కీర్తనలు 51

51 ¹నా తండ్రీ, నీ నిబంధనా కృపను బట్టి నన్ను కరుణించుము; నీ విస్తారమైన కనికరమును బట్టి నా తిరుగుబాట్లను తుడిచివేయుము. ²నా దోషమునుండి నన్ను పూర్తిగా కడుగుము, నా పాపమునుండి నన్ను శుద్ధిచేయుము. ³ఏలయనగా నా తిరుగుబాట్లు నాకు తెలిసియున్నవి, నా పాపము ఎల్లప్పుడు నా యెదుట ఉన్నది. ⁴నీకు, నీకు మాత్రమే విరోధముగా నేను పాపము చేసితిని, నీ దృష్టికి చెడ్డదైనదానిని చేసితిని, కావున నీవు నీ మాటలలో నీతిమంతుడవుగా, నీ తీర్పులో నిర్దోషిగా కనబడుదువు. ⁵నేను దోషములో పుట్టితిని, పాపములో నా తల్లి నన్ను గర్భమున ధరించెను. ⁶అయినను నీవు అంతరంగమందు సత్యమును కోరుచున్నావు, నా గుప్తహృదయమందు నాకు జ్ఞానమును బోధించుచున్నావు.

⁷హిస్సోపుతో నన్ను పవిత్రపరచుము, అప్పుడు నేను శుద్ధుడనగుదును; నన్ను కడుగుము, అప్పుడు నేను హిమముకంటె తెల్లగా ఉందును. ^a a v7 హిస్సోపు అనునది పాత నిబంధన శుద్ధీకరణ ఆచారములలో ఉపయోగించిన ఒక చిన్న పొద — ఇక్కడ పూర్తి శుద్ధీకరణకు చిహ్నము. ⁸సంతోషమును ఆనందమును నన్ను వినిపింపజేయుము; నీవు నలుగగొట్టిన యెముకలు హర్షించునుగాక. ⁹నా పాపములనుండి నీ ముఖమును దాచుకొనుము, నా దోషములన్నిటిని తుడిచివేయుము.

¹⁰నా తండ్రీ, నాలో పవిత్రమైన హృదయమును సృజించుము, నాలో స్థిరమైన ఆత్మను నూతనపరచుము. ¹¹నీ సన్నిధినుండి నన్ను వెళ్ళగొట్టవద్దు, నీ పరిశుద్ధాత్మను నానుండి తీసివేయవద్దు. ¹²నీ రక్షణానందమును నాకు మరల దయచేయుము, సుముఖమైన ఆత్మతో నన్ను నిలుపుము.

¹³అప్పుడు నేను అపరాధులకు నీ మార్గములను బోధించెదను, పాపులు నీవైపునకు తిరిగి వచ్చెదరు. ¹⁴నా తండ్రీ, నా రక్షణకు తండ్రివైనవాడా, రక్తాపరాధమునుండి నన్ను విడిపించుము, అప్పుడు నా నాలుక నీ నీతిని గూర్చి బిగ్గరగా కీర్తించును. ¹⁵సర్వాధిపతివైన తండ్రీ, నా పెదవులను తెరువుము, అప్పుడు నా నోరు నీ స్తుతిని ప్రకటించును.

¹⁶ఏలయనగా నీవు బలిని కోరవు, కోరినయెడల నేను దానిని అర్పించెదను; దహనబలియందు నీవు సంతోషింపవు. ¹⁷నలిగిన ఆత్మయే నా తండ్రికి అర్పించు బలులు; నా తండ్రీ, నలిగి నుజ్జునుజ్జయిన హృదయమును నీవు నిరాకరింపవు.

¹⁸నీ దయాదృష్టిని బట్టి సీయోనుకు మేలు చేయుము; యెరూషలేము గోడలను కట్టుము. ¹⁹అప్పుడు నీవు నీతియుక్తమైన బలులయందు, దహనబలులయందు, సర్వాంగ దహనబలులయందు సంతోషించెదవు; అప్పుడు నీ బలిపీఠముపై ఎద్దులు అర్పింపబడును.