யோசுவா 18

18 ¹பின்பு இஸ்ரவேல் சபையார் எல்லாரும் சீலோவிலே கூடிவந்து, அங்கே ஆசரிப்புக் கூடாரத்தை நிறுவினார்கள்; தேசம் அவர்களுக்கு முன்பாக அடக்கப்பட்டிருந்தது. ²இஸ்ரவேல் புத்திரரில் தங்கள் சுதந்தரத்தை இன்னும் பெற்றுக்கொள்ளாத ஏழு கோத்திரத்தார் மீதியாயிருந்தார்கள். ³அப்பொழுது யோசுவா இஸ்ரவேலரை நோக்கி: “உங்கள் பிதாக்களின் தேவனாகிய எங்கள் பிதா உங்களுக்குக் கொடுத்திருக்கிற தேசத்தை நீங்கள் சுதந்தரித்துக்கொள்ளப் புகுவதற்கு எதுவரைக்கும் தாமதம் செய்வீர்கள்? ⁴ஒவ்வொரு கோத்திரத்திற்கும் மூன்று பேரை ஏற்படுத்துங்கள்; நான் அவர்களை அனுப்புவேன்; அவர்கள் புறப்பட்டுத் தேசத்தை உருவப்போய், தங்கள் சுதந்தரத்திற்கேற்ப அதை வரைந்தெழுதி, என்னிடத்திற்குத் திரும்பிவரக்கடவர்கள். ⁵அவர்கள் அதை ஏழு பங்குகளாகப் பங்கிடக்கடவர்கள்: யூதா தன்னுடைய எல்லைக்குள் தெற்கே இருக்கவும், யோசேப்பின் வம்சத்தார் தங்கள் எல்லைக்குள் வடக்கே இருக்கவும் கடவர்கள். ⁶நீங்கள் தேசத்தை ஏழு பங்குகளாக வரைந்தெழுதி, என்னிடத்திற்குக் கொண்டுவாருங்கள்; அப்பொழுது நான் இங்கே எங்கள் பிதாவுக்கு முன்பாக உங்களுக்காகச் சீட்டுப்போடுவேன். ⁷லேவியருக்கோ உங்கள் நடுவே பங்கு இல்லை; எங்கள் பிதாவின் ஆசாரிய ஊழியமே அவர்களுடைய சுதந்தரம். காத், ரூபன், மனாசேயின் பாதிக் கோத்திரத்தார் யோர்தானுக்குக் கிழக்கே தங்கள் சுதந்தரத்தை ஏற்கெனவே பெற்றுக்கொண்டார்கள்; அதை எங்கள் பிதாவின் ஊழியக்காரனாகிய மோசே அவர்களுக்குக் கொடுத்தான்.”

⁸அந்த மனுஷர் புறப்படுகையில், யோசுவா தேசத்தை வரைந்தெழுதப் போகிறவர்களுக்குக் கட்டளையிட்டு: “நீங்கள் போய், தேசத்தை உருவப்போய், அதை வரைந்தெழுதி, என்னிடத்திற்குத் திரும்பிவாருங்கள்; அப்பொழுது நான் இங்கே சீலோவிலே எங்கள் பிதாவுக்கு முன்பாக உங்களுக்காகச் சீட்டுப்போடுவேன்” என்றான்.

⁹அப்படியே அந்த மனுஷர் போய், தேசத்தையெல்லாம் உருவப்போய், அதைப் பட்டணவாரியாக ஏழு பங்குகளாக ஒரு புத்தகச்சுருளில் வரைந்தெழுதி, சீலோவிலுள்ள பாளயத்தில் யோசுவாவினிடத்திற்குத் திரும்பிவந்தார்கள். ¹⁰அப்பொழுது யோசுவா சீலோவிலே எங்கள் பிதாவுக்கு முன்பாக அவர்களுக்காகச் சீட்டுப்போட்டான்; அங்கே யோசுவா இஸ்ரவேல் புத்திரருக்கு அவரவர்களுடைய பங்குக்கேற்றபடி தேசத்தைப் பங்கிட்டுக்கொடுத்தான்.

பென்யமீனுக்குப் பிதா அளித்த சுதந்தரம்

¹¹பென்யமீன் புத்திரரின் கோத்திரத்திற்கு அவர்கள் வம்சங்களின்படி சீட்டு விழுந்தது; அவர்களுடைய சீட்டின் எல்லை யூதா புத்திரருக்கும் யோசேப்பின் புத்திரருக்கும் நடுவாகச் சென்றது. ¹²அவர்களுடைய வடக்கு எல்லை யோர்தானிலே தொடங்கி, எரிகோவுக்கு வடக்கேயுள்ள மேட்டுநிலத்திற்கு ஏறிப்போய், மேற்கே மலைகள் வழியாய் ஏறி, பெத்தாவேனின் வனாந்தரத்திலே முடிந்தது. ¹³அங்கிருந்து அந்த எல்லை தெற்கே லூஸுக்குச் சென்று, பெத்தேலாகிய லூஸின் மருங்கிற்கு நேராகப் போய், அதற்குப் பின் தாழ்வான பெத்தொரோனுக்குத் தெற்கேயுள்ள மலையின்மேலிருக்கிற அதரோத்தாராருக்கு இறங்கிற்று. ¹⁴பின்பு அந்த எல்லை வளைந்து, மேற்குப் புறத்திலே தெற்காகத் திரும்பி, பெத்தொரோனுக்கு எதிரேயுள்ள மலையிலிருந்து தெற்காகப் போய், யூதா புத்திரரின் பட்டணமாகிய கீரியாத்யெயாரீம் என்னும் கீரியாத்பாகாலிலே முடிந்தது; இது மேற்குப் புறமாம். ¹⁵தெற்குப் புறமோ, கீரியாத்யெயாரீமின் கடைசியிலே தொடங்கிற்று; அந்த எல்லை மேற்காக நெப்தோவாவின் நீரூற்றுவரைக்கும் சென்றது. ¹⁶பின்பு அந்த எல்லை பென்இன்னோம் பள்ளத்தாக்குக்கு எதிரேயும் ரெப்பாயீம் பள்ளத்தாக்கின் வடமுனையிலும் இருக்கிற மலையின் கடையிலே இறங்கி, அங்கிருந்து இன்னோம் பள்ளத்தாக்கு வழியாய் எபூசியருக்குத் தெற்கேயுள்ள மருங்குக்கு இறங்கி, என்ரோகேல்வரைக்கும் சென்றது. ¹⁷பின்பு வடக்கே திரும்பி, என்சேமேசுக்குப் போய், அதுமீமின் மேடுக்கு எதிரேயுள்ள கெலிலோத்துக்குச் சென்று, ரூபனின் குமாரனாகிய போகனுடைய கல்லுக்கு இறங்கி, ¹⁸வடக்கே அராபாவுக்கு எதிரேயுள்ள மருங்குக்குக் கடந்துபோய், அராபாவுக்கு இறங்கிற்று. ¹⁹பின்பு அந்த எல்லை பெத்எக்லாவின் வடக்கு மருங்குக்குச் சென்று, யோர்தானின் தென்முனையில் இருக்கிற உப்புக்கடலின் வடகடலவாய்ப்பகுதியிலே முடிந்தது; இது தெற்கு எல்லையாம். ²⁰கிழக்கே யோர்தான் அதற்கு எல்லையாயிருந்தது. இது பென்யமீன் புத்திரருக்கு அவர்கள் வம்சங்களின்படி சுற்றிலுமுள்ள எல்லைகளோடே கிடைத்த சுதந்தரமாம். ²¹பென்யமீன் புத்திரரின் கோத்திரத்திற்கு அவர்கள் வம்சங்களின்படி கிடைத்த பட்டணங்கள் யாதெனில்: எரிகோ, பெத்எக்லா, ஏமேக்கேசிஸ், ²²பெத்அராபா, செமராயீம், பெத்தேல், ²³ஆவீம், பாரா, ஒப்ரா, ²⁴கெப்பார்அம்மோனாய், ஒப்னீ, கேபா என்பவைகளே; இவைகள் தங்கள் கிராமங்களோடே பன்னிரண்டு பட்டணங்கள். ²⁵கிபியோன், ராமா, பேரோத், ²⁶மிஸ்பே, கெப்பீரா, மோத்சா, ²⁷ரேக்கேம், இர்பியேல், தரலா, ²⁸சேலா, எலேப், எருசலேமாகிய எபூசியரின் பட்டணம், கிபியா, கீரியாத் என்பவைகளே; இவைகள் தங்கள் கிராமங்களோடே பதினான்கு பட்டணங்கள். இது பென்யமீன் புத்திரருக்கு அவர்கள் வம்சங்களின்படி கிடைத்த சுதந்தரமாம்.