Devid Na-arịọ Maka Ebere

Nye onyeisi ndị ọbụ abụ. Abụ Devid, mgbe Netan onye amụma bịakwutere ya mgbe Devid bakwuchara Batsheba.

Devid na-ekpe ekpere mgbe Netan bịakwutere ya banyere Batsheba. Ọ rịọghị Nna ya ka o kpuchie ihe ahụ: sachaa m, kee obi dị ọcha, anapụla m Mmụọ Nsọ gị. O nyere naanị àjà fọdụrụ ya, obi tiwara etiwa nke chegharịrị.

Isi 51.

Meere m ebere, Nna m, dịka ịhụnanya ọgbụgba ndụ gị si dị; dịka ịba ụba nke ọmịiko gị, hichapụ nnupụisi m niile. Sachapụ m nke ọma site nʼikpe ọmụma m, ma mee ka m dị ọcha site na mmehie m. Nʼihi na amaara m nnupụisi m, mmehie m dịkwa nʼihu m mgbe niile. Ọ bụ gị, naanị gị, ka m mehiere megide, meekwa ihe dị njọ nʼanya gị, ka e wee mata na ị bụ onye ziri ezi nʼokwu gị, na onye na-enweghị ịta ụta nʼikpe gị. A mụrụ m nʼime ikpe ọmụma, nne m tụụrụ ime m nʼime mmehie. Ma eziokwu nʼime ime mmadụ na-atọ gị ụtọ, ị na-akụzikwara m amamihe nʼime obi nzuzo.

Were hisọp sachaa m, m ga-adị ọcha; sachaa m, m ga-adị ọcha karịa snoo. ^a Mee ka m nụ ọṅụ na obi ụtọ; mee ka ọkpụkpụ ndị ị zọpịara ṅụrịa ọṅụ. Zopu ihu gị pụọ na mmehie m, hichapụkwa ikpe ọmụma m niile.

Kee nʼime m obi dị ọcha, Nna m, mee ka mmụọ kwụsiri ike dịkwa ọhụrụ nʼime m. Achụpụla m site nʼihu gị, anapụkwala m Mmụọ Nsọ gị. Weghachitere m ọṅụ nke nzọpụta gị, jirikwa mmụọ dị njikere kwagide m.

Mgbe ahụ, m ga-akụziri ndị na-eme ajọ ihe ụzọ gị niile, ndị mmehie ga-alọghachikwute gị. Napụta m site nʼikpe ọmụma ọbara, Nna m, Nna nke nzọpụta m, ire m ga-abụkwa abụ ike banyere ezi omume gị. Nna, Onye na-achị achị, meghee egbugbere ọnụ m, ọnụ m ga-ekwupụtakwa otuto gị.

Nʼihi na àjà adịghị atọ gị ụtọ, ma ọ bụghị ya, m gaara enye ya; àjà nsure ọkụ adịghịkwa amasị gị. Àjà Nna m bụ mmụọ tiwara etiwa; obi tiwara etiwa na nke nwere nchegharị, Nna m, ị gaghị eleda ya anya.

Jiri mmasị ọma gị mee Zayọn ihe ọma; wulie mgbidi Jerusalem niile. Mgbe ahụ, àjà ziri ezi ga-atọ gị ụtọ, àjà nsure ọkụ na àjà nsure ọkụ zuru ezu; mgbe ahụ, a ga-achụ oke ehi nʼelu ebe ịchụ àjà gị.