Luyambana Benu yi Benu
Batu ba ngolu bafweti nata malebakani ma babana balembwa, heku kudisephidisa bawu-bawu ku, amana Kidisitu wisi yamba bangulungu kikuma kya khembu ya Tata wetu, kyokyo kikuma kidimbu. Buna Pholu kisi vutuka ha yandi-meni: luzolu lwandi lwa kusamuna kuna Kidisitu kasamunwaku kedi khumbu, kawonga kya lusadisu kikuma kya batu ba phutu ba ku Yelusalemi, yi kivuvu kyandi kya kuhita ku Loma mu kukwenda ku Siphani.
15 1Betu babana twenina yi ngolu, tufweti nata malebakani ma babana balembwa, amana tudisephidisaku betu-betu. 2Kosu mutu mukati dya betu kasephidisa mukwandi wa mukombu kikuma kya mamboti mandi, ndangu katunga. 3Mukuma Kidisitu phi kadisephidisaku; bwosu bwásonama: «Ngusi za bana bisi kutukwana zábwa ha mesu mama.» 4Mambu moosu mana mátekila sonika másonama mu kutoma longa betu, ndangu mu kikwamina yi mu kikesa kya Masonuku tukala yi kivuvu. 5Yambula Tata wetu, wuna wisi heka kikwamina yi kikesa, kaluheka mabanza mamosi benu yi benu, bwosu buna kazodi Kidisitu Yesu, 6ndangu benu boosu, mu ndinga yimosi, lwakembisa Tata wetu, Tata wa Pfumu wetu Yesu Kidisitu.
7Yi hakana ni, luyambana benu yi benu, bwosu phi Kidisitu káluyamba, mu kukumisa Tata wetu. 8Mukuma yiluzimbwadini ni Kidisitu wákituka musadi wa bana bázenga kikanda, ndangu kasongila kyedika kya Tata wetu yi kazikisa bilangi bina kásila kwena bakhaka, 9amana ndangu makanda makembisa Tata wetu kikuma kya khenda yandi, bwosu bwásonama: «Yi hakana ni, yikútsikisa hana kati dya makanda, yiyímbila phi zina dyaku.»
10Amana hika, Masonuku masi zonza: «Sangwalenu, makanda, hakimosi yi batu ba yandi.»
11Amana hika: «Kembisenu Tata wetu, benu makanda moosu, amana batu boosu bamukembisa.» a a v11 Dilongi dyadi disi tanga diminu dimosi dina dyisi teta makanda moosu ma tsi ndangu makembisa wuna FHB kisi tela mu Masonu moosu ni Tata wetu.
12Hika Yesaya kabati zonza: «Musodi wa Yese kakwísa, kasi tombuka mu kuyala makanda; makanda makala yi kivuvu mwena yandi.»
13Yambula Tata wetu, kisina kya kivuvu, kaluphitikisa kyesi kyosu yi ngemba mu nzila ya lukwikilu, ndangu, mu ngolu za Kitembu Kyatoma, lwaluta kuba yi kivuvu. b b v13 Kyesi yi ngemba bisi tukaku mu diyangisa dya lawu. Bisi tuka «mu kukwikila» — mu kulembwila muna mana kásila Tata wetu.
Khenda ya Tata muna Kisalu kya Pholu
14Yi kyedika yitimbukini kikuma kya benu, baphangi bama, ni benu-benu lwenina babasa yi buweti, lwabasa yi mazaya moosu, amana lwenina yi ngolu za kulongisana benu yi benu. 15Kaasi yáluzimbwadini mu ndambu ya mambu konda bweya, mu kuluyindusa, kikuma kya khenda yina yámpheka Tata wetu, 16ndangu yikala musadi wa Kidisitu Yesu kwena makanda, nganga Nzambi wa Musamu wa Bukheti wa Tata wetu, ndangu kimenga kya makanda kyakala kyatámbwasa, kyakitukila kyatoma mu Kitembu Kyatoma. 17Mwena Kidisitu Yesu, buna, yenina yi kifwanunu kya kuditombula mu kisalu kyama kikuma kya Tata wetu. 18Mukuma yitóombulaku kuzonza kima, honi ka mana kahangini Kidisitu mu nzila yama mu kunata makanda mu bulemvu, mu ndinga yi mu mihangu. 19Mu ngolu za bidimbu yi mamangu, mu ngolu za Kitembu kya Tata wetu, yátomasamuna Musamu wa Bukheti wa Kidisitu, tukila ku Yelusalemi yikuna Yidiliki. 20Bwabuna yisi sya mbundu yama mu kulonga Musamu wa Bukheti muma mwosu mu khumbu ya Kidisitu yakhaku tédama, ndangu yitungaku hana fondasio dya mukwawu, 21kaasi bwosu bwásonama: «Bana khaku bazimbwala kikuma kya yandi, bakála mona, amana bana khaku yuka, bakála bakisa.»
22Yi kikuma kikádikika mbala mu mbala mu kukwisa kwena benu.
Lukanu lwa Pholu lwa Kwenda ku Loma
23Kaasi bwabu, konda homa ha kusala muna binzunga byabi, amana bwosu yátonda mvula za lawu mu kukwisa kwena benu, 24thondi yilumona ha kuluta muna nzila yama ya kwenda ku Esipaña, amana ni luphakisa muna nzila kwakuna, buna yámanisa kumona benu ndambu ya tangwa. 25Kaasi bwabu yisi kwenda ku Yelusalemi, mu kunata lusadisu kwena batu ba Tata wetu. 26Masetwani yi Akayi báyukana yi kyesi mu kubonga kawonga kikuma kya batsukami bana benina mu batu ba Tata wetu ku Yelusalemi. 27Básangwala mu kuhanga, amana kyedika kweti mu pfuka ya bawu. Mukuma bwosu makanda mábongila mu bima bya Kitembu bya Kiseledi, makanda menina mu pfuka ya kusadisa bisi Yelusalemi mu bima bya tsi. 28Yi hana ni, kunima dya kumanisa dyambu dyadi yi kuba phitiki konda kima kya mbi kawonga meni, yikatuka yikwenda ku Esipaña mu kuluta kwena benu. 29Nzayi ni mu kukwisa kwama kwena benu, yikwísa yi khenda yosu ya Kidisitu.
30Baphangi bama, mu Pfumu wetu Yesu Kidisitu yi mu lungongu lwa Kitembu, yisi luheka kikesa ni lwanwanaka hakimosi yi meni muna bisambu byenu kwena Tata wetu kikuma kya meni, 31ndangu yikala phulula mu bana bakondi kala bakwikidi ba ku Yuteya, amana kisalu kyama kya ku Yelusalemi kyasephidisa batu ba Tata wetu, 32ndangu, bwosu buna kazodi Tata wetu, yikwisa kwena benu yi kyesi amana yivunda hakimosi yi benu. 33Yambula Tata wetu, kisina kya ngemba, kakala yi benu boosu. Abwabuna!
