Nabatanụ Ibe Unu

Ndị siri ike na-ebu ndị na-adịghị ike kama ime ihe na-atọ ha ụtọ, Kraịst ịnabata ndị Jentaịl maka ebube Nna anyị bụkwa ihe akaebe ya. Mgbe ahụ Pọl kwuru okwu gbasara onwe ya: ọchịchọ ya ikwusa ozi ọma ebe a na-amaghị aha Kraịst, onyinye enyemaka maka ndị ogbenye Jerusalem, na olileanya ya isi na Rom gafee ruo Spen.

Isi 15.

Anyị ndị siri ike kwesịrị ibu adịghị ike nke ndị na-esighị ike, ghara ime naanị ihe na-amasị onwe anyị. Ka onye ọbụla nʼime anyị mee ihe na-amasị onye agbata obi ya, maka ọdịmma ya, iji wulie ya elu. Nʼihi na ọbụladị Kraịst emeghị ihe na-amasị onwe ya; dịka e dere ya, “Mkparị nke ndị na-akparị gị dakwasịrị m.” Ihe niile e deburu na mbụ ka e dere iji kuziere anyị ihe, ka anyị wee nwee olileanya site na ntachi obi na site nʼagbamume nke Akwụkwọ Nsọ. Ka Nna anyị, onye na-enye ntachi obi na agbamume, mee ka unu na ibe unu nwee otu obi, dịka Kraịst Jisọs si dị, ka unu niile jiri otu olu too Nna anyị, bụ Nna nke Onyenwe anyị Jisọs Kraịst.

Ya mere, nabatanụ ibe unu, dịka Kraịst sikwa nabata unu, maka otuto nke Nna anyị. Nʼihi na ana m agwa unu na Kraịst ghọrọ ohu nye ndị e biri ugwu, iji gosi eziokwu nke Nna anyị na iji mesie nkwa niile e kwere ndị nna anyị ochie ike, ka mba niile wee nye Nna anyị otuto nʼihi ebere ya, dịka e dere ya, “Nʼihi ya, aga m eto gị nʼetiti mba niile, bụkuokwa aha gị abụ.”

Ọ sịkwara ọzọ, “Ṅụrịanụ ọṅụ, unu mba niile, unu na ndị nke ya.”

Ọzọkwa, “Toonụ Nna anyị, unu mba niile, ka ndị niile tookwa ya.” ^a

Ọzọ, Aịzaya na-ekwu: “Mgbọrọgwụ Jesi ga-abịa, na-ebili iji chịa mba niile; mba niile ga-enwe olileanya nʼime ya.”

Ka Nna anyị, bụ isi iyi nke olileanya, were ọṅụ na udo niile mejupụta unu site nʼokwukwe, ka unu wee jupụta nʼolileanya site nʼike nke Mmụọ Nsọ. ^b

Amara Nna anyị nʼọrụ ozi Pọl

Enwere m obi ike banyere unu, ụmụnne m, na unu onwe unu jupụtara nʼịdị mma, jupụta nʼihe ọmụma niile, nweekwa ike ịdụ ibe unu ọdụ. Ma ejiri m obi ike detuoro unu akwụkwọ nʼihe ụfọdụ, na-echetara unu, nʼihi amara ahụ Nna anyị nyere m, ị bụ onye ozi Kraịst Jisọs nye mba niile, onye nchụaja nke oziọma Nna anyị, ka onyinye nke mba niile wee bụrụ nke a nabatara, nke Mmụọ Nsọ doro nsọ. Ya mere, nʼime Kraịst Jisọs, enwere m ihe m ga-eji nyaa isi nʼọrụ m na-arụrụ Nna anyị. Nʼihi na agaghị m anwa anwa kwuo ihe ọbụla ma ọbụghị ihe Kraịst rụpụtara site nʼaka m iji mee ka mba niile rube isi, site nʼokwu na nʼọrụ. Site nʼike nke ihe ịrịbaama na ọrụ ebube, site nʼike nke Mmụọ nke Nna anyị, ezisaala m oziọma Kraịst nke ọma site na Jerusalem gburugburu ruo Ịlirikọm. Ya mere, m mere ya ebumnobi m ikwusa oziọma nʼebe a na-akpọtụbeghị aha Kraịst, ka m ghara iwukwasị nʼelu ntọala onye ọzọ, kama dịka e dere ya: “ndị a na-agwabeghị gbasara ya ga-ahụ, ndị na-anụbeghị ga-aghọtakwa.”

Nke a bụ ihe mere e ji gbochie m ọtụtụ mgbe ịbịakwute unu.

Atụmatụ Pọl maka ileta Rom

Ma ugbu a, ebe ọ dịghịkwa ebe m ga-arụ ọrụ na mpaghara ndị a, ebe m nwekwara agụụ ọtụtụ afọ ịbịakwute unu, Enwere m olileanya ịhụ unu mgbe m na-agafe nʼụzọ m na-aga Spen, ka unu zipụkwa m nʼụzọ m na-aga ebe ahụ, mgbe mụ na unu nọrịtụworo nwa oge. Ma ugbu a, ana m aga Jerusalem, iji buru enyemaka nye ndị nke Nna anyị. Ndị Masedonia na Akaịa jiri obi ụtọ tụkọta onyinye maka ndị ogbenye nọ nʼetiti ndị nke Nna anyị na Jerusalem. Obi dị ha ụtọ ime ya, nʼezie ọ bụkwa ụgwọ ha ji ịkwụ. Nʼihi na ebe mba niile soro keta oke na ngọzi ime mmụọ nke Izrel, mba niile jikwa ndị Jerusalem ụgwọ inyere ha aka nʼihe nke anụ ahụ iji kwụghachi. Ya mere, mgbe m mechara nke a, nyefekwaa ha ihe a a chịkọtara nʼudo, aga m esite nʼebe unu nọ gawa Spen. Amaara m na mgbe m bịakwutere unu, aga m eji ngọzi Kraịst zuru oke bịa.

Ụmụnne m, site nʼaka Onyenwe anyị Jisọs Kraịst na site nʼịhụnanya nke Mmụọ Nsọ, ana m arịọ unu ka mụ na unu jikọọ ọnụ gbaa mbọ nʼekpere unu na-ekpere Nna anyị nʼihi m, ka a napụta m nʼaka ndị na-ekweghị ekwe nọ na Judia, ka ozi m na-eje maka Jerusalem wee masị ndị nke Nna anyị, ka m wee site nʼọchịchọ Nna anyị jiri ọṅụ bịakwute unu, mụ na unu zukọọkwa ike ọnụ. Ka Nna anyị, bụ isi iyi nke udo, nọnyere unu niile. Amen.