Jebusnaobingwui azingshong kaphungpheili tālaga En-rogel vāshunga. ¹⁷Thari chi atungshong ngareiunglaga En-shemeshli shanga, laga Adummim juikakāli yangngasungda Gelilothli vai; laga Reubenwui naomayara Bohanwui Ngalung tāshunga. ¹⁸Chiwui thili thari chi atungshong Arabahwui mangāli kaphung aren vāda, chiwui eina Arabahshong tāhaowa. ¹⁹Thari chi Beth-hoglah atungshong shanglaga Salt Seawui atungshong shamadruphei, Jordan azingshong khamorli tātanga. Hi azingshongwui thari sai. ²⁰Jordan china zingshovāk thari sai. Hi Benjaminnaobingli kuikhamarei tharibing ngasoda athumwui shimkhurwui athishurda shimluina. ²¹Benjamin shangli athumwui shimkhurwui athishurda keinungbing chiya, Jericho, Beth-hoglah, Emek-keziz, ²²Beth-arabah, Zemaraim, Bethel, ²³Avvim, Parah, Ophrah, ²⁴Chephar-ammoni, Ophni, kala Geba: athumwui kha̱bing eina ngasoda keinung tharāda khanina. ²⁵Gibeon, Ramah, Be-eroth, ²⁶Mizpeh, Chephirah, Mozah, ²⁷Rekem, Irpeel, Taralah, ²⁸Zela, Haeleph, Jebus mibingwui keinung (chiya, Jerusalem), Gibeah, kala Kiriath: athumwui kha̱bing eina ngasoda keinung tharāda matina. Hi Benjaminwui ara̱-azāli athumwui shimkhurwui athishurda shimluina.